Kwenda na mambu ke na kati

Kwenda na tansi ya malongi

 DILONGI 1

Kinsweki Yina Beto Kele na Kiese ya Kuzaba

Kinsweki Yina Beto Kele na Kiese ya Kuzaba

Keti muntu mosi me zabisaka nge dezia kinsweki mosi?— * Biblia ke tubilaka kinsweki mosi ya mfunu yina yo ke bingaka “kinsweki ya santu.” Yo kele ya santu sambu yo me katuka na Nzambi. Mpi Biblia ke binga yo kinsweki sambu bantu me zaba yo ve. Ata bawanzio sosaka kuzaba mambu mingi ya me tala kinsweki yai. Keti nge ta zola kuzaba kinsweki yina?—

Nge ke yindula nde bawanzio vandaka kusosa kuzaba inki?

Bamvula mingi me luta, Nzambi gangaka bakala mpi nkento ya ntete. Bazina na bo vandaka Adami mpi Eva. Nzambi tulaka bo na kisika mosi ya kitoko yina Biblia ke bingaka kilanga ya Edeni. Kana Adami mpi Eva lemfukilaka Nzambi, bo ti bana na bo zolaka kukumisa ntoto ya mvimba paladisu bonso kilanga yina. Mpi bo zolaka kuzinga na Paladisu kimakulu. Kansi, nge ke yibuka diaka diambu yina Adami ti Eva salaka?—

Adami ti Eva zitisaka ve Nzambi, yo yina bubu yai beto ke zingaka ve na paladisu. Kansi, Nzambi tubaka nde yandi ta kumisa ntoto ya mvimba kitoko; muntu yonso ta zinga kimakulu mpi ta vanda na kiese. Inki mutindu yandi ta sala yo? Na nsungi mosi ya nda, bantu zabaka ve. Yo vandaka kinsweki.

Ntangu Yezu kwisaka na ntoto, yandi longaka bantu mambu mingi ya me tala kinsweki yina. Yandi tubaka nde, kinsweki yango vandaka kutadila Kimfumu ya Nzambi. Yezu zabisaka bantu na kusamba sambu nde Kimfumu yina kukwisa. Yo ta kumisa ntoto paladisu mosi ya kitoko.

Keti nge kele na kiese ya kuzaba kinsweki yai?— Kuvila ve nde kaka bantu yina ke lemfukilaka Yehowa ta zinga na Paladisu. Biblia ke zabisa beto masolo ya babakala mpi bankento mingi yina lemfukilaka Yehowa. Nge ta zola kuzaba bo?— Beto ta tubila bankaka na kati na bo mpi beto ta mona mutindu beto lenda landa mbandu na bo.

^ par. 3 Na bunda ya masolo yai, nge ta mona kidimbu yai (—) na nima ya bangiufula ya nkaka. Yo kele ntangu ya mbote ya kupema mpi kubika nde mwana kupesa mvutu.