Kwenda na mambu ke na kati

Kwenda na tansi ya malongi

 DILONGI YA 2

Nzambi kele nani?

Nzambi kele nani?

1. Sambu na nki beto fwete sambila Nzambi?

Nzambi ya kyeleka kele Ngangi ya bima yonso. Yandi kele ti luyantiku ve mpi yandi tavanda ti nsuka ve ata fyoti. (Nkunga 90:2) Yandi kele Nto ya nsangu ya mbote yina kele na Biblia. (1 Timoteo 1:11) Beto fwete sambila kaka Nzambi sambu yandi mepesaka beto luzingu.—Tanga Kusonga 4:11.

2. Nzambi kele nki mutindu?

Ata muntu mosi ve memonaka Nzambi, sambu yandi kele Mpeve, disongidila nde yandi kele na mutindu ya luzingu yina meluta bigangwa ya kinsuni ya kezingaka na ntoto. (Yoane 1:18; 4:24) Ata mpidina, beto lenda bakisa kimuntu ya Nzambi na bima yina yandi megangaka. Mu mbandu, bambuma mpi bintuntu ya mutindu na mutindu kemonisaka beto zola mpi mayele na yandi. Bunene ya luyalanganu kesongaka beto ngolo na yandi.—Tanga Baroma 1:20.

Nkutu, kana beto ketanga Biblia beto lenda longuka mambu mingi na yina metala kimuntu ya Nzambi. Mu mbandu, Biblia kezabisaka beto mambu yina Nzambi kezolaka mpi yina yandi kezolaka ve, mutindu yandi kesadilaka bantu mambu, mpi mutindu yandi kewaka ntangu beto kesalaka mambu na ntangu mosi buna.—Tanga Nkunga 103:7-10.

3. Keti Nzambi kele ti zina?

Yezu tubaka nde: “Tata na beto yina kele na zulu, bika nde zina na nge kusantisama.” (Matayo 6:9) Ata Nzambi kele ti batitre mingi, yandi kele kaka ti zina mosi. Konso ndinga kele ti mutindu yina yo kebingaka zina yango. Mbala mingi, na Kikongo beto kebingaka yo “Yehowa.” Kansi bantu yankaka kebingaka yo “Yawe.”—Tanga Nkunga 83:18, NW.

Babiblia mingi mekatulaka zina ya Nzambi mpi meyingisaka yo na batitre bonso Mfumu to Nzambi. Kansi, ntangu bo sonikaka Biblia, zina ya Nzambi kuvandaka bambala kiteso ya 7 000. Yezu kuzabisaka zina ya Nzambi ntangu yandi longaka bantu mambu ya metala Nzambi.—Tanga Yoane 17:26.

 4. Keti Yehowa kekudibanzaka sambu na beto?

Bonso tata yai ya zola, Nzambi kesalaka mambu sambu na mambote na beto ya mvula na mvula

Keti mutindu bantu mingi kemona mpasi ketendula nde Yehowa kele Nzambi yina kekudibanzaka ve sambu na beto? Bantu yankaka ketubaka nde, yandi kemonisaka beto mpasi sambu na kumeka beto, kansi yo kele ve kyeleka.—Tanga Yakobo 1:13.

Nzambi mepesaka bantu lukumu na mutindu yandi mepesaka bo kimpwanza ya kupona mambu. Keti beto kesepelaka ve na kimpwanza yina beto kele na yo ya kupona kusadila Nzambi? (Yozue 24:15) Ata mpidina, bantu mingi meponaka kusadila bantu yankaka mambu ya mbi; yo yina bampasi kekuma kaka mingi. Yehowa kewaka mpasi ntangu yandi kemonaka kukonda lunungu ya mutindu yina.—Tanga Kuyantika 6:5, 6.

Yehowa kele Nzambi yina kekudibanzaka sambu na beto. Yandi kezolaka nde beto sepela na luzingu. Ntama mingi ve, yandi tamanisa bampasi mpi tafwa bantu yina kele na kisina na yo. Kansi na ntwala ya kusala mpidina, yandi kele ti kikuma ya mbote ya kupesa nzila na bampasi sambu na mwa ntangu. Na Dilongi ya 8, beto tazaba kikuma yango.—Tanga 2 Piere 2:9; 3:7, 13.

5. Inki mutindu beto lenda kwenda penepene na Nzambi?

Yehowa kelomba beto na kukwenda penepene na yandi na kusolulaka ti yandi na kisambu. Yandi kesepelaka na konso muntu na kati na beto. (Nkunga 65:3; 145:18) Yandi kelolulaka beto na luzolo yonso. Ata bantangu yankaka beto kesalaka bifu, yandi kemonaka bikesa yina beto kesalaka sambu na kusepedisa yandi. Yo yina, ata beto kele bantu ya kukonda kukuka beto lenda vanda na bangwisana ya ngolo ti Nzambi.—Tanga Nkunga 103:12-14; Yakobo 4:8.

Sambu Yehowa mepesaka beto luzingu, beto fwete zola yandi mingi kuluta bantu yonso. (Marko 12:30) Kana nge kemonisa nde nge kezolaka Nzambi na mutindu nge kelonguka mambu mingi ya metala yandi mpi kesala mambu yina yandi kelomba nge na kusala, nge takwenda penepene na yandi.—Tanga 1 Timoteo 2:4; 1 Yoane 5:3.