Kwenda na mambu ke na kati

Kwenda na tansi ya malongi

 KAPU YA 23

Yezu Me Sala Bimangu ya Nene na Kapernaumi

Yezu Me Sala Bimangu ya Nene na Kapernaumi

MATAYO 8:14-17 MARKO 1:21-34 LUKA 4:31-41

  • YEZU ME BASISA DEMO

  • YEZU ME BELULA BOKILO YA PIERE YA NKENTO

Yezu me katuka kubinga balongoki iya—Piere, Andre, Yakobo, ti Yoane—sambu na kukuma balobi-bantu. Na kilumbu ya Kisabatu, bo yonso me kwenda na sinagoga na Kapernaumi. Yezu ke longa na sinagoga, na mbala yai mpi bantu me yituka sambu na mutindu na yandi ya kulonga. Yandi ke longa bonso muntu yina kele ti kiyeka kansi ve bonso balongi ya nsiku.

Muntu mosi ya kele ti demo kele pana na kilumbu yai ya Kisabatu. Yandi ke boka nde: “Yezu muntu ya Nazareti, nki mambu nge ti beto? Keti nge me kwisa sambu na kufwa beto? Mono me zaba mbote-mbote nani nge kele: Santu ya Nzambi!” Yezu me nganina demo yina ke twadisa muntu yina mpi me zabisa yandi nde: “Vanda pima, mpi basika na yandi!”—Marko 1:24, 25.

Na nima, mpeve yina ya mbi me losa muntu yina na ntoto mpi yandi me yantika kukona ti kuboka. Kansi demo yina me basika na kati ya muntu yina “kukonda kusala yandi mbi.” (Luka 4:35) Bantu yina kele na lweka ya muntu yina na sinagoga me yituka. Bo me yula nde: “Yai inki? . . . Yandi ke tuba na kiyeka yonso ata na bampeve ya mbi mpi yo ke lemfukila yandi.” (Marko 1:27) Ya kieleka, nsangu ya kimangu yai me panzana na Galilea ya mvimba.

Ntangu Yezu ti balongoki na yandi me basika na sinagoga, bo me kwenda na nzo ya Simoni yina bo vandaka kubinga Piere. Kuna, bokilo ya Piere ya nkento kele na fievre ya ngolo. Bo me bondila Yezu sambu yandi belula yandi. Yo yina, Yezu me nieka, me simba yandi na diboko mpi me tedimisa yandi. Na mbala mosi, yandi me beluka mpi me yantika kusadila Yezu ti balongoki na yandi. Ziku yandi me lambila bo madia.

Na nkokila, bantu me katuka bisika yonso mpi me kwisa ti bambefo na bo na nzo ya Piere. Na nima, yo ke monana nde mbanza ya mvimba me fuluka na kielo ya Piere. Sambu na nki? Bo ke sosa lusansu. Ebuna, ‘bantu yonso yina kele ti bantu ya maladi ya mitindu yonso me nata bo na yandi. Konso muntu yina yandi ke tula maboko, yandi ke belula yandi.’ (Luka 4:40) Ata bo vandaka kubela maladi ya nki mutindu, yandi ke belula bo, kaka mutindu Yezaya tubaka yo na ntwala. (Yezaya 53:4) Nkutu, yandi me belula bantu yina vandaka ti bademo. Ntangu bampeve yina ya mbi ke basika, bo ke tuba na ndinga ya ngolo nde: “Nge kele Mwana ya Nzambi.” (Luka 4:41) Kansi Yezu me nganina bo mpi me buyisa bo na kutuba diaka ata kima mosi. Bo me zaba nde Yezu kele Kristu, kansi yandi ke zola ve nde bo monisa bonso nde bo ke sadilaka Nzambi ya kieleka.