Kwenda na mambu ke na kati

Kwenda na tansi ya malongi

 KAPU YA 32

Inki Mambu Nsiku Ke Pesa Nzila na Kusala na Kisabatu?

Inki Mambu Nsiku Ke Pesa Nzila na Kusala na Kisabatu?

MATAYO 12:9-14 MARKO 3:1-6 LUKA 6:6-11

  • YEZU ME BELULA DIBOKO YA MUNTU MOSI NA KISABATU

Na kilumbu ya nkaka ya Kisabatu, Yezu me kwenda na sinagoga mosi, ziku na Galilea. Kuna yandi me mona muntu mosi yina diboko na yandi ya kitata kele ya kuyuma. (Luka 6:6) Bansekudi mpi Bafarize ke tala Yezu na dikebi yonso. Sambu na nki? Bo me monisa pwelele bangindu na bo ntangu bo me yula yandi nde: “Keti nsiku ke pesa nswa ya kubelula muntu na Kisabatu?”—Matayo 12:10.

Bamfumu ya dibundu ya Bayuda vandaka kundima nde nsiku vandaka kupesa nswa ya kubelula muntu na Kisabatu kaka kana luzingu na yandi kele na kigonsa. Mu mbandu, kana muntu me sansa mukwa ya muntu yina me bukana to me tula bande na mputa na Kisabatu, yandi me fwa nsiku sambu mambu yina ke tulaka ve luzingu ya muntu na kigonsa. Ya kieleka, bansekudi mpi Bafarize ke sambisa ve Yezu sambu bo ke wila muntu yai ya ke bela mawa kibeni. Kansi, bo ke sosa kikuma ya kubedisa Yezu.

Yezu me zaba bangindu na bo ya mbi. Yandi me bakisa nde bangindu na bo me katuka ve na Masonuku mpi bo ke lutisa ndilu ntangu bo ke tuba nde muntu yina me sala kisalu na kilumbu ya Kisabatu me fwa nsiku. (Kubasika 20:8-10) Yandi me zaba nde yo kele ve mbala ya ntete yina bo ke sambisa yandi sambu na mambu ya mbote yina yandi ke sala. Ntangu yai Yezu me sala diambu mosi yina lenda pesa bo makasi ya mingi; yandi me zabisa muntu yina kele ti diboko ya kuyuma nde: “Telama mpi kwisa awa na kati-kati.”—Marko 3:3.

Yezu me tala bansekudi ti Bafarize mpi me yula bo nde: “Kana beno kele ti dimeme mosi ebuna dimeme yina kubwa na dibulu na Kisabatu, keti kele ti muntu mosi na kati na beno yina ta kwenda ve kubaka yo mpi kubasisa yo?” (Matayo 12:11) Kana muntu kele ti dimeme, yo kele bonso nde yandi kele ti mbongo yina yandi me bumba, yo yina yandi ta bika yo ve na dibulu tii na kilumbu ya kulanda. Yo lenda fwa mpi yo ta vanda bonso nde yandi me bebisa mbongo na yandi. Diaka, Biblia ke tuba nde: “Muntu ya lunungu ke kebaka bambisi na yandi ya bwala.”—Bingana 12:10.

Yezu me tuba mambu yai ya me fwanana ti yina ya ntete: “Muntu kele mfunu mingi kuluta dimeme! Yo yina, nsiku ke pesa nswa ya kusala diambu ya mbote na Kisabatu.” (Matayo 12:12) Ya kieleka, Yezu me fwa ve nsiku ya Kisabatu mutindu yandi me belula muntu yina. Bamfumu ya dibundu ya Bayuda lenda buya ve bangindu ya mbote yina Yezu me sadila ya ke monisa mawa. Bo me bikala kaka pima.

Ti makasi yonso mpi mawa sambu na bangindu na bo ya mbi, Yezu me baluka na muntu yina kele ti diboko ya kuyuma. Na nima yandi me zabisa yandi nde: “Tandula diboko na nge.” (Matayo 12:13) Ntangu muntu yina me tandula diboko yina ya kuyuma, yo me kuma diaka mbote. Yo me pesa muntu yango kiese. Kansi, bantu yina ke sosa kukanga Yezu na mutambu me wa nki mutindu?

Na kisika ya kuwa kiese mutindu diboko ya muntu yina me kuma diaka mbote, Bafarize me basika mpi na mbala mosi bo me wakana “ti bantu ya Erode sambu na kufwa [Yezu].” (Marko 3:6) Basaduse mpi vandaka na kati ya bantu yina wakanaka na kufwa Yezu. Na kutuba masonga, Basaduse ti Bafarize ke wakanaka ve, kansi ntangu yai bo me wakana sambu na kunwanisa Yezu.