Kwenda na mambu ke na kati

Kwenda na tansi ya malongi

 DILONGI YA 9

Inki Mutindu Dibuta na Nge Lenda Vanda na Kyese?

Inki Mutindu Dibuta na Nge Lenda Vanda na Kyese?

1. Sambu na nki kukwelana na meso ya leta kele mfunu sambu dibuta kuvanda na kyese?

Nsangu ya mbote kekatukaka na Yehowa, Nzambi ya kyese, yina kezolaka nde mabuta kuvanda na kyese. (1 Timoteo 1:11) Yandi muntu yantikisaka makwela. Yo kele mfunu na kukwelana na meso ya leta na mpila nde makwela kuvanda na kyese, sambu yo kesadisaka na kusansa bana na mutindu mosi ya mbote mpenza.

Inki mutindu Nzambi ketadilaka makwela? Yandi kezolaka nde yo zinga kimakulu. Bakristu fwete zitisa bansiku ya bwala na bo na yina metala kusonikisa makwela na mukanda ya leta. (Luka 2:1, 4, 5) Yehowa kezolaka nde konso nkwelani, bakala to nkento, kuvanda ya kwikama na nkwelani na yandi. (Baebreo 13:4) Yandi kemengaka kufwa makwela. (Malashi 2:16) Kansi yandi kepesaka Bakristu nswa ya kufwa makwela mpi kukwela dyaka kana nkwelani mosi mesala bizumba.Tanga Matayo 19:3-6, 9.

2. Inki mutindu bakala mpi nkento fwete sadilana mambu?

Yehowa kugangaka babakala mpi bankento sambu na kusadisana na makwela. (Kuyantika 2:18) Sambu yandi kele mfumu ya dibuta, bakala fwete lungisa bampusa ya kinsuni ya bantu ya dibuta na yandi mpi kulonga bo mambu ya Nzambi. Yandi fwete zola nkento na yandi mingi kibeni. Babakala ti bankento fwete zolana mpi kuzitisana. Sambu babakala mpi bankento yonso kele bantu ya kukonda kukuka, kikalulu ya kulolulana kele mfunu mingi sambu yo kesadisaka bankwelani na kuvanda na kyese na makwela na bo.Tanga Baefezo 4:31, 32; 5:22-25, 33; 1 Piere 3:7.

3. Keti nge lenda kabwana ti nkwelani na nge kana makwela na beno kele ve na kyese?

Kana beno kenwana ti bampasi na makwela na beno, beno zole fwete sala ngolo na kusadilanaka mambu ti zola. (1 Bakorinto  13:4, 5) Ndinga ya Nzambi kesyamisaka ve bankwelani na kukabwana sambu na kumanisa bampasi yina kebasikaka na makwela.Tanga 1 Bakorinto 7:10-13.

4. Bana, Nzambi kezolaka nki sambu na beno?

Yehowa kezolaka nde beno vanda na kyese. Yandi kepesaka beno bandongisila ya kuluta mbote na mutindu beno lenda sepela na buleke na beno. Yandi kezolaka nde beno baka mambote na mayele mpi na eksperiansi ya bibuti na beno. (Bakolosai 3:20) Yehowa kezolaka mpi nde beno mona kyese ya kusala mambu sambu na Ngangi na beno mpi Mwana na yandi.Tanga Longi 11:9–12:1; Matayo 19:13-15; 21:15, 16.

5. Bibuti, beno fwete sala nki sambu bana na beno kuvanda na kyese?

Beno fwete sala ngolo sambu na kupesa bana na beno madya, bilele mpi kisika ya kuzinga. (1 Timoteo 5:8) Kansi, sambu bana na beno kuvanda na kyese, yo kele mpi mfunu nde beno longa bo na kuzola Nzambi mpi kulongama na yandi. (Baefezo 6:4) Kana bana na beno kemona nde beno kezolaka Nzambi, yo lenda vanda na bupusi ya ngolo na ntima na bo. Kana malongi na beno kesimbama na Ndinga ya Nzambi, yo lenda sadisa bana na beno na kuvanda na mabanza ya mbote.Tanga Kulonga 6:4-7; Bingana 22:6.

Kana beno kesyamisa mpi kesikisa bana na beno, yo tanatila bo mambote. Yo kele mpi mfunu nde beno sungika bo mpi kupesa bo disipline. Kusala mutindu yai ketaninaka bo na bikalulu yina lenda sala nde bo vanda ve na kyese. (Bingana 22:15) Ata mpidina, nge fwete pesa ve bana na nge disipline na ngolo to na nku yonso.Tanga Bakolosai 3:21.

Bambangi ya Yehowa kebasisaka mikanda mingi sambu na kusadisa bibuti mpi bana. Malongi ya mikanda yango kekatukaka na Biblia.Tanga Nkunga 19:8, 12.