Kwenda na mambu ke na kati

Kwenda na tansi ya malongi

 KAPU YA 25

Yezu Me Wila Muntu ya Lepre Mawa mpi Me Belula Yandi

Yezu Me Wila Muntu ya Lepre Mawa mpi Me Belula Yandi

MATAYO 8:1-4 MARKO 1:40-45 LUKA 5:12-16

  • YEZU ME BELULA MUNTU YA LEPRE

Ntangu Yezu ti balongoki na yandi iya ke kwenda kusamuna na “basinagoga . . . na Galilea ya mvimba,” nsangu ya bimangu yina Yezu ke sala me mwangana bisika yonso. (Marko 1:39) Nsangu yango me kuma na bwala ya muntu mosi yina kele ti lepre. Munganga Luka ke tuba nde muntu yina vandaka “ya kufuluka na lepre.” (Luka 5:12) Kana maladi yai ya mpasi me kuma ngolo, yo ke zengaka malembe-malembe bitini ya nkaka ya nitu.

Muntu yai ya lepre kele na mpasi kibeni mpi Nsiku ke lomba nde yandi zinga ntama ti bantu ya nkaka. Diaka, kana bantu me kuma kisika yandi kele, yandi fwete tuba na ndinga ya ngolo nde: “Mvindu, mvindu!” sambu bo pusana ve pene-pene ti yandi mpi bo baka ve maladi. (Levi 13:45, 46) Kansi ntangu yai, muntu yai ya lepre ta sala nki? Yandi me kwenda pene-pene na Yezu, me fukama mpi me lomba yandi nde: “Mfumu, kana nge me zola, nge lenda kumisa mono bunkete.”—Matayo 8:1, 2.

Muntu yai vandaka kutula kibeni lukwikilu na Yezu. Ntembe kele ve nde, maladi yai me kumisa yandi muntu ya mawa kibeni. Inki Yezu ta sala? Kana nge vandaka pana, inki nge zolaka kusala? Yezu me wila yandi mawa, me tandula diboko na yandi mpi me simba muntu yango. Yezu me zabisa yandi nde: “Mono me zola! Kuma bunkete.” (Matayo 8:3) Yo vandaka mpasi nde bantu ya nkaka kundima yo, maladi yai ya lepre me mana mbala mosi.

Keti nge ta zola ve nde Yezu kuvanda Ntotila na nge sambu yandi ke wilaka bantu mawa mpi yandi kele ti ngolo ya kusadisa bo? Mutindu yandi sadilaka muntu ya lepre mambu ke ndimisa beto nde ntangu yandi ta kuma Ntotila ya ntoto ya mvimba, mbikudulu yai ya Biblia ta lungana: “Yandi ta wila muntu ya kukonda mfunu mpi nsukami mawa, mpi yandi ta gulusa luzingu ya bansukami.” (Nkunga 72:13) Ya kieleka na ntangu yina, Yezu ta lungisa mpusa ya ntima na yandi ya kusadisa bantu yonso yina kele na mpasi.

Yibuka nde nkutu na ntwala nde Yezu kubelula muntu ya lepre, kisalu na yandi vandaka kupesa bantu kiese mingi. Ntangu yai, bantu ta wa nsangu ya kimangu yai ya yandi me katuka kusala. Kansi, Yezu ke zola ve nde bantu kukwikila na yandi kaka sambu na mambu yina bo ke wa. Yandi me zaba mbikudulu yina tubaka nde yandi ta “sala ve nde ndinga na yandi kuwakana na bala-bala,” disongidila kubenda dikebi ya bantu. (Yezaya 42:1, 2) Yo yina, Yezu me zabisa muntu ya lepre yina yandi me belula nde: “Keba! Kuzabisa ve ata muntu mosi, kansi kwenda kudimonisa na nganga-nzambi, mpi pesa dikabu yina Moize tulaka.”—Matayo 8:4.

Kansi muntu yai me wa kiese ya mingi, yo yina yandi me kuka ve kubumba mambu yina me katuka kusalama. Yandi me kwenda mpi me panza nsangu yango bisika yonso. Yo me benda dikebi ya bantu mingi sambu bo zaba mambu mingi. Yo yina, yo me kuma mpasi nde Yezu kukota na mbanza na meso ya bantu yonso. Yandi me kwenda sambu na mwa ntangu na bisika yina bantu kele ve. Ata mpidina, bantu ya bisika yonso ke kwisa sambu yandi longa bo mpi yandi belula bo.