Kwenda na mambu ke na kati

Kwenda na tansi ya malongi

 KAPU YA KUMI NA ZOLE

Inki Mutindu Nge Lenda Kuma Nduku ya Nzambi?

Inki Mutindu Nge Lenda Kuma Nduku ya Nzambi?

1, 2. Banani vandaka banduku ya Yehowa?

NANI nge ta zola nde yandi vanda nduku na nge? Muntu yina nge ke zolaka. Muntu yina nge ke wakanaka mbote ti yandi mpi yandi ke wakanaka mbote ti nge. Muntu yina kele mawete mpi ke vandaka ti bikalulu yina ke sepedisaka nge.

2 Yehowa Nzambi ke ponaka bantu ya nkaka na kuvanda banduku na yandi. Mu mbandu, Abrahami vandaka nduku ya Yehowa. (Yezaya 41:8; Yakobo 2:23) Yehowa vandaka mpi kuzola Davidi. Yandi tubaka nde Davidi vandaka ‘kupesa ntima na yandi kiese.’ (Bisalu 13:22) Mbikudi Daniele mpi vandaka “mfunu mingi” sambu na Yehowa.—Daniele 9:23.

3. Sambu na nki Abrahami, Davidi, mpi Daniele kumaka banduku ya Yehowa?

3 Inki mutindu Abrahami, Davidi, mpi Daniele kumaka banduku ya Yehowa? Yehowa songaka Abrahami nde: “Nge me wa ndinga na mono.” (Kuyantika 22:18) Yehowa ke kumaka nduku ya bantu yina ke lemfukilaka yandi na kudikulumusa yonso. Ata dikanda ya mvimba lenda kuma banduku na yandi. Yehowa tendudilaka dikanda ya Izraele nde: “Beno lemfukila ndinga na mono, ebuna mono ta kuma Nzambi na beno, mpi beno ta kuma bantu na mono.” (Yeremia 7:23) Yo yina kana nge ke zola kibeni kukuma nduku ya Yehowa, nge mpi nge fwete lemfukila yandi.

YEHOWA KE TANINAKA BANDUKU NA YANDI

4, 5. Inki mutindu Yehowa ke taninaka banduku na yandi?

4 Biblia ke tuba nde Yehowa ke sosaka mutindu ya “kusonga ngolo na yandi sambu na bantu yina ntima na bo kele ya mvimba na yandi.” (2 Bansangu 16:9) Na Nkunga 32:8,  Yehowa ke sila banduku na yandi nde: “Mono ta pesa nge mayele ya kubakisa mambu mbote-mbote mpi ta longa nge nzila yina nge fwete kwenda. Mono ta pesa nge ndongisila ntangu disu na mono ke tala nge.”

5 Mbeni mosi ya ngolo ke zolaka kukanga beto nzila sambu beto vanda diaka ve banduku ya Nzambi. Kansi Yehowa ke zolaka kutanina beto. (Tanga Nkunga 55:22.) Sambu beto kele banduku ya Yehowa, beto ke sadilaka yandi na ntima na beto ya mvimba. Beto ke vandaka ya kwikama na yandi ata na bantangu ya mpasi. Mpi beto ke vandaka ti kivuvu bonso yina muyimbi-bankunga vandaka ti yo. Yandi sonikaka sambu na Yehowa nde: “Sambu yandi kele na diboko na mono ya kitata, mono ta nikana ve ata fioti.” (Nkunga 16:8; 63:8) Inki mutindu Satana ke sosaka kukanga beto nzila sambu beto vanda diaka ve banduku ya Nzambi?

NTEMBE YA SATANA

6. Inki mambu Satana tubaka sambu na bantu?

6 Na Kapu ya 11, beto longukaka nde Satana tudilaka Yehowa ntembe mpi tubaka nde yandi kele muntu ya luvunu mpi ya kukonda lunungu sambu yandi pesaka ve Adami ti Eva nswa ya kupona bo mosi na kusala mambu ya mbote mpi ya mbi. Mukanda ya Yobi ke longa beto nde Satana tubaka mpi nde bantu yina ke zola kukuma banduku ya Nzambi ta kuka ve kusala yo. Satana tubaka nde bo ke sadilaka Nzambi sambu na bima yina yandi ke pesaka bo, kansi ve sambu bo ke zolaka yandi. Nkutu Satana tubaka nde, yandi lenda pusa konso muntu na kuyambula kusadila Nzambi. Beto tadila mambu yina beto lenda longuka na disolo ya Yobi mpi mutindu Yehowa taninaka yandi.

7, 8. (a) Inki mutindu Yehowa vandaka kutadila Yobi? (b) Inki mambu Satana tubaka sambu na Yobi?

7 Yobi vandaka nani? Yandi vandaka muntu ya mbote yina zingaka na ntoto kiteso ya bamvula 3 600 me luta. Yehowa tubaka nde kuvandaka ve ti muntu ya nkaka bonso  yandi awa na ntoto na ntangu yina. Yobi vandaka ti luzitu ya mingi sambu na Nzambi mpi yandi vandaka kubuya mambu ya mbi. (Yobi 1:8) Ya kieleka, Yobi vandaka nduku ya ngolo ya Yehowa.

