Kwenda na mambu ke na kati

Kwenda na tansi ya malongi

 DILONGI 9

Yeremia Yambulaka Ve Kutuba Mambu ya Me Tala Yehowa

Yeremia Yambulaka Ve Kutuba Mambu ya Me Tala Yehowa

Sambu na nki bantu wilaka Yeremia makasi?

Yehowa gulusaka Yeremia

Bantangu ya nkaka, bantu ke sekaka beto to ke wilaka beto makasi ntangu beto ke zabisaka bo mambu ya Yehowa. Yo lenda pusa beto na kuyambula kutuba mambu ya Nzambi. Keti nge me kudiwaka dezia mutindu yina?— Biblia ke zabisa beto disolo ya leke mosi ya bakala yina vandaka kuzola Yehowa kansi yandi zolaka kuyambula kutuba mambu ya me tala yandi. Zina na yandi Yeremia. Bika beto longuka disolo na yandi.

Ntangu Yeremia vandaka leke, Yehowa tindaka yandi na kukebisa bantu na kuyambula kusala mambu ya mbi. Yo vandaka mukumba ya mpasi sambu na Yeremia mpi yandi waka boma. Yandi zabisaka Yehowa nde: ‘Mono me zaba ve mambu yina mono ta tuba. Mono kele kaka mwana-fioti.’ Kansi, Yehowa songaka yandi nde: ‘Kuwa ve boma. Mono ta sadisa nge.’

 Yo yina, Yeremia yantikaka kukebisa bantu nde kana bo soba ve bifu na bo Nzambi ta pesa bo ndola. Nge ke yindula nde bantu salaka mambu yina Yeremia tubaka?— Ve. Bo vandaka kuseka yandi mpi kuwila yandi makasi. Bankaka nkutu sosaka kufwa yandi! Nge ke yindula nde Yeremia kudiwaka nki mutindu?— Yandi waka boma mpi tubaka nde: ‘Mono ta tuba diaka ve ata fioti mambu ya me tala Yehowa.’ Kansi, keti yandi yambulaka kibeni?— Ve. Yandi vandaka kuzola Yehowa mingi yo yina yandi kukaka ve kuyambula kutuba mambu ya me tala yandi. Mpi sambu Yeremia yambulaka ve, Yehowa taninaka yandi.

Mu mbandu, kilumbu mosi bantu ya mbi losaka Yeremia na dibulu ya poto-poto. Yandi vandaka ve ti madia mpi masa. Bantu yina yambulaka Yeremia kuna sambu nde yandi fwa. Kansi ti lusadisu ya Yehowa, yandi gulukaka!

Inki dilongi nge lenda baka na mbandu ya Yeremia?— Ata bantangu ya nkaka Yeremia waka boma, yandi yambulaka ve kutuba mambu ya me tala Yehowa. Ntangu nge ke tuba mambu ya me tala Yehowa, bantu lenda seka nge to kuwila nge makasi. Nge lenda wa nsoni to ata nkutu boma. Kansi, kuyambula ve kutuba mambu ya me tala Yehowa. Yandi ta sadisa nge kaka mutindu yandi sadisaka Yeremia.