Kwenda na mambu ke na kati

Kwenda na tansi ya malongi

 DILONGI YA 1

Nsangu ya mbote kele nki?

Nsangu ya mbote kele nki?

1. Inki kele nsangu ya mekatuka na Nzambi?

Nzambi kezolaka nde bantu kuzinga na kyese na nsi-ntoto. Yandi salaka ntoto mpi bima yonso yina kele na kati na yo sambu yandi kezolaka bantu. Kubika fyoti, yandi tasala na mpila nde bantu yonso ya nsi-ntoto kuvanda ti makwisa mosi ya kitoko. Yandi takatula mambu yonso yina kevandaka na kisina ya bampasi ya bantu.—Tanga Yeremia 29:11.

Ata luyalu mosi ve menungaka na kumanisa mubulu, maladi, to lufwa. Kansi nsangu ya mbote kele nde, kubika fyoti luyalu ya Nzambi tayinga baluyalu yonso ya bantu. Bantu ya luyalu yango tavanda na ngemba mpi na mavimpi ya mbote.—Tanga Yezaya 25:8; 33:24; Daniele 2:44.

2. Sambu na nki nsangu ya mbote kele mfunu?

Bampasi tamana kaka ntangu Nzambi takatula bantu ya mbi na ntoto. (Sofonia 2:3) Yo tasalama nki ntangu? Ndinga ya Nzambi tubilaka na ntwala mambu yina kenyokula bantu bubu yai. Mambu ya mbi ya kesalama na nsi-ntoto kemonisa nde ntangu yina Nzambi tamanisa bampasi mefinama.—Tanga 2 Timoteo 3:1-5.

3. Inki beto fwete sala?

Beto fwete longuka mambu ya Nzambi na Biblia, Ndinga na yandi. Yo kele bonso mukanda yina tata mosi ya zola metindila beto. Yo kezabisaka beto mutindu beto lenda vanda na luzingu ya mbote bubu yai mpi mutindu beto lenda baka luzingu ya mvula na mvula na makwisa. Ya kyeleka, bantu yankaka lenda sepela ve na kumona nde Bambangi ya Yehowa kesadisa nge na kubakisa Biblia. Kansi sambu Nzambi kesila nde beto lenda vanda na makwisa ya mbote, beto fwete bika ve nde bantu yankaka kukanga beto nzila na kulonguka mambu yina.—Tanga Bingana 29:25; Kusonga 14:6, 7.