Kwenda na mambu ke na kati

Kwenda na tansi ya malongi

 KAPU YA 33

Yezu Me Lungisa Mbikudulu ya Yezaya

Yezu Me Lungisa Mbikudulu ya Yezaya

MATAYO 12:15-21 MARKO 3:7-12

  • KIMVUKA YA BANTU KE KANGAMA TI YEZU

  • YEZU ME LUNGISA MBIKUDULU YA YEZAYA

Ntangu Yezu ti balongoki na yandi me wa nde Bafarize ti bantu ya Erode me wakana sambu na kufwa yandi, bo me kwenda na Nzadi ya Galilea. Bimvuka ya bantu me katuka na bisika yonso me kwisa na Yezu. Bo me katuka na Galilea, na mbanza Tire mpi Sidoni ya kele na lweka ya masa, na esti ya Nzadi ya Yordani, na Yeruzalemi mpi na sudi ya Idumea. Yezu me belula bambefo mingi. Yo yina, bantu yina kele ti bimbefo ya ngolo ke kwisa na yandi. Na kisika ya kuvingila nde yandi simba bo, bo ke pusana pene-pene na yandi sambu na kusimba yandi.—Marko 3:9, 10.

Bimvuka ya bantu kele mingi yo yina Yezu me zabisa balongoki na yandi na kusosila yandi bwatu ya fioti, sambu yandi pusana mwa ntama ti dibungu mpidina bantu kukangama-kangama ve ti yandi. Diaka, yandi lenda longa bo ntangu yandi kele na kati ya bwatu to yandi lenda pusana kisika ya nkaka na dibungu yina sambu na kusadisa bantu mingi.

Longoki Matayo ke monisa nde kisalu ya Yezu me lungisa “mambu yina Nzambi tubaka na nzila ya mbikudi Yezaya.” (Matayo 12:17) Inki mbikudulu Yezu me lungisa?

“Tala! Nsadi na mono yina mono me solaka, yina mono ke zolaka mingi, mpi yina mono me ndima! Mono ta tula mpeve na mono na zulu na yandi, mpi yandi ta monisa lunungu na makanda. Yandi ta swana ve, mpi ta tula ve makelele; ata muntu mosi mpi ve ta wa ndinga na yandi na banzila ya nene. Yandi ta zenga ve lukengi ya bo me konika, mpi yandi ta fwa ve tiya ya nsinga ya mwinda yina ke pela mbote ve tii kuna yandi ta nungisa lunungu. Ya kieleka, makanda ta tula kivuvu na zina na yandi.”—Matayo 12:18-21; Yezaya 42:1-4.

Ya kieleka, Yezu kele nsadi yina Nzambi ke zolaka mpi ke ndimaka. Yezu me monisa pwelele lunungu ya kieleka, yina bamfumu ya mabundu ya luvunu ke fika na bansiku yina bo ke tula na mabundu na bo. Bafarize ke sadila nsiku ya Nzambi kukonda lunungu mpi na mutindu na bo mosi; yo yina bo lenda sadisa ve ata fioti mbefo mosi na Kisabatu. Sambu na kumonisa pwelele lunungu ya Nzambi mpi nde mpeve ya Nzambi kele na zulu na yandi, Yezu ke katula bantu na kizitu ya bansiku yina ya kukonda lunungu. Yo yina, bamfumu ya mabundu ke sosa kufwa yandi. Yo kele mawa kibeni!

Mbikudulu ya Yezaya ke tuba nde: “Yandi ta swana ve, mpi ta tula ve makelele; ata muntu mosi mpi ve ta wa ndinga na yandi na banzila ya nene.” Yo ke tendula inki? Ntangu Yezu ke belula bambefo mpi ke basisa bampeve ya mbi, yandi ke songa bo na “kuzabisa ve bantu kana yandi kele nani.” (Marko 3:12) Yandi ke zola ve nde bantu kuzaba yandi na nzila ya  mambu yina bantu ke tuba na babala-bala sambu na kukumisa yandi to na nzila ya mambu yina bantu ke zabisa bantu ya nkaka na kiese yonso ata mambu yango salamaka ve kibeni mutindu yina.

Diaka, Yezu ke zabisa nsangu ya ke pesa kikesa na bantu yina kele bonso lukengi ya bo me konika mpi ya me bukana. Bantu yango kele bonso nsinga ya mwinda yina ke pela mbote ve mpi ya ke zola kufwa. Yezu me zenga ve lukengi yina ya bo me konika mpi yandi me fwa ve nsinga ya mwinda yina ke pela mbote ve mpi ya ke zola kufwa. Kansi yandi me sala mambu na mawete mpi na zola sambu na kupesa bantu yina me lemba kikesa na mayele yonso. Ya kieleka, Yezu kele muntu yina makanda lenda tudila ntima.