Kwenda na mambu ke na kati

Kwenda na tansi ya malongi

 DILONGI YA 14

Sambu na nki Nzambi Mevukisaka Bantu na Yandi?

Sambu na nki Nzambi Mevukisaka Bantu na Yandi?

1. Sambu na nki Nzambi vukisaka Izraele ya ntama?

Nzambi vukisaka bana ya Abrahami, tata ya mabuta, na dikanda mosi mpi yandi pesaka bo bansiku. Yandi bingaka dikanda yango, “Izraele” mpi kukumisaka yo dikanda yina vandaka kutanina lusambu ya kyeleka mpi ndinga na yandi. (Nkunga 147:19, 20) Yo yina, bantu ya makanda yonso lendaka kubaka balusakumunu na nzila ya dikanda ya Izraele.Tanga Kuyantika 22:18.

Nzambi ponaka bantu ya Izraele na kuvanda bambangi na yandi. Disolo na bo vandaka kumonisa mutindu bantu vandaka kubaka balusakumunu ntangu bo vandaka kulemfukila bansiku ya Nzambi. (Kulonga 4:6) Yo yina, na nsadisa ya bantu ya Izraele, makanda yankaka lendaka kuzaba Nzambi ya kyeleka.Tanga Yezaya 43:10, 12.

2. Sambu na nki Nzambi mevukisaka Bakristu ya kyeleka?

Na nima ya mwa ntangu, Yehowa Nzambi kubuyaka dikanda ya Izraele mpi kuyingisaka yo na dibundu ya Bukristu. (Matayo 21:43; 23:37, 38) Ntangu yai, na kisika ya bantu ya Izraele, Bakristu ya kyeleka kele Bambangi ya Yehowa.Tanga Bisalu 15:14, 17.

Yezu yidikaka balongoki na yandi sambu bo longa mpi bo kumisa bantu ya makanda yonso balongoki. (Matayo 10:7, 11; 24:14; 28:19, 20) Kisalu yai ke na kukuma na nsuka na yo bubu yai, na nsuka ya ngidika ya bima ya ntangu yai. Sambu na mbala ya ntete, Yehowa mevukisaka bamilio ya bantu ya mekatuka na makanda yonso na lusambu ya kyeleka. (Kusonga 7:9, 10) Bakristu ya kyeleka mevukanaka sambu na kupesana kikesa mpi kusadisana. Na ntoto ya mvimba, bo kelongukaka malongi ya Biblia ya mutindu mosi na balukutakanu na bo.Tanga Baebreo 10:24, 25.

 3. Inki mutindu organizasio ya Bambangi ya Yehowa ya bilumbu na beto kuyantikaka?

Na 1870, kibuka mosi ya fyoti ya Balongoki ya Biblia yantikaka kusengumuna bakyeleka ya Biblia yina bantu vilaka banda ntama. Bo zabaka nde Yezu yidikaka dibundu ya Bukristu sambu na kusamuna, yo yina bo yantikaka kampanye mosi ya kolonga nsangu ya Kimfumu na bansi mingi. Na 1931 bo bakaka zina ya Bambangi ya Yehowa.Tanga Bisalu 1:8; 2:1, 4; 5:42.

4. Inki mutindu bo mevukisaka Bambangi ya Yehowa?

Na mvu-nkama ya ntete, mabundu ya Bukristu ya bansi mingi vandaka kubaka bantuma na Nto-Kimvuka yina vandaka kundima nde Mfumu ya dibundu kele Yezu. (Bisalu 16:4, 5) Mutindu mosi bubu yai, Bambangi ya Yehowa na ntoto ya mvimba kebakaka mambote na Nto-Kimvuka ya mesalama na bankuluntu yina kele ti eksperiansi. Nto-Kimvuka ketwadisaka ba biro ya filiale ya Bambangi ya Yehowa yina kebalulaka mpi kenyemaka mikanda ya kulongukila Biblia, mpi kekabulaka yo na bandinga kuluta 600. Yo yina, Nto-Kimvuka kepesaka malongi ya kesyamisa ya mesimbama na Masonuku mpi lutwadisu na mabundu kuluta 100 000 na ntoto ya mvimba. Na konso dibundu, babakala yina kelungisaka mambu yina bo kelombaka kekumaka bankuluntu, to bankengi. Babakala yai ketaninaka na zola yonso mameme ya Nzambi.Tanga 1 Piere 5:2, 3.

Yehowa meyidikaka bantu na yandi sambu na kulonga nsangu ya mbote mpi kukumisa bantu balongoki. Bonso bantumwa, beto kekwendaka kusamuna nzo na nzo. (Bisalu 20:20) Beto kelombaka bantu yina kezolaka kyeleka na masonga yonso na kulonguka Biblia ti beto. Kansi Bambangi ya Yehowa kele ve kaka kimvuka mosi buna. Beto kele dibuta yina kele ti Tata mosi ya kezolaka beto mingi. Beto kele bampangi ya babakala mpi ya bankento yina ketudilanaka dikebi. (2 Batesalonika 1:3) Mutindu bantu ya Yehowa mevukanaka sambu na kusepedisa Nzambi mpi kusadisa bantu yankaka, kesadisaka bo na kuvanda na dibuta mosi ya kyese awa na ntoto.Tanga Nkunga 33:12; Bisalu 20:35.