Kwenda na mambu ke na kati

Kwenda na tansi ya malongi

 DILONGI 8

Yoziasi Vandaka ti Banduku ya Mbote

Yoziasi Vandaka ti Banduku ya Mbote

Keti nge ke yindula nde yo kele mpasi na kusala mambu ya mbote?— Bantu mingi ke yindulaka nde yo kele mpidina. Biblia ke zabisa beto nde, yo vandaka mpasi mingi sambu nde leke Yoziasi kusala mambu ya mbote. Kansi, yandi vandaka ti banduku ya mbote yina sadisaka yandi. Bika beto longuka disolo ya Yoziasi mpi ya banduku na yandi.

Zina ya tata ya Yoziasi vandaka Amoni, ntotila ya Yuda. Yandi vandaka muntu ya mbi kibeni mpi yandi vandaka kusambila biteki. Ntangu yandi fwaka, Yoziasi kumaka ntotila ya Yuda. Kansi, yandi vandaka ti bamvula 8 mpamba! Keti nge ke yindula nde Yoziasi vandaka muntu ya mbi bonso tata na yandi?— Ve!

Sofonia kebisaka bantu na kusambila ve biteki

Ata ntangu yandi vandaka leke kibeni, Yoziasi vandaka na mpusa ya kulemfukila Yehowa. Yo yina, yandi ponaka kaka banduku yina vandaka kuzola Yehowa. Mpi bo sadisaka yandi na kusala mambu ya mbote. Banani vandaka banduku ya Yoziasi?

 Mosi ya banduku na yandi vandaka Sofonia. Sofonia vandaka profete mpi yandi kebisaka bantu ya Yuda nde, kana bo landa kusambila biteki mambu ya mpasi ta kumina bo. Yoziasi widikilaka Sofonia mpi sambilaka Yehowa, kansi biteki ve.

Nduku ya nkaka ya Yoziasi vandaka Yeremia. Bo zole vandaka mvula mosi mpi zingaka kisika mosi ntangu bo vandaka kuyela. Bo vandaka banduku ya ngolo mpi ntangu Yoziasi fwaka, Yeremia sonikilaka yandi nkunga mosi ya mawa. Yoziasi mpi Yeremia sadisanaka sambu na kusala mambu ya mbote mpi kulemfukila Yehowa.

Yoziasi mpi Yeremia sadisanaka sambu na kusala mambu ya mbote

Inki dilongi nge lenda baka na mbandu ya Yoziasi?— Ata ntangu Yoziasi vandaka mwana-fioti kibeni, yandi vandaka na mpusa ya kusala mambu ya mbote. Yandi zabaka nde yandi fwete sala kinduku ti bantu yina ke zolaka Yehowa. Nge mpi fwete pona kaka banduku yina ke zolaka Yehowa mpi ya lenda sadisa nge na kusala mambu ya mbote!