Kwenda na mambu ke na kati

Kwenda na tansi ya malongi

 DILONGI YA 18

Inki Mutindu Beto Ke Sadisaka Bampangi na Beto na Ntangu ya Mpasi?

Inki Mutindu Beto Ke Sadisaka Bampangi na Beto na Ntangu ya Mpasi?

République dominicaine

Japon

Haiti

Kana kisumbula me salama, Bambangi ya Yehowa ke yidikaka bima kukonda kusukinina sambu na kupesa lusadisu na bampangi na bo yina me kutana ti diambu yina. Bikesa yina ke monisaka bukieleka ya zola yina ke vandaka na kati na beto. (Yoane 13:34, 35; 1 Yoane 3:17, 18) Na nki mitindu beto ke sadisaka?

Beto ke pesaka mbongo. Na mvu-nkama ya ntete, ntangu nzala ya ngolo kotaka na Yudea, Bakristu ya Antioshe tindaka mbongo na bampangi na bo Bakristu. (Bisalu 11:27-30) Mutindu mosi, ntangu beto ke waka nde bampangi na beto ya bwala mosi buna ke kutana ti bampasi, beto ke tindaka makabu na nzila ya dibundu na beto sambu na kupesa lusadisu ya kinsuni na bantu yina kele na mfunu ya lusadisu.2 Bakorinto 8:13-15.

Beto ke pesaka lusadisu. Bankuluntu yina kele na kisika yina kisumbula me salama ke sosaka konso mpangi ya dibundu na bo sambu na kuzikisa nde bo me mona Bambangi yonso mpi bo kele na lutaninu. Komite ya kupesa lusadisu lenda twadisa mambu sambu na kukabula madia, masa ya kunwa ya bunkete, bilele, nzo, mpi kusadisa bantu na kubaka lusansu. Bambangi ya Yehowa mingi ya me zaba mbote kisalu mosi buna ke futaka mbongo na bo mosi mpi ke kwendaka na luzolo na bo mosi sambu na kusadisa bampangi mpi kuyidika banzo ti Banzo ya Kimfumu yina me beba. Bumosi yina beto ke vandaka ti yo na organizasio na beto mpi eksperiansi yina beto me bakaka na kusala kumosi ke sadisaka beto na kupesa lusadisu nswalu kana mambu ya mpasi me basika. Ata beto ke sadisaka “bantu yina kele bampangi na beto na lukwikilu,” beto ke sadisaka mpi bantu ya nkaka kana mpila kele, ata bo kele bantu ya konso dibundu.—Bagalatia 6:10.

Beto ke pesaka kikesa na nzila ya Masonuku mpi ke sadisaka bo na mawi. Bantu yina kisumbula me bwila ke vandaka ti mfunu ya kukatula bo mawa. Na bantangu yina, beto ke bakaka ngolo na Yehowa, “Nzambi yina ke lembikaka bantu yonso.” (2 Bakorinto 1:3, 4) Na kiese yonso, beto ke zabisaka bantu yina kele na mpasi balusilu ya Biblia, beto ke pesaka bo kivuvu nde kubika fioti Kimfumu ya Nzambi ta manisa bampasi yonso yina bantu ke kutana ti yo.—Kusonga 21:4.

  • Sambu na nki Bambangi ke pesaka lusadisu kukonda kusukinina kana kisumbula me salama?

  • Inki kikesa ya me katuka na Masonuku beto lenda pesa bantu yina me guluka na kisumbula?