Kwenda na mambu ke na kati

Kwenda na tansi ya malongi

 KAPU YA 46

Yandi Me Simba Lele ya Yezu mpi Me Beluka

Yandi Me Simba Lele ya Yezu mpi Me Beluka

MATAYO 9:18-22 MARKO 5:21-34 LUKA 8:40-48

  • NKENTO MOSI ME SIMBA LELE YA YEZU MPI ME BELUKA

Bayuda yina ke zingaka na nordi ya dibungu ya Nzadi-Mungwa ya Galilea me wa nde Yezu me katuka na Dekapolisi. Mbala ya nkaka, mingi na kati na bo waka nde Yezu lembikaka mupepe ya ngolo mpi nzadi-mungwa; ziku bankaka zabaka nde yandi belulaka muntu mosi yina vandaka ti bademo. Yo yina, “kimvuka mosi ya nene ya bantu” me vukana na nzadi-mungwa, ziku na Kapernaumi sambu na kuyamba Yezu ntangu yandi me vutuka. (Marko 5:21) Ntangu yandi ke basika na maswa, bo yonso kele na kiese mpi ke vingila yandi.

Muntu mosi na kati na bo ke zola kibeni kumona Yezu, zina na yandi Yairusi. Yandi kele ntwadisi ya sinagoga, ziku na Kapernaumi. Yandi me bwa na makulu ya Yezu mpi me bondila yandi mbala mingi nde: “Mwana na mono ya fioti ya nkento ke bela ngolo kibeni. Kana nge zola, kwisa mpi tula yandi maboko sambu yandi beluka mpi yandi zinga.” (Marko 5:23) Yairusi me lomba Yezu na kusadisa mwana na yandi mosi kaka ya nkento ya bamvula 12 yina yandi ke zolaka mingi, Yezu ta sala nki?—Luka 8:42.

Ntangu Yezu ke kwenda na nzo ya Yairusi, yandi me kutana ti diambu ya nkaka ya ke pesa mpasi. Bantu mingi yina kele ti Yezu kele na kiese mpi ke kudiyula kana bo ta mona ntangu yandi ke sala kimangu ya nkaka. Kansi, na kati ya kimvuka yina ya bantu, nkento mosi ke kudiyangisa sambu na maladi ya ngolo yina yandi kele ti yo.

Nkento yai ya Muyuda ke basikaka menga banda bamvula 12. Yandi me sosaka lusadisu na minganga mingi mpi me manisaka mbongo na yandi yonso na balusansu yina bo zabisaka yandi. Kansi, yandi me belukaka ve. Nkutu, maladi na yandi me “kumaka mingi.”—Marko 5:26.

Maladi yai ke lembisaka yandi, ke yangisaka yandi mpi ke pesaka yandi nsoni. Mbala mingi, kana muntu kele ti maladi ya mutindu yai, yandi ke waka nsoni na kutubila yo. Diaka na kutadila Nsiku ya Moize, kubasika menga vandaka kukumisa nkento mvindu. Konso muntu yina ke simba yandi to bilele na yandi yina kele ti menga fwete yobila mpi kuvanda mvindu tii na nkokila.—Levi 15:25-27.

Nkento yai ‘me wa nsangu ya Yezu,’ mpi ntangu yai yandi ke sosa yandi. Sambu yandi kele mvindu, yandi me kota na kimvuka ya bantu kukonda nde bo mona yandi; yandi ke kuditubila nde: “Kana mono simba ata bilele na yandi ya zulu, mono ta beluka.” Ntangu yandi me simba nsongi ya lele ya Yezu, na mbala mosi yandi me wa nde menga ke basika diaka ve. Yandi “me beluka na maladi yina ya mpasi.”—Marko 5:27-29.

Ebuna Yezu me tuba nde: “Nani me simba mono?” Nge ke yindula nde nkento yina me wa nki mutindu ntangu Yezu me yula mpidina? Na mutindu mosi buna, Piere me sungika Yezu mpi me tuba nde: “Longi, bimvuka ya bantu ke ziunga nge mpi ke kangama-kangama ti nge.” Kansi, sambu na nki Yezu me yula nde: “Nani me simba mono?” Yezu me tuba nde: “Muntu mosi me simba mono, sambu mono me zaba nde ngolo me basika na nitu na mono.” (Luka 8:45, 46) Ya kieleka, kubeluka ya nkento yina me katula ndambu ya ngolo ya Yezu.

Ntangu nkento yina me bakisa nde yandi lenda bumbana diaka ve, yandi me kwisa kufukama na ntwala ya Yezu, yandi ke wa boma mpi ke tekita. Na ntwala ya bantu yonso, yandi me tuba kieleka sambu na maladi na yandi mpi yandi me tuba nde yandi me beluka. Na mawete yonso, Yezu me pesa yandi kikesa nde: “Mwana na mono, lukwikilu na nge me belula nge. Kwenda na ngemba, mpi beluka na maladi na nge ya mpasi.”—Marko 5:34.

Yo kele pwelele nde muntu yina Nzambi me pona sambu na kuyala ntoto ke zolaka bantu mpi ke wilaka bo mawa, yandi ke tudilaka bo dikebi mpi yandi kele ti ngolo ya kusadisa bo.