Kwenda na mambu ke na kati

Kwenda na tansi ya malongi

 DILONGI YA 4

Yezu Kristu Kele Nani?

Yezu Kristu Kele Nani?

1. Luzingu ya Yezu kuyantikaka nki mutindu?

Inki bikalulu ya Yezu sadisaka bantu na kusolula ti yandi kukonda mpasi?—MATAYO 11:29; MARKO 10:13-16.

Na kuswaswana ti bantu yonso yankaka, Yezu zingaka na zulu bonso kigangwa ya kimpeve na ntwala ya kubutuka na ntoto. (Yoane 8:23) Yezu vandaka kigangwa ya ntete ya Nzambi mpi yandi sadisaka Nzambi na kuganga bima yonso yankaka. Yandi kele kigangwa mosi kaka yina Yehowa kugangaka na maboko na yandi mosi, mpi yo yina Biblia kebingaka yandi ‘Mwana mosi kaka ya kubutuka’ ya Nzambi. (Yoane 1:14) Yezu kusalaka bonso Kinati-Ndinga ya Nzambi, yo yina Biblia kebingaka yandi mpi “Ndinga.”Tanga Bingana 8:22, 23, 30; Bakolosai 1:15, 16.

2. Sambu na nki Yezu kukwisaka na ntoto?

Nzambi kutindaka Mwana na yandi na ntoto na kutulaka luzingu na yandi na divumu ya mwense mosi ya Muyuda na zina ya Maria. Yo yina Yezu vandaka ve ti tata ya kinsuni. (Luka 1:30-35) Yezu kwisaka na ntoto (1) sambu na kulonga kyeleka ya metala Nzambi, (2) sambu na kupesa mbandu na yina metala kusala luzolo ya Nzambi ata ntangu beto ke na mpasi, mpi (3) sambu na kupesa luzingu na yandi ya kukuka bonso nkudulu.Tanga Matayo 20:28.

3. Sambu na nki beto kele na mfunu ya nkudulu?

Nkudulu kele ntalu yina bo kefutaka sambu na kugulusa muntu mosi na kigonsa ya lufwa. (Kubasika 21:29, 30) Lufwa mpi kimununu vandaka ve na lukanu ya Nzambi sambu na bantu. Inki mutindu beto mezaba yo? Nzambi songaka Adami, muntu ya ntete nde kana yandi sala dyambu yina Biblia kebingaka ‘disumu,’ yandi tafwa. Yo yina, kana Adami kusalaka ve disumu, yandi zolaka kufwa ve. (Kuyantika 2:16, 17; 5:5) Na kutadila Biblia, lufwa “me kotaka” na ntoto ya mvimba na nzila ya Adami. Yo yina, Adami mebikilaka bana na yandi yonso disumu mpi ndola na yo lufwa. Beto kele na mfunu ya nkudulu  sambu yo katula beto na ndola ya lufwa yina beto mebakaka na Adami.Tanga Baroma 5:12; 6:23.

Nani lendaka kufuta nkudulu sambu na kukatula beto na lufwa? Ntangu beto kefwaka, beto kefutaka kaka ndola ya masumu na beto mosi. Ata muntu mosi ve ya kukonda kukuka lenda futa ndola ya masumu ya bantu yankaka.Tanga Nkunga 49:8-10.

4. Sambu na nki Yezu kufwaka?

Na kuswaswana ti beto, Yezu vandaka muntu ya kukuka. Yo yina, yandi fwaka ve sambu na masumu na yandi—yandi salaka ata disumu mosi ve. Kansi yandi fwaka sambu na masumu ya bantu yankaka. Nzambi monisaka zola na yandi ya kuluta nene sambu na bantu ntangu yandi tindaka Mwana na yandi na kufwa sambu na beto. Yezu mpi kumonisaka zola sambu na beto mutindu yandi lemfukilaka Tata na yandi mpi kupesaka luzingu na yandi sambu na masumu na beto.Tanga Yoane 3:16; Baroma 5:18, 19.

5. Inki Yezu kesala ntangu yai?

Ntangu Yezu vandaka na ntoto, yandi belulaka bambefo, futumunaka bafwa, mpi kugulusaka bantu yina vandaka na mpasi. Mpidina yandi monisaka mambu yina yandi tasala na makwisa sambu na bantu yonso ya bulemfu. (Matayo 15:30, 31; Yoane 5:28) Na nima ya lufwa ya Yezu, Nzambi futumunaka yandi na nitu ya kimpeve. (1 Piere 3:18) Na nima, Yezu kuvingilaka na diboko ya kitata ya Nzambi tii ntangu Yehowa pesaka yandi kiyeka ya kuyala bonso Ntotila na ntoto ya mvimba. (Baebreo 10:12, 13) Ntangu yai Yezu ke na kuyala bonso Ntotila na zulu, mpi balongoki na yandi ke na kulonga nsangu yai ya mbote na nsi-ntoto ya mvimba.Tanga Daniele 7:13, 14; Matayo 24:14.

Kubika fyoti, Yezu tasadila kiyeka na yandi bonso Ntotila sambu na kumanisa bampasi yonso mpi kufwa bantu yina kele na kisina na yo. Bantu yonso yina kemonisa lukwikilu na Yezu na kulemfukilaka yandi tazinga na paladisu ya ntoto.Tanga Nkunga 37:9-11.