Kwenda na mambu ke na kati

Kwenda na tansi ya malongi

 KAPU YA 28

Sambu na Nki Balongoki ya Yezu Vandaka Ve Kubuya Madia?

Sambu na Nki Balongoki ya Yezu Vandaka Ve Kubuya Madia?

MATAYO 9:14-17 MARKO 2:18-22 LUKA 5:33-39

  • BALONGOKI YA YOANE ME YULA YEZU NA YINA ME TALA KUBUYA MADIA

Yoane Mbotiki me sala dezia mwa ntangu na boloko. Na nima, Yezu me sala nkinsi ya Paki na mvu 30 ya ntangu na beto. Yoane zolaka nde balongoki na yandi kukuma balongoki ya Yezu; kansi mwa bangonda na nima ntangu yandi me kota boloko, balongoki na yandi ya nkaka me yambula kulanda Yezu.

Ntangu yai Paki ya mvu 31 ya ntangu na beto me kuma pene-pene. Balongoki ya nkaka ya Yoane me kwisa na Yezu mpi bo me yula yandi nde: “Sambu na nki beto ti Bafarize kele ti kikalulu ya kubuya madia, kansi balongoki na nge ke buyaka ve madia?” (Matayo 9:14) Bafarize kele ti kikalulu ya kubuya madia sambu yo kele nsiku ya dibundu na bo. Nkutu na nima, Yezu tubilaka mbandu ya Mufarize mosi yina vandaka kudimona muntu ya lunungu; Mufarize yango sambaka nde: “O Nzambi, mono ke tonda nge sambu mono kele ve bonso bantu yonso ya nkaka. . . . Mono ke buyaka madia mbala zole konso mposo.” (Luka 18:11, 12) Ziku balongoki ya Yoane vandaka mpi ti kikalulu ya kubuya madia. To bo vandaka kubuya madia sambu na kumonisa mawa yina bo vandaka ti yo mutindu bo tulaka Yoane na boloko. Balongoki ya Yoane kudiyulaka mpi sambu na nki balongoki ya Yezu vandaka ve kubuya madia, ziku sambu na kumonisa nde bo kele na mawa sambu na mambu yina kuminaka Yoane.

Sambu na kupesa mvutu, Yezu me sadila mbandu mosi; yandi me tuba nde: “Keti banduku ya bakala yina ke kwela kele ti kikuma ya kuvanda na mawa ntangu bakala yina ke kwela kele ti bo? Kansi bilumbu ta kwisa ntangu bo ta katula bakala yina ke kwela na kati na bo, ebuna bo ta buya madia.”—Matayo 9:15.

Yoane yandi mosi ke binga Yezu bakala yina ke kwela. (Yoane 3:28, 29) Yo yina, ntangu Yezu kele ti balongoki na yandi, bo kele ve na mfunu ya kubuya madia. Na nima, ntangu Yezu ta fwa, balongoki na yandi ta vanda na mawa mpi bo ta buya madia. Kansi ntangu yandi ta futumuka, mambu ta soba kibeni. Na ntangu yina, bo ta vanda diaka ve ti kikuma ya kuwa mawa mpi ya kubuya madia.

Na nima Yezu me pesa bambandu yai zole: “Muntu mosi ve ke tungaka kitende ya lele ya mpa na zulu ya lele ya ntama, sambu kitende ya mpa ta benda lele ya ntama, ebuna yo ta pasuka diaka nene. Bantu ke tulaka mpi ve vinu ya mpa na mabungu ya ntama. Kana bo sala mpidina, mabungu ta pasuka mpi vinu ta tiamuka ebuna mabungu yina ta beba. Kansi bantu ke tulaka vinu ya mpa na mabungu ya mpa.” (Matayo 9:16, 17) Yezu ke zola kutuba nki?

Yezu ke zola kusadisa balongoki ya Yoane Mbotiki na kubakisa nde ata muntu mosi ve fwete vingila nde balongoki ya Yezu kulanda bikalulu ya ntama ya Bayuda, mu mbandu kubuya madia. Yandi me kwisa ve sambu na kutunga mpi kutanina lusambu mosi ya ntama, disongidila lusambu yina me manaka ngala to ngidika ya lusambu yina zolaka kuvila ntama mingi ve. Lusambu yina Yezu ke siamisa kele ve lusambu yina kele na kuwakana ti dibundu ya Bayuda ya ntangu yina mpi bikalulu na yo ya me katuka na bantu. Yandi ke sosa mpi ve kutunga lele ya mpa na zulu ya lele ya ntama to kutula vinu ya mpa na mabungu ya ntama yina kele diaka ngolo ve.