Kwenda na mambu ke na kati

Kwenda na tansi ya malongi

 DILONGI YA 6

Keti Kivuvu Kele Sambu na Bafwa?

Keti Kivuvu Kele Sambu na Bafwa?

1. Inki kele nsangu ya mbote sambu na bafwa?

Ntangu Yezu kumaka na Betania penepene na Yeruzalemi, nduku na yandi Lazare kufwaka tuka bilumbu iya. Yezu kukwendaka na mazyamu ti Marta mpi Maria, bampangi ya muntu yina kufwaka. Na nima ya ntangu fyoti, bantu mingi kwisaka pana. Keti nge lenda yindula kyese yina Marta mpi Maria kuwaka, ntangu Yezu futumunaka Lazare?Tanga Yoane 11:21-24, 38-44.

Marta zabaka dezia nsangu ya mbote na yina metala bafwa. Yandi zabaka nde Yehowa tafutumuna bafwa sambu bo zinga dyaka na ntoto.Tanga Yobi 14:14, 15.

2. Inki kele nkadilu ya bafwa?

Nzambi zabisaka Adami nde: “Sambu nge kele ntoto, nge ta vutuka mpi na ntoto.”—KUYANTIKA 3:19.

Bantu mesalamaka na putulu. (Kuyantika 2:7; 3:19) Beto kele ve bigangwa ya kimpeve yina kezingaka na nitu ya kinsuni. Beto kele bigangwa ya kinsuni, yo yina ata kitini mosi ve ya nitu na beto kezingaka na nima ya lufwa. Ntangu beto kefwaka, butomfu mpi mabanza na beto kefwaka. Yo yina, Lazare kutubaka ve ata kima mosi sambu na mambu yina yandi monaka ntangu yandi fwaka sambu bafwa kezabaka ve ata kima mosi.Tanga Nkunga 146:4; Longi 9:5, 6, 10.

Keti Nzambi kenyokulaka bantu na tiya na nima ya lufwa? Sambu Biblia kemonisa nde bafwa kezabaka ata kima mosi, dilongi ya bilungi ya tiya kele mpenza dilongi ya luvunu yina kekusilaka Nzambi makambu. Dibanza ya kunyokula bantu na tiya kevwenzaka Nzambi.Tanga Yeremia 7:31.

 3. Keti beto lenda solula ti bafwa?

Bafwa lenda tuba ve mpi kuwa ve. (Nkunga 115:17) Kansi, bawanzyo yankaka kele ya mbi, mpi bo lenda solula ti bantu mpi kukusa nde bo kele bantu yina mefwaka. (2 Piere 2:4) Yehowa kebuyisa kusolula ti bafwa.Tanga Kulonga 18:10, 11.

4. Banani tafutumuka?

Bamilio ya bantu yina mefwaka, ya kele na mazyamu tavutuka na luzingu na ntoto. Ata bantu yankaka yina kuzabaka ve Nzambi mpi kusalaka mambu ya mbi, tafutumuka.Tanga Luka 23:43; Bisalu 24:15.

Bantu yina tafutumuka tavanda ti makuki ya kulonguka kyeleka ya metala Nzambi mpi kumonisa lukwikilu na bo na Yezu na kulemfukilaka yandi. (Kusonga 20:11-13) Bantu yina tafutumuka, mpi tasala mambu ya mbote tazinga kimakulu na ntoto.Tanga Yoane 5:28, 29.

5. Lufutumuku kelonga beto nki na yina metala Yehowa?

Nzambi pesaka beto kivuvu ya lufutumuku na mutindu yandi tindaka Mwana na yandi na kufwa sambu na beto. Yo yina, lufutumuku kele nzikisa ya kemonisa beto zola mpi mambote ya Yehowa. Ntangu bafwa tafutumuka, nani nge tazola mpenza kumona?Tanga Yoane 3:16; Baroma 6:23.