Kwenda na mambu ke na kati

Kwenda na tansi ya malongi

 KAPU YA 48

Yezu Me Sala Bimangu Kansi Bantu ya Nazareti Me Buya Kundima Yandi

Yezu Me Sala Bimangu Kansi Bantu ya Nazareti Me Buya Kundima Yandi

MATAYO 9:27-34; 13:54-58 MARKO 6:1-6

  • YEZU ME BELULA KIFWA-MESO MPI BABA

  • BANTU YA NAZARETI ME BUYA KUNDIMA YANDI

Yezu me katuka kusala mambu mingi. Na nima ya kukatuka na Dekapolisi, yandi me belula nkento yina ke basikaka menga mpi me futumuna mwana ya Yairusi ya nkento. Kansi, yo me mana ve. Ntangu Yezu me katuka na nzo ya Yairusi, bifwa-meso zole ke landa yandi mpi ke tuba na ndinga ya ngolo nde: “Mwana ya Davidi, wila beto mawa.”—Matayo 9:27.

Ntangu bifwa-meso yai ke binga Yezu “Mwana ya Davidi,” bo ke monisa nde bo ke ndima nde Yezu ta baka kiti ya Kimfumu ya Davidi mpi nde yandi kele Mesia. Yo ke monana nde Yezu ke tula ve dikebi ntangu bo ke boka, ziku sambu yandi ke zola kuzaba kana bo ta landa kibeni kubondila yandi; bo me sala kibeni mutindu yina. Ntangu Yezu me kota na nzo mosi, bifwa-meso yai me kota mpi. Yezu me yula bo nde: “Keti beno ke kwikila nde mono lenda sala yo?” Bo me tuba ti kivuvu yonso nde: “Ee, Mfumu.” Yo yina, Yezu me simba meso na bo mpi me zabisa bo nde: “Na kuwakana ti lukwikilu na beno, bika yo salama mutindu yina sambu na beno.”—Matayo 9:28, 29.

Na mbala mosi, bo me yantika kumona. Kaka mutindu yandi vandaka kuzabisa bantu mingi, yandi me songa bo na kuzabisa ve bantu ya nkaka mambu yina yandi me sadila bo. Kansi sambu bo kele na kiese mingi, bo me panza nsangu yina.

Ntangu bantu yai zole ke kwenda, bantu me nata muntu mosi yina ke tubaka ve sambu yandi kele ti demo. Yezu me basisa demo yina mpi na mbala mosi muntu yango me yantika kutuba. Bimvuka ya bantu me yituka mpi me tuba nde: “Beto me monaka ntete ve diambu ya mutindu yai na Izraele.” Bafarize mpi kele pana. Bo lenda buya ve kundima bimangu yina, yo yina bo me tubila diaka mambu ya luvunu yina bo ke fundila yandi sambu na ngolo yina yandi ke sadila bimangu. Bo me tuba nde: “Yandi ke basisa bademo na nsadisa ya mfumu ya bademo.”—Matayo 9:33, 34.

Ntangu fioti na nima, Yezu me vutuka na bwala na yandi Nazareti mpi ntangu yai yandi me vutuka ti balongoki na yandi. Kiteso ya mvula mosi me luta, yandi longaka na sinagoga mosi kuna. Na luyantiku, bantu sepelaka na mambu yina yandi longaka kansi na nima bo waka makasi mpi sosaka kufwa yandi. Ntangu yai, Yezu ke sosa diaka kusadisa bantu ya bwala na yandi.

Na kilumbu ya Kisabatu, Yezu me kwenda diaka na sinagoga sambu na kulonga. Bantu mingi ke yituka mpi me yula nkutu nde: “Na wapi muntu yai me baka mayele yai mpi ngolo ya kusala bidimbu yai ya nkumbwa?” Bo me yula diaka nde: “Keti yandi kele ve mwana ya sharpantie? Keti zina ya mama na yandi kele ve Maria, mpi keti bampangi na yandi ya babakala kele ve Yakobo, Yozefi, Simoni, mpi Yudasi? Mpi bampangi na yandi ya bankento, keti bo yonso kele ve awa ti beto? Ebuna, na wapi yandi me baka mambu yai yonso?”—Matayo 13:54-56.

Bantu ke mona Yezu kaka bonso muntu ya bwala na bo. Bo ke kudiyula nde: ‘Beto monaka yandi ntangu yandi vandaka kuyela, ebuna nki mutindu yandi lenda vanda Mesia?’ Yo yina, ata mambu yonso ke monisa nde yandi kele Mesia, mu mbandu mayele na yandi mpi bidimbu ya nkumbwa yina yandi ke sala, bo ke buya kundima yandi. Ata bampangi na yandi, yina me zaba yandi mbote kibeni me bula sakuba sambu na yandi, yo yina yandi me tuba nde: “Mbikudi ke kondaka lukumu kaka na bwala na yandi mosi mpi na nzo na yandi mosi.”—Matayo 13:57.

Ya kieleka, Yezu me yituka sambu na kukonda lukwikilu na bo. Yo yina, yandi me sala ve ata kimangu mosi kuna “katula kaka kutula maboko na zulu ya bantu fioti ya maladi mpi kubelula bo.”—Marko 6:5, 6.