Kwenda na mambu ke na kati

Kwenda na tansi ya malongi

 KAPU YA 41

Yezu Ke Sala Bimangu na Ngolo ya Nani?

Yezu Ke Sala Bimangu na Ngolo ya Nani?

MATAYO 12:22-32 MARKO 3:19-30 LUKA 8:1-3

  • YEZU ME TAMBULA DIAKA NA GALILEA YA MVIMBA SAMBU NA KULONGA

  • YEZU ME BASISA BADEMO MPI ME KEBISA SAMBU NA DISUMU YINA NZAMBI TA LOLULA VE

Yezu me katuka kutubila kulolula na nzo ya Mufarize mosi na zina ya Simoni; ntangu fioti na nima, yandi me tambula diaka na Galilea ya mvimba sambu na kulonga. Yandi kele na mvula ya zole ya kisalu na yandi ya kulonga mpi yandi kele ve yandi mosi. Yandi kele ti bantumwa 12, mpi bankento ya nkaka yina yandi ‘belulaka na bampeve ya mbi mpi na bamaladi.’ (Luka 8:2) Na kati ya bankento yango, beto lenda tanga Maria Magdala, Suzane, ti Yoana yina bakala na yandi kele nsadi ya ntotila Erode Antipasi.

Mutindu bantu mingi ke wa mambu ya me tala Yezu, ntembe na yina me tala kisalu na yandi ke kuma mpi ngolo. Yo me monana pwelele ntangu bo me natila Yezu muntu mosi yina kele ti demo, yandi kele kifwa-meso mpi baba, ebuna Yezu me belula yandi. Ntangu yai, muntu yango kele diaka ve na kimpika ya bademo; yandi ke mona mpi ke tuba. Bantu me yituka mpi me tuba nde: “Keti muntu yai lenda vanda ve Mwana ya Davidi?”—Matayo 12:23.

Bimvuka ya bantu me kwisa na nzo yina Yezu kele, yo yina Yezu ti balongoki na yandi ke zwa ve ntangu ya kudia. Kansi, bantu yonso ve ke yindula nde Yezu kele “Mwana ya Davidi” yina Nzambi silaka. Bansekudi ti Bafarize me katuka na Yeruzalemi mpi me kwisa, kansi bo me kwisa ve sambu na kulonguka mambu ya Yezu to sambu na kupesa yandi maboko na kisalu na yandi. Bo ke zabisa bantu nde: “Yandi kele ti Belezebule” disongidila nde yandi ke sala kisalu ti “mfumu ya bademo.” (Marko 3:22) Ntangu bampangi ya Yezu me wa mambu yina bantu ke tuba sambu na yandi, bo me kwisa kukanga yandi. Sambu na nki?

Tii ntangu yai, bampangi ya Yezu ke ndima ve nde yandi kele mwana ya Nzambi. (Yoane 7:5) Yo ke monana nde, Yezu yina bantu mingi ke tudila ntembe me swaswana ti Yezu yina bo zabaka ntangu bo vandaka kuyela na Nazareti. Sambu bo ke mona nde kima mosi ke kwendila ve na mabanza na yandi, bo me tuba nde: “Yandi me bela kilawu.”—Marko 3:21.

 Kansi, diambu yai ke monisa nki? Yezu me katuka kubelula muntu mosi yina vandaka ti bademo, ntangu yai muntu yango ke mona mpi ke tuba. Ata muntu mosi ve lenda buya yo. Kansi bansekudi ti Bafarize ke tuba mambu ya luvunu sambu na kusosa kubebisa lukumu ya Yezu. Bo me tuba nde: “Muntu yai ke basisa bademo kaka na nsadisa ya Belezebule, mfumu ya bademo.”—Matayo 12:24.

Sambu Yezu me zaba mambu yina bansekudi ti Bafarize ke yindula, yandi me tubila bo nde: “Konso kimfumu yina kele ya kukabwana na kati na yo ke fwaka, mpi konso mbanza to nzo yina kele ya kukabwana na kati na yo ta zinga ve. Mutindu mosi, kana Satana ke basisa Satana, yandi me kabwana na kati na yandi; ebuna nki mutindu kimfumu na yandi ta zinga?”—Matayo 12:25, 26.

Yezu me tendula mambu na mutindu ya mbote kibeni! Bafarize me zaba nde Bayuda ya nkaka ke basisaka bademo. (Bisalu 19:13) Yo yina, Yezu me yula bo nde: “Kana mono ke basisa bademo na nsadisa ya Belezebule, ebuna bana na beno ke basisaka bo na nsadisa ya nani?” Na kutuba ya nkaka, diambu yina bo ke fundila yandi ke lungana na bo mosi. Na nima, Yezu me tuba nde: “Kansi, kana mono ke basisaka bademo na nsadisa ya mpeve ya Nzambi, yo ke songa nde Kimfumu ya Nzambi me kumina beno na kintulumukina.”—Matayo 12:27, 28.

Sambu na kumonisa nde yandi kele ngolo kuluta Satana mutindu yandi ke basisa bademo, Yezu me pesa mbandu mosi; yandi me tuba nde: “Nki mutindu muntu lenda kota na ngolo na nzo ya muntu mosi ya ngolo mpi kubaka bima na yandi kana yandi kanga ntete ve muntu yina ya ngolo bansinga? Yandi lenda yiba bima ya nzo na yandi kaka kana yandi sala mutindu yina. Konso muntu yina kele ve na lweka na mono kele mbeni na mono, mpi konso muntu yina ke vukisa ve ti mono ke panza.” (Matayo 12:29, 30) Bansekudi ti Bafarize kele kibeni bambeni ya Yezu, yo ke monisa nde bo kele bantu ya Satana. Bo ke panza bantu sambu na kukabula bo ti mwana ya Nzambi, yina ke sala bimangu na ngolo ya Yehowa.

Yezu me kebisa bantu yai ya kele na lweka ya Satana nde: “Nzambi ta lolula mambu yonso ya bana ya bantu, ata bo sala masumu ya nki mutindu mpi bo tuba mambu ya kuvweza ya nki mutindu. Kansi, muntu yina ke vweza mpeve santu, bo ta lolula yandi ve kimakulu kansi yandi me sala disumu ya mvula na mvula.” (Marko 3:28, 29) Yindula ntendula ya mambu yai sambu na bantu yina ke tuba nde mambu yina Yezu ke sala kibeni na ngolo ya mpeve ya Nzambi, yandi ke sala yo na ngolo ya Satana.