Kwenda na mambu ke na kati

Kwenda na tansi ya malongi

 KAPU YA 45

Yezu Kele ti Kiyeka na Zulu ya Bademo Mingi

Yezu Kele ti Kiyeka na Zulu ya Bademo Mingi

MATAYO 8:28-34 MARKO 5:1-20 LUKA 8:26-39

  • YEZU ME BASISA BADEMO MPI BO ME KOTA NA BANGULU

Ntangu balongoki me vutuka na dibungu na nima ya kukutana ti diambu mosi ya mpasi na nzadi-mungwa, bo me mona diambu mosi ya kuyituka. Bantu zole ya nku kibeni yina kele ti bademo me basika pene-pene ya maziamu mpi ke kwenda ntinu kisika Yezu kele. Mosi na kati ya bantu yango me benda dikebi na bo, ziku sambu yandi kele nku mingi kuluta yina ya nkaka mpi yandi kele na kimpika ya bademo banda ntama.

Yo kele mawa kibeni sambu yandi ke tambulaka kinkonga. Mpimpa ti mwini, yandi ‘ke bokaka na maziamu ti na bangumba, mpi yandi ke kudilwadisaka ti matadi.’ (Marko 5:5) Yandi kele nku kibeni yo yina bantu ke waka boma na kuluta na nzila yina. Bantu ya nkaka me mekaka kukanga yandi miniololo mpi minioti na makulu, kansi yandi ke zengaka yo. Ata muntu mosi ve kele ti kiyeka na zulu na yandi.

Ntangu muntu yina me kuma kisika Yezu kele, yandi me bwa na makulu ya Yezu mpi bademo yina ke twadisa yandi me pusa yandi na kutuba na ndinga ya ngolo nde: “Yezu, Mwana ya Nzambi ya Kuluta Zulu, inki mambu nge ti mono? Mono ke lomba nge na kudia ndefi na zina ya Nzambi nde nge ta monisa mono mpasi ve.” Yezu me monisa nde yandi kele ti kiyeka na zulu ya bademo, yandi me pesa nsiku nde: “Nge mpeve ya mbi, basika na muntu yai.”—Marko 5:7, 8.

Ya kieleka, muntu yai kele ti bademo mingi. Yezu me yula yandi nde: “Zina na nge nani?” Yandi me tuba nde: “Zina na mono Kimvuka, sambu beto kele mingi.” (Marko 5:9) Kimvuka mosi ya basoda ya Roma ke vandaka ti mafunda ya basoda; yo ke monisa nde bademo mingi me vukana na kati ya muntu yai, bo ke nwanisa yandi mpi ke monisa yandi mpasi. Bo me bondila Yezu “na kutinda bo ve na dibulu ya nda.” Ziku, bo me bakisa mambu yina ta kumina bo ti mfumu na bo Satana.—Luka 8:31.

Kimvuka ya bangulu kiteso ya 2 000 vandaka kudia na lweka na bo. Na kutadila Nsiku, bangulu vandaka bambisi ya mvindu mpi yo lombaka nde Bayuda kuvanda ve ti yo. Bademo me zabisa Yezu nde: “Tinda beto na bangulu, sambu beto kota na kati na yo.” (Marko 5:12) Yezu me zabisa bo na kukwenda mpi bo me kota na bangulu. Ebuna, bangulu yonso 2 000 me katuka na ngumba, me kudilosa na nzadi-mungwa mpi yo me dinda.

Ntangu bantu yina ke kengila bangulu me mona diambu yai, bo me kwenda ntinu mpi me zabisa yo  na mbanza na bo ti na bambanza ya pene-pene. Bantu me kwisa sambu na kutala mambu yina me salama. Ntangu bo me kuma, bo me mona nde muntu yina vandaka ntete ti bademo me kuma mbote mpi ke sala diaka ve mavwanga. Yandi me lwata bilele mpi me vanda na makulu ya Yezu.

Bantu yina waka to monaka muntu yai kele na boma ya ngolo, bo ke bakisa ve mambu yina me salama. Bo me lomba Yezu na kukatuka na bwala na bo. Ntangu Yezu me mata na maswa sambu na kukwenda, muntu yina vandaka ntete ti bademo me bondila Yezu sambu na kukwenda ti yandi. Kansi, Yezu me zabisa yandi nde: “Vutuka na bantu ya dibuta na nge, mpi tubila bo mambu yonso yina Yehowa me sala sambu na nge mpi mawa yina yandi me monisila nge.”—Marko 5:19.

Mbala mingi, Yezu vandaka kubuyisa bantu yina yandi me belula na kuzabisa bantu ya nkaka sambu yandi zolaka ve nde bantu kundima yandi kaka sambu na bansangu ya mambu ya kuyituka yina bantu vandaka kutuba. Kansi na mbala yai, muntu yina vandaka ntete ti bademo ke monisa pwelele nde Yezu kele ti kiyeka mpi muntu yango lenda ta kimbangi na bantu yina lenda zwa ve dibaku ya kukutana ti Yezu. Diaka, kimbangi na yandi lenda sadisa bantu na kundima ve bansangu yonso ya luvunu yina bo ta tuba sambu na bangulu yina me vila. Yo yina, muntu yango me kwenda mpi me yantika kuzabisa bantu ya bambanza ya Dekapolisi mambu yina Yezu me sala sambu na yandi.