Kwenda na mambu ke na kati

Kwenda na tansi ya malongi

 KAPU YA 47

Mwana-Nkento Yina Fwaka Me Vutuka na Luzingu!

Mwana-Nkento Yina Fwaka Me Vutuka na Luzingu!

MATAYO 9:18, 23-26 MARKO 5:22-24, 35-43 LUKA 8:40-42, 49-56

  • YEZU ME FUTUMUNA MWANA YA YAIRUSI YA NKENTO

Yairusi me mona nde Yezu me belula nkento yina vandaka kubasika menga. Ntembe kele ve nde, Yezu lenda belula mpi mwana na yandi ya nkento, kansi yandi ke mona nde ‘ntangu yai, yo fwete vanda nde mwana na yandi ya nkento me fwa.’ (Matayo 9:18). Keti Yezu lenda futumuna yandi ata yandi me fwa?

Ntangu Yezu ke solula ti nkento yina yandi me katuka kubelula, bantu me katuka na nzo ya Yairusi me kwisa mpi me zabisa yandi nde: “Mwana na nge ya nkento me fwa!” Bo me tuba diaka nde: “Sambu na nki kuyangisa diaka Longi?”—Marko 5:35.

Yai nsangu mosi ya mawa kibeni! Muntu yai ya bantu ke zitisaka mingi me lemba kibeni nitu. Mwana na yandi mosi kaka ya nkento me fwa. Kansi Yezu me wa mambu yina bantu me tuba, yandi me baluka na Yairusi mpi me pesa yandi kikesa nde: “Kuwa boma ve, monisa kaka lukwikilu.”—Marko 5:36.

Ebuna Yezu me kwenda ti Yairusi na nzo na yandi. Ntangu bo me kuma, bo me wa makelele mingi. Bantu yina kele pana ke dila, ke tula milolo mpi ke kudibula sambu na mawa. Yezu me kota na kati ya nzo mpi me tuba diambu mosi yina me yitukisa bantu, yandi me tuba nde: “Mwana me fwa ve kansi yandi ke lala.” (Marko 5:39) Ntangu bantu me wa mambu yina, bo me yantika kuseka Yezu. Bo me zaba nde mwana-nkento yina me fwa kibeni. Kansi, na nsadisa ya ngolo yina Nzambi me pesaka yandi, Yezu ta monisa nde bantu lenda vutuka na luzingu kaka mutindu bo lenda tedimisa bo na mpongi ya ngolo.

Ntangu yai, Yezu me lomba bantu yonso na kubasika na nganda, yandi me bikala kaka ti Piere, Yakobo, Yoane mpi bibuti ya mwana-nkento yina me fwa. Yezu me baka bantu yai tanu mpi bo me kwenda kisika mwana-nkento yina kele ya kulala. Yandi me simba mwana-nkento yango na diboko mpi me tuba nde: “‘Talita kumi,’ yina kana bo balula yo, yo ke tendula: ‘Mwana-nkento ya fioti, mono ke tubila nge nde, “Telama!”’” (Marko 5:41) Na mbala mosi, yandi me telama mpi me yantika kutambula. Yairusi ti nkento na yandi me wa kiese mingi kibeni ntangu bo me mona diambu yai. Sambu na kumonisa kibeni nde mwana-nkento yina kele na luzingu, Yezu me songa bo nde bo pesa yandi madia.

Na mabaku mingi, Yezu vandaka kuzabisa bantu yina yandi vandaka kubelula nde bo songa ve bantu mambu yina yandi sadilaka bo; yandi me songa mpi bibuti ya mwana-nkento yai mutindu yina. Kansi, sambu bibuti yai mpi bantu ya nkaka kele na kiese mingi, bo me panza nsangu yina “na babwala yonso ya nziunga.” (Matayo 9:26) Kana nge me mona muntu mosi yina nge vandaka kuzola me futumuka, keti nge ta tubila yo ve na kiese yonso? Yai kele lufutumuku ya zole yina Yezu me sala.