Kwenda na mambu ke na kati

Kwenda na tansi ya malongi

 DILONGI YA 13

Inki Kele Nsangu ya Mbote na Yina Metala Mabundu?

Inki Kele Nsangu ya Mbote na Yina Metala Mabundu?

1. Keti mabundu yonso kele ya mbote?

Bantu ya ntima-masonga kele na mabundu yonso. Yo kele nsangu ya mbote na kuzaba nde Nzambi kemonaka bantu yina mpi nde yandi kekudibanza-banzaka sambu na bo. Yo kele mpasi na kumona nde, bantu mesadilaka mabundu sambu na balukanu ya mbi. (2 Bakorinto 4:3, 4; 11:13-15) Bansangu yina baradio, batelevizio, mpi bazulunalu kepesa kemonisa nde mabundu yankaka mekotaka nkutu na mambu ya terorizme, kufwa na nku bantu mingi na mbala mosi, bitumba, mpi kuladisa bana ya fyoti na kingolongolo. Dyambu yai kepesaka mpenza mpasi na bantu yina kekwikilaka na Nzambi na masonga yonso!Tanga Matayo 24:3-5, 11, 12.

Dibundu ya kyeleka kekumisaka Nzambi, kansi ya luvunu kevwezaka yandi. Bo kelongaka bangindu yina kele ve na Biblia, bo keyikaka malongi ya luvunu na yina metala Nzambi mpi bafwa. Kansi Yehowa kezolaka nde bantu kuzaba kyeleka na yina metala yandi.Tanga Ezekiele 18:4; 1 Timoteo 2:3-5.

2. Inki kele nsangu ya mbote na yina metala mabundu?

Yo kele kyese na kuzaba nde, mabundu yina ketubaka kaka na munoko nde bo kezolaka Nzambi kansi na kutuba ya masonga bo kezolaka nsi-ntoto ya Satana, takusa Nzambi ve. (Yakobo 4:4) Ndinga ya Nzambi kebingaka mabundu yina yonso ya luvunu, “Babilone ya Nene.” Babilone vandaka mbanza ya ntama kisika lusambu ya luvunu kuyantikaka na nima ya Mvula ya Ngolo ya bilumbu Noa. Ntama mingi ve, Nzambi tafwa na kintulumukina mabundu yina kekusaka mpi kenyokulaka bantu.Tanga Kusonga 17:1, 2, 5, 16, 17; 18:8.

Bansangu ya mbote kele mingi. Yehowa mevilaka ve bantu ya ntima-masonga yina kele na kati ya mabundu ya luvunu na nsi-ntoto ya mvimba. Nzambi kevukisaka bantu ya mutindu yina na kulongaka bo kyeleka.Tanga Mishe 4:2, 5.

 3. Bantu ya ntima-masonga fwete sala nki?

Dibundu ya kyeleka kevukisaka bantu

Yehowa kekudibanza-banzaka sambu na bantu yina kezolaka mambu ya kyeleka mpi ya mbote. Yandi kesyamisa bo na kubasika na mabundu ya luvunu. Bantu yina kezolaka Nzambi kesalaka bansoba na luzolo yonso sambu na kusepedisa yandi.Tanga Kusonga 18:4.

Na mvu-nkama ya ntete, ntangu bantu ya ntima ya masonga waka nsangu ya mbote yina bantumwa vandaka kulonga, bo ndimaka yo na kyese. Yehowa zabisaka bo mutindu ya mpa ya kuzinga, mutindu ya kuzinga na kyese, ya kele ti lukanu mpi kivuvu. Bo kele bambandu ya mbote sambu na beto bubu yai na mpila bo ndimaka nsangu ya mbote na kutulaka Yehowa na kisika ya ntete na luzingu na bo.Tanga 1 Batesalonika 1:8, 9; 2:13.

Yehowa kendimaka na dibuta na yandi ya bansambidi bantu yina kebasikaka na mabundu ya luvunu. Kana nge ndima emvitasio ya Yehowa, nge takuma nduku na yandi, nge takota na dibuta mosi ya mpa mpi ya zola ya bansambidi ya Yehowa, mpi nge tabaka luzingu ya mvula na mvula.Tanga Marko 10:29, 30; 2 Bakorinto 6:17, 18.

4. Inki mutindu Nzambi takotisa kyese na bansi yonso?

Lusambisu ya mabundu ya luvunu yina kekwisa kele nsangu ya mbote. Yo takatula bantu ya nsi-ntoto ya mvimba na mpasi. Mabundu ya luvunu takusa dyaka bantu ve mpi takabula bo dyaka ve. Bantu yonso tasamba na bumosi Nzambi mosi kaka ya kyeleka.Tanga Kusonga 18:20, 21; 21:3, 4.