Kwenda na mambu ke na kati

Kwenda na tansi ya malongi

 LUPANGU YA MVUTUKILU 4A

Mono Vandaka Kutala Bigangwa Yina ya Moyo”

Mono Vandaka Kutala Bigangwa Yina ya Moyo”

Ziku Ezekiele monaka bifwanisu ya nene ya bangombe mpi ya bantambu yina vandaka ti mapapu mpi ba-ntu ya bantu yina telamaka bonso bantu ya ke kengila na banzo ya bantotila mpi na batempelo. Bifwanisu yai vandaka bisika yonso na Asiria mpi na Babilone ya ntama. Bonso bantu yonso yina vandaka kutala, ziku bigangwa yai ya ngolo, yina ya nkaka vandaka nda bametre kiteso ya 6, yitukisaka Ezekiele. Ata bigangwa yai vandaka kumonana ngolo, yo vandaka ve ya moyo mpi bo salaka yo na ditadi.

Kansi, bigangwa iya yina Ezekiele monaka na mbona-meso vandaka ‘bigangwa ya moyo.’ Luswaswanu yai ke yitukisa kibeni! Mbona-meso yai vandaka ti bupusi ya ngolo na Ezekiele, yo yina yandi tubilaka bangogo ‘bigangwa ya moyo’ mbala 11 na luyantiku ya mbikudulu na yandi. (Ezek. 1:5-22) Ziku mbona-meso ya bigangwa iya ya moyo yina vandaka kukwenda na ndambu mosi mpi na ntangu mosi na nsi ya kiti ya kimfumu ya Nzambi sadisaka Ezekiele na kubakisa nde Yehowa ke na kutwadisa kibeni bima yonso. Bubu yai, mbona-meso yai mosi ke sadisa beto na kubakisa ngolo mpi bunene ya Yehowa mpi nkembo ya kimfumu na yandi.—1 Bans. 29:11.