Kwenda na mambu ke na kati

Kwenda na tansi ya malongi

 DILONGI YA 10

Inki Mutindu Nge Lenda Zaba Dibundu ya Kyeleka?

Inki Mutindu Nge Lenda Zaba Dibundu ya Kyeleka?

1. Keti dibundu ya kyeleka kevandaka kaka mosi?

“Beno keba na [baprofete] ya luvunu.”MATAYO 7:15

Yezu kulongaka balongoki na yandi dibundu mosi kaka, dibundu ya kyeleka. Yo kele bonso nzila yina kenataka na luzingu ya mvula na mvula. Yezu tubaka nde: ‘Bantu fioti ke monaka yo.’ (Matayo 7:14) Nzambi kendimaka kaka dibundu yina mesimbama na Ndinga na yandi ya kyeleka. Bansambidi yonso ya kyeleka kevandaka ti lukwikilu mosi.Tanga Yoane 4:23, 24; 14:6; Baefezo 4:4, 5.

2. Yezu kutubaka nki na yina metala Bakristu ya luvunu?

“Bo ke tubaka nde bo ke ndimaka Nzambi, kansi mambu yina ya bo ke salaka yo ke songaka nde bo ke buyaka yandi.”TITO 1:16.

Yezu kukebisaka nde baprofete ya luvunu tabebisa dibundu ya Bukristu. Bo kemonanaka bonso nde bo kele bansambidi ya kyeleka. Bantu ya mabundu na bo ketubaka nde bo kele Bakristu. Kansi nge lenda zaba bantu ya mutindu yai na mambu yina bo kesalaka mpenza. Inki mutindu? Bansambidi ya kyeleka mpamba kebasisaka Bakristu ya kyeleka yina kezabanaka na bikalulu mpi mambu na bo ya mbote.Tanga Matayo 7:13-23.

3. Inki mutindu nge lenda zaba bansambidi ya kyeleka?

Tadila mambu yai tanu:

  • Bansambidi ya kyeleka kezitisaka Biblia mpi kendimaka nde yo kele Ndinga ya Nzambi. Bo kesalaka bikesa sambu na kuzinga na kuwakana ti minsiku na yo. Yo yina, dibundu ya kyeleka kevandaka ya kuswaswana ti dibundu yina malongi na yo kekatukaka na bangindu ya bantu. (Matayo 15:7-9) Bansambidi ya kyeleka kesalaka mambu yina bo kelongaka bankaka.Tanga Yoane 17:17; 2 Timoteo 3:16, 17.

  •   Balongoki ya kyeleka ya Yezu kekumisaka zina ya Nzambi, Yehowa. Yezu kukumisaka zina ya Nzambi na kuzabisaka yo na bantu. Yandi sadisaka bantu na kuzaba Nzambi mpi longaka bo na kusamba nde zina ya Nzambi kusantisama. (Matayo 6:9) Na kisika nge kezingaka, nki dibundu kezabisaka bantu zina ya Nzambi?Tanga Yoane 17:26; Baroma 10:13, 14.

  • Bakristu ya kyeleka kesamunaka Kimfumu ya Nzambi. Nzambi tindaka Yezu sambu na kusamuna nsangu ya mbote ya Kimfumu. Bantu ketulaka kivuvu kaka na Kimfumu ya Nzambi. Yezu landaka na kusamuna Kimfumu yango tii yandi fwaka. (Luka 4:43; 8:1; 23:42, 43) Yandi tubaka nde balongoki na yandi tasamuna Kimfumu yango. Kana muntu mosi kwisa kuzabisa nge mambu ya Kimfumu ya Nzambi, yo fwete vanda nde yandi kesambilaka na nki dibundu?Tanga Matayo 24:14.

  • Balongoki ya Yezu kele ve bantu ya nsi-ntoto yai ya mbi. Nge lenda zaba bo na mutindu bo kekotaka ve na mavwanga ya politiki to ya kebasikaka na kati ya bimvuka ya bantu. (Yoane 17:16; 18:36) Dyaka, bo kelandaka ve bikalulu mpi nkadilu ya mbi ya nsi-ntoto.Tanga Yakobo 4:4.

  • Bakristu ya kyeleka kevandaka ti zola ya ngolo na kati na bo. Ndinga ya Nzambi kelongaka bo na kuzitisa bantu ya makanda yonso. Ata bantangu yankaka mabundu ya luvunu kesyamisaka bamvita na kati ya bansi, bansambidi ya kyeleka kebuyaka kusala mpidina. (Mishe 4:1-3) Kansi, Bakristu kesadilaka ntangu mpi bima na bo na luzolo yonso sambu na kusadisa mpi kusyamisa bankaka.Tanga Yoane 13:34, 35; 1 Yoane 4:20.

4. Keti nge lenda zaba dibundu ya kyeleka?

Inki dibundu kelongaka mambu yina kekatukaka na Ndinga ya Nzambi, kekumisaka zina ya Nzambi, mpi kesamunaka nde Kimfumu ya Nzambi kele kaka kivuvu mosi sambu na bantu? Inki dibundu kemonisaka zola mpi kebuyaka mvita? Inki nge keyindula?Tanga 1 Yoane 3:10-12.