Kwenda na mambu ke na kati

Kwenda na tansi ya malongi

 KAPU YA 26

“Masumu na Nge Me Lolulama”

“Masumu na Nge Me Lolulama”

MATAYO 9:1-8 MARKO 2:1-12 LUKA 5:17-26

  • YEZU ME LOLULA MASUMU YA KIKATA MOSI MPI ME BELULA YANDI

Bantu ya babwala mingi me wa nsangu ya Yezu. Bantu mingi me katuka na babwala ya ntama sambu na kuwa Yezu mpi kumona bimangu yina yandi ke sala. Kansi na nima ya mwa bilumbu, yandi me vutuka na Kapernaumi, kisika yina yandi longaka mingi. Kukonda kusukinina, bantu me wa nde yandi me vutuka na mbanza yai ya kele pene-pene ya Nzadi-Mungwa ya Galilea. Yo yina, bantu mingi me kwisa na nzo yina yandi kele. Bafarize mpi balongi ya Nsiku kele na kati ya bantu yina me kwisa. Bo me katuka na Galilea, na Yudea mpi na Yeruzalemi.

Biblia ke tuba nde: ‘Bantu mingi kibeni me vukana na mpila nde kisika kele diaka ve, ata pene-pene ya kielo, ebuna yandi me yantika kuzabisa bo ndinga.’ (Marko 2:2) Ntangu me lunga sambu diambu mosi ya kuyituka kusalama. Diambu yango lenda sadisa beto na kumona nde Yezu kele ti ngolo ya kumanisa kisina ya bampasi ya bantu mpi kusala nde mavimpi ya bantu yonso yina yandi ke pona kukuma diaka mbote.

Ntangu Yezu ke longa na kati ya nzo yina me fuluka ti bantu, babakala iya me kwisa ti kikata mosi ya kulala na mbeto. Bo ke zola nde Yezu kubelula nduku na bo. Kansi sambu bantu kele mingi, bo ‘me kuka ve kunata yandi tii na kisika yina Yezu kele.’ (Marko 2:4) Bo me lemba nitu kibeni. Bo me mata na ludi ya nzo mpi bo me tobula yo. Na nima, bo me kulumusa mbeto yina kikata me lala tii na nzo.

Keti Yezu me wa makasi mutindu bo me zenga yandi ndinga? Ata fioti ve. Yandi me yituka ngolo sambu na lukwikilu na bo, mpi yandi me zabisa kikata yina nde: “Masumu na nge me lolulama.” (Matayo 9:2) Kansi, keti ya kieleka Yezu lenda lolula masumu? Balongi ya Bansiku ti Bafarize me ndima ve, yo yina bo ke kudiyula nde: “Sambu na nki muntu yai ke tuba mutindu yai? Yandi ke vweza. Nani lenda lolula masumu, katula kaka Nzambi?”—Marko 2:7.

Yezu me zaba mabanza na bo; yo yina yandi me yula bo nde: “Sambu na nki beno ke yindula mambu yai na bantima na beno? Inki kele pete mingi, kutubila kikata nde, ‘Masumu na nge me lolulama,’ to kutuba nde, ‘Telama, baka mbeto na nge, mpi tambula’?” (Marko 2:8, 9) Na kutadila kimenga yina Yezu ta pesa na nima, yandi lenda lolula masumu ya muntu yina.

Mpidina, Yezu me monisa kibuka ya bantu mpi bambeni na yandi nde yandi kele ti kiyeka ya kulola masumu ya bantu yina kele na ntoto. Yandi me baluka na kikata yina mpi me zabisa yandi nde: “Mono ke tubila nge nde, Telama, baka mbeto na nge, mpi kwenda na nzo na nge.” Muntu yina me talama mbala mosi, me baka mbeto na yandi mpi me basika na meso ya bantu yonso. Bantu me yituka. Bo me pesa Nzambi lukumu mpi bo me tuba nde: “Beto me monaka ntete ve diambu ya mutindu yai.”—Marko 2:11, 12.

Yo kele mfunu na kuzaba nde Yezu me fwanisa disumu ti maladi, mpi ndolula ya masumu ti kuvanda na mavimpi ya mbote. Biblia ke longa nde kibuti na beto ya ntete Adami salaka disumu, yo yina beto yonso me bakaka malanda ya disumu yina, disongidila maladi mpi lufwa. Kansi na nsi ya luyalu ya Kimfumu ya Nzambi, Yezu ta lolula masumu ya bantu yonso yina ke zolaka Nzambi mpi ke sadilaka yandi. Ebuna, maladi ta mana kimakulu.—Baroma 5:12, 18, 19.