Kwenda na mambu ke na kati

Kwenda na tansi ya malongi

 KAPU YA 29

Keti Muntu Lenda Sala Mambu ya Mbote na Kisabatu?

Keti Muntu Lenda Sala Mambu ya Mbote na Kisabatu?

YOANE 5:1-16

  • YEZU ME SAMUNA NA YUDEA

  • YEZU ME BELULA MBEFO MOSI NA KIZIBA

Yezu salaka mambu mingi ntangu yandi salaka kisalu na yandi ya nene ya kulonga na Galilea. Kansi ntangu yandi tubaka nde, “mono fwete zabisa mpi nsangu ya mbote ya Kimfumu ya Nzambi na bambanza ya nkaka,” yandi vandaka kuyindula bambanza mingi ya nkaka katula Galilea. Yo yina, yandi me kwenda “kusamuna na basinagoga ya Yudea.” (Luka 4:43, 44) Yo kele ntangu ya mbote kibeni sambu nsungi ya madidi me kuma pene-pene mpi ntama mingi ve bo ta sala nkinsi mosi na Yeruzalemi.

Kana beto tadila mambu yina beto me tanga sambu na kisalu ya kulonga yina Yezu salaka na Galilea, Baevanzile ke tubila mambu fioti mpamba na yina me tala kisalu na yandi na Yudea. Ata bantu mingi ya Yudea ke tula ve dikebi na nsangu ya Yezu, yandi ke landa kaka kusamuna na kikesa yonso mpi kusala mambu ya mbote na konso kisika yina yandi kele.

Kubika fioti Yezu ke kwenda na Yeruzalemi, mbanza ya nene ya distrike ya Yudea, sambu na Paki ya mvu 31 ya ntangu na beto. Na kisika yina bantu ke vandaka mingi pene-pene ya Kielo ya Mameme, kele ti kiziba ya nene yina bo me ziungaka ti makunzi; bo ke bingaka kiziba yango nde Betzata. Bambefo, bifwa-meso mpi bantu ya makulu-kifu ke kwisaka na kiziba yai. Sambu na nki? Sambu bantu mingi ke ndimaka nde kana muntu me kota na kiziba yai ntangu masa ke nikana, yandi lenda beluka.

Yo kele Kisabatu mpi Yezu me mona mbefo mosi na kiziba yai, yandi ke belaka banda bamvula 38. Yezu me yula yandi nde: “Keti nge ke zola kubeluka?” Yandi me tuba nde: “Mfumu, mono kele ve ti muntu ya kutula mono na kiziba ntangu masa ke nikana, kansi na ntangu mono kele na nzila, muntu ya nkaka ke kulumuka na ntwala na mono.”—Yoane 5:6, 7.

Yezu me tuba kima mosi yina me yitukisa muntu yina mpi bantu ya nkaka yina me wa yo, yandi me tuba nde: “Telama! Baka mbeto na nge mpi tambula.” (Yoane 5:8) Yandi me sala kibeni mutindu yina. Na mbala mosi muntu yango me beluka, me baka mbeto na yandi mpi me yantika kutambula.

Na kisika ya kuwa kiese sambu na diambu ya mbote yina me katuka kusalama, Bayuda me mona muntu yina mpi me sambisa yandi nde: “Yo kele Kisabatu, mpi nsiku ke pesa nge ve nswa ya kunata mbeto.” Muntu yango me zabisa bo nde: “Muntu yina belulaka mono songaka mono nde, ‘Baka mbeto na nge mpi tambula.’” (Yoane 5:10, 11) Bayuda ke sambisa muntu yina bo me belula na Kisabatu.

Bayuda me yula yandi nde: “Nani songaka nge nde, ‘Baka yo mpi tambula’?” Sambu na nki bo ke yula yandi mutindu yina? Sambu Yezu “kotaka na kati ya kimvuka ya bantu” mpi muntu yina me beluka me zaba ve zina na yandi. (Yoane 5:12, 13) Kansi muntu yai ta kutana diaka ti Yezu. Na nima, muntu yango me kutana ti Yezu na tempelo mpi yandi me zaba zina ya muntu yina belulaka yandi na kiziba ya masa.

Muntu yango me mona Bayuda yina yulaka yandi mutindu yandi belukaka. Yandi me songa bo nde Yezu muntu belulaka yandi. Ntangu bo me wa mpidina, bo me kwenda kusosa Yezu. Keti bo me kwenda sambu na kuzaba kana Yezu ke sala mambu yina ya kuyituka na ngolo ya nani? Ve. Bo ke sosa kumonisa nde Yezu me sala kifu mutindu yandi ke sala mambu ya mbote na Kisabatu. Mpi nkutu, bo me yantika kumonisa yandi mpasi.