Ngangi na beto kele mayele mingi kuluta beto. Sambu yandi kele Tata na beto ya zola, yandi kekudibanzaka sambu na beto. Dyaka, yandi kevingilaka ve nde beto kuditwadisa. (Yeremia 10:23) Kaka mutindu mwana kevandaka na mfunu ya lutwadisu ya bibuti, beto yonso kele na mfunu ya lutwadisu ya Nzambi. (Yezaya 48:17, 18) Minsiku ya Biblia kepesaka lutwadisu yina kele dikabu ya mekatuka na Nzambi.—Tanga 2 Timoteo 3:16.

Bansiku mpi minsiku ya Yehowa kelongaka beto mutindu ya mbote ya kuzinga ntangu yai mpi yo kemonisaka mutindu beto lenda baka mambote ya kimakulu na bilumbu kekwisa. Sambu Nzambi megangaka beto, yo mefwana mpenza nde beto ndima lutwadisu na yandi.—Tanga Nkunga 19:8, 12; Kusonga 4:11.

Minsiku ya Nzambi kele bakyeleka ya mfunu. Kansi bansiku, bo lenda sadila yo na mambu ya sikisiki. (Kulonga 22:8) Beto fwete sadila makuki ya kuyindula mbote sambu na kubakisa mutindu beto lenda sadila munsiku mosi na dyambu mosi buna. (Bingana 2:10-12) Mu mbandu, Biblia kelongaka nde luzingu kele dikabu yina mekatuka na Nzambi. Munsiku yai ya mfunu lenda twadisa beto na kisalu, na nzo, mpi ntangu beto kesala banzyetelo. Yo kepusaka beto na kubaka bangidika sambu na kutula ve luzingu na beto mosi mpi ya bantu yankaka na kigonsa.—Tanga Bisalu 17:28.

Yezu tubilaka bansiku zole ya mfunu mingi. Munsiku ya ntete kemonisa mbote-mbote lukanu ya luzingu ya bantu—kuzaba Nzambi, kuzola yandi, mpi kusadila yandi na kwikama yonso. Ntangu yonso yina beto kebaka badesizio, beto fwete sadila munsiku yai ya ntete. (Bingana 3:6) Bantu yonso yina kezingaka na kuwakana ti munsiku yai kekumaka  banduku ya Nzambi, kevandaka na kyese ya kyeleka mpi tabaka luzingu ya mvula na mvula.—Tanga Matayo 22:36-38.

Munsiku ya zole lenda sadisa beto na kuvanda ti bangwisana ya ngemba ti bankaka. (1 Bakorinto 13:4-7) Kusadila munsiku yai ya zole ketendula kulanda mbandu ya Nzambi na mutindu yina yandi kesadilaka bantu mambu.—Tanga Matayo 7:12; 22:39, 40.

Minsiku ya Nzambi kelongaka mabuta mutindu ya kuzinga na bumosi mpi na zola. (Bakolosai 3:12-14) Ndinga ya Nzambi ketaninaka mpi mabuta ntangu yo kelongaka munsiku yai yankaka—makwela fwete zinga kimakulu.—Tanga Kuyantika 2:24.

Kulanda minsiku ya Biblia lenda tanina mawi na beto mpi mambote na beto ya kinsuni. Mu mbandu, mbala mingi bamfumu ya kisalu kezolaka bansadi yina kezingaka na kuwakana ti minsiku ya Biblia na yina metala kuvanda masonga mpi kusala ngolo. (Bingana 10:4, 26; Baebreo 13:18) Ndinga ya Nzambi kelongaka beto mpi na kusepela ti bima yina beto kele na yo ya kele mfunu mpi kubaka na mbalu bangwisana na beto ti Nzambi kuluta bima ya kinsuni.—Tanga Matayo 6:24, 25, 33; 1 Timoteo 6:8-10.

Kusadila minsiku ya Biblia lenda tanina mavimpi na beto. (Bingana 14:30; 22:24, 25) Mu mbandu, kuzitisa nsiku ya Nzambi na yina metala kulauka malafu ketaninaka beto na bamaladi yina kefwaka mpi bigonsa ya nene. (Bingana 23:20) Yehowa mepesaka beto nzila ya kunwa malafu kansi kaka ti bukati-kati. (Nkunga 104:15; 1 Bakorinto 6:10) Minsiku ya Nzambi kenatilaka beto mambote mutindu yo kelongaka beto na kukeba kaka ve na mambu yina beto kesalaka kansi mpi na bangindu na beto. (Nkunga 119:97-100) Kansi, Bakristu ya kyeleka kezitisaka minsiku ya Nzambi sambu na mambote na bo mosi mpamba ve. Bo kesalaka yo mpi sambu na kupesa Yehowa lukumu.—Tanga Matayo 5:14-16.