Kwenda na mambu ke na kati

Kwenda na tansi ya malongi

 KAPU YA 27

Yezu Me Binga Matayo

Yezu Me Binga Matayo

MATAYO 9:9-13 MARKO 2:13-17 LUKA 5:27-32

  • YEZU ME BINGA MATAYO YA KELE KALAKI YA MPAKU

  • KRISTU KELE KISIKA MOSI TI BANSUMUKI SAMBU NA KUSADISA BO

Ntangu fioti na nima ya kubelula kikata, Yezu me bikala na Kapernaumi; yo kele pene-pene ya Nzadi ya Galilea. Bantu mingi me kwisa diaka kisika yandi kele, ebuna yandi me yantika kulonga bo. Ntangu Yezu ke tambula, yandi me mona Matayo, yina bo vandaka mpi kubinga Levi, yandi me vanda na biro yina bantu ke futaka mpaku. Yezu me songa yandi na kiese yonso nde: “Landa mono.”—Matayo 9:9.

Bonso Piere, Andre, Yakobo mpi Yoane, yo ke monana nde Matayo me yikana dezia ti malongi ya Yezu mpi bimangu yina yandi me katuka kusala na Kapernaumi. Matayo me ndima mbala mosi na kulanda Yezu mutindu balongoki yai ndimaka. Yandi ke tuba na Evanzile na yandi nde: “Ebuna yandi [Matayo] telamaka mpi landaka” Yezu. (Matayo 9:9) Kaka na ntangu yina, Matayo me yambula kisalu na yandi ya kalaki ya mpaku mpi me kuma longoki ya Yezu.

Na nima, Matayo sadisaka nkinsi ya nene na nzo na yandi, ziku sambu na kumonisa ntonda mutindu Yezu bingaka yandi. Katula Yezu ti balongoki na yandi, banani diaka Matayo me bingisa? Banduku na yandi ya ntama, disongidila bakalaki ya nkaka ya mpaku. Bo ke bakaka mpaku sambu na bamfumu ya Roma yina bantu ke mengaka. Bo ke bakaka mpi mpaku na bamaswa yina ke kwisa na mabungu, na bapusu-pusu yina ke luta na banzila ya nene mpi na bima yina bo ke sumba na babwala ya nkaka. Inki mutindu Bayuda ke tadilaka bakalaki yai ya mpaku? Bo ke mengaka bo sambu mbala mingi bo ke lombaka mbongo mingi kuluta mpaku yina nsiku ke lombaka. Na nkinsi yango, kele mpi ti ‘bansumuki,’ disongidila bantu yina ke salaka mambu ya mbi.—Luka 7:37-39.

Ntangu Bafarize yina ke kudimona bonso bantu ya lunungu me mona Yezu na feti ti bantu ya mutindu yina, bo me songa balongoki na yandi nde: “Sambu na nki longi na beno ke dia ti bakalaki ya mpaku mpi bansumuki?” (Matayo 9:11) Yezu me wa bo mpi yandi me songa bo nde: “Bantu yina kele na mavimpi ya mbote ke vandaka na mfunu ya munganga ve, kansi bayina kele na maladi bantu ke vandaka na mfunu na yandi. Yo yina, beno kwenda kulonguka disongidila ya mambu yai: ‘Mono ke zolaka mawa, kansi kimenga ve.’ Sambu mono kwisaka ve sambu na kubinga bantu ya lunungu, kansi bansumuki.” (Matayo 9:12, 13; Ozea 6:6) Bafarize kele ve masonga ntangu bo ke binga Yezu nde “longi,” ata mpidina bo lenda longuka mambu ya mbote na Yezu.

Ziku Matayo me bingisa bakalaki ya mpaku mpi bansumuki na nzo na yandi sambu bo widikila Yezu mpi bo beluka na kimpeve, “sambu bantu mingi na kati na bo vandaka kulanda yandi.” (Marko 2:15) Yezu vandaka ti luzolo ya kusadisa bo na kukuma ti bangwisana ya mbote ti Nzambi. Na kuswaswana ti Bafarize yina ke kudimonaka bantu ya lunungu, Yezu ke vwenza bo ve. Mawa me pusa yandi na kutudila bo dikebi ya mutindu yina, sambu yandi kele bonso munganga ya kimpeve ya bantu yonso yina ke bela na kimpeve.

Mawa yina Yezu me monisila bakalaki ya mpaku mpi bansumuki ke tendula ve nde yandi ke kanga meso na masumu na bo, kansi yo ke tendula nde yandi ke wila bo mawa mutindu munganga ke wilaka mbefo mawa. Mu mbandu, yibuka ntangu yandi simbaka muntu ya lepre na mawa yonso mpi tubaka nde: “Mono me zola! Kuma bunkete.” (Matayo 8:3) Beto mpi lenda wila bantu mawa mpi kusadisa bayina kele na mfunu ya lusadisu, mingi-mingi na kimpeve.