Kwenda na mambu ke na kati

Kwenda na tansi ya malongi

 DILONGI 11

Bantu Yina Sonikaka Mambu ya Me Tala Yezu

Bantu Yina Sonikaka Mambu ya Me Tala Yezu

Keti nge ke mona bantu yai ya kele na kifwanisu?— Yo kele Matayo, Marko, Luka, Yoane, Piere, Yakobo, Yude, mpi Polo. Bantu yai vandaka na luzingu na nsungi mosi ti Yezu, mpi bo sonikaka mambu ya me tala Yezu. Bika beto longuka disolo na bo.

Inki mambu nge me zaba na yina me tala bantu yai?

Na kati ya bantu yai, tatu vandaka bantumwa yina samunaka ti Yezu. Keti nge me zaba bazina na bo?— Matayo, Yoane, mpi Piere. Ntumwa Matayo mpi Yoane zabaka Yezu mbote, mpi bo yonso zole sonikaka mikanda yina ke  tubila luzingu ya Yezu. Ntumwa Yoane sonikaka diaka mukanda ya Kusonga, Mukanda ya Ntete ya Yoane, Mukanda ya Zole ya Yoane, mpi Mukanda ya Tatu ya Yoane. Ntumwa Piere sonikaka mikanda zole: Mukanda ya Ntete ya Piere mpi Mukanda ya Zole ya Piere. Na mukanda na yandi ya zole, Piere monisaka nde kilumbu mosi Yehowa tubaka tuka na zulu nde: ‘Yai kele mwana na mono. Mono ke zolaka yandi, mpi mono kele na kiese sambu na yandi.’

Bantu ya nkaka yina kele na kifwanisu tubilaka mpi mambu ya me tala Yezu na mikanda yina bo sonikaka. Mosi na kati na bo kele Marko. Ziku yandi vandaka pana ntangu bo kangaka Yezu mpi yandi monaka mambu yonso yina salamaka. Muntu ya nkaka kele Luka. Yandi vandaka munganga mpi ziku yandi kumaka Mukristu na nima ya lufwa ya Yezu.

Bansoniki zole ya nkaka yina nge ke mona na kifwanisu kele baleke ya Yezu. Keti nge me zaba bazina na bo?— Yo kele Yakobo mpi Yude. Na luyantiku, bo vandaka ve kukwikila na Yezu. Nkutu bo vandaka kuyindula nde yandi me bela maladi ya kilawu. Kansi na nima, bo kwikilaka na Yezu mpi kumaka Bakristu.

Nsoniki ya nsuka yina nge ke mona na kifwanisu kele Polo. Na ntwala ya kukuma Mukristu, zina na yandi vandaka Saule. Yandi vandaka kumenga mingi Bakristu mpi kuniokula bo. Nge me zaba sambu na nki Polo ndimaka kukuma Mukristu?— Kilumbu mosi, Polo vandaka kusala nzietelo mpi na nzila yandi waka muntu mosi ke solulaka ti yandi tuka na zulu. Yo vandaka Yezu! Yandi yulaka Polo nde: ‘Sambu na nki nge ke niokula bantu yina ke kwikila na mono?’ Na nima, Polo sobaka bifu na yandi mpi kumaka Mukristu. Polo sonikaka mikanda 14, banda na mukanda ya Baroma tii ya Baebreo.

Beto ke tangaka Biblia konso kilumbu, mpidina ve?— Kana beto ke tanga Biblia, beto ta longuka mambu mingi ya me tala Yezu. Keti nge ta zola kulonguka mambu mingi ya me tala yandi?—