8 Satana tubaka nde Yobi vandaka kusadila Nzambi sambu na bikuma ya bwimi. Satana songaka Yehowa nde: “Keti nge me tulaka ve lupangu ya lutaninu na nziunga na yandi, na nziunga ya nzo na yandi mpi ya bima yonso yina yandi kele na yo? Nge me sakumunaka kisalu ya maboko na yandi, mpi bitwisi na yandi me yalumukaka na insi ya mvimba. Kansi, sambu na kusoba, tandula diboko na nge mpi bebisa yonso yina yandi kele na yo, mpi yandi ta singa nge kibeni na meso na nge.”—Yobi 1:10, 11.

9. Yehowa pesaka Satana nzila ya kusala nki?

9 Satana tubaka nde Yobi vandaka kusadila Yehowa kaka sambu na bima yina yandi pesaka yandi. Yandi tubaka diaka nde yandi lenda pusa Yobi na kuyambula kusadila Yehowa. Yehowa ndimaka ve mambu yina Satana tubaka, kansi yandi pesaka Satana nzila ya kumeka Yobi; mpidina yandi ta zaba kana Yobi vandaka nduku ya Yehowa sambu yandi vandaka kuzola yandi to ve.

SATANA ME MEKA YOBI

10. Inki mutindu Satana mekaka Yobi, kansi Yobi salaka nki?

10 Ntete-ntete, Satana yibaka to fwaka bambisi yonso ya Yobi. Na nima, Satana fwaka bansadi mingi ya Yobi. Yobi vidisaka bima yonso. Na nsuka, Satana fwaka bana kumi ya Yobi na mupepe ya ngolo. Kansi Yobi bikalaka ya kwikama na Yehowa. “Na mambu yai yonso, Yobi salaka ve disumu mpi fundaka ve Nzambi nde yandi ke salaka mambu ya mbi.”—Yobi 1:12-19, 22.

Yehowa sakumunaka Yobi sambu yandi vandaka nduku na yandi ya kwikama

11. (a) Satana salaka diaka Yobi nki? (b) Inki Yobi salaka?

11 Satana yambulaka ve. Yandi tudilaka Nzambi ntembe mutindu yandi tubaka nde: “Bebisa mukwa na yandi ti nsuni na yandi, mpi yandi ta singa nge kibeni na meso na  nge.” Yo yina, Satana pesaka Yobi maladi mosi ya ngolo. (Yobi 2:5, 7) Kansi, Yobi bikalaka kaka ya kwikama na Yehowa. Yandi tubaka nde: “Tii kuna mono ta fwa, mono ta yambula ve kwikama na mono!”—Yobi 27:5.

12. Inki mutindu Yobi monisaka nde Satana vandaka muntu ya luvunu?

12 Yobi zabaka ve nde Satana muntu kusilaka yandi makambu mpi yandi zabaka ve kikuma yina yandi vandaka kumona bampasi mingi. Yandi yindulaka nde Yehowa muntu vandaka na kisina ya bampasi na yandi. (Yobi 6:4; 16:11-14) Ata mpidina, Yobi bikalaka ya kwikama na Yehowa. Ntangu yai, Satana lendaka kutula diaka ve ntembe. Yobi vandaka ve kusadila Yehowa sambu na bwimi. Yobi vandaka nduku ya Nzambi sambu yandi vandaka kuzola Nzambi. Mambu yonso yina Satana tubaka sambu na Yobi vandaka luvunu!

13. Kwikama ya Yobi salaka nki?

13 Ata Yobi zabaka ve mambu yina vandaka kusalama na zulu, yandi vandaka ya kwikama na Nzambi mpi yandi monisaka nde Satana vandaka muntu ya mbi. Yehowa sakumunaka Yobi sambu yandi vandaka nduku mosi ya kwikama.—Yobi 42:12-17.

INKI MUTINDU SATANA KE TUDILA NGE NTEMBE?

14, 15. Inki ntembe Satana ke tudilaka bantu yonso?

14 Nge lenda baka malongi ya mfunu na mambu yina kuminaka Yobi. Bubu yai, Satana ke tulaka ntembe ntangu yandi ke tubaka nde beto ke sadilaka Yehowa sambu na bima yina yandi ke pesaka beto. Na Yobi 2:4, Satana tubaka nde: “Muntu ta pesa konso kima yina yandi kele na yo sambu na luzingu na yandi.” Mpidina, Satana tubaka nde bantu yonso kele bwimi, Yobi mpamba ve. Bamvula mingi na nima ya lufwa ya Yobi, Satana ke landa kufinga Yehowa mpi kutudila bansadi na yandi ntembe. Mu mbandu na Bingana 27:11 beto ke tanga nde: “Mwana na mono, vanda mayele mpi pesa ntima na mono kiese, sambu mono pesa mvutu na muntu yina ke sosila [to ke finga] mono.”

 15 Nge lenda pona na kulemfukila Yehowa mpi kuvanda nduku na yandi ya kwikama sambu na kumonisa nde Satana kele muntu ya luvunu. Ata yo ke lomba nde nge sala bansoba ya ngolo na luzingu na nge sambu na kukuma nduku ya Nzambi, zaba nde nge me baka lukanu mosi ya mbote kibeni! Lukanu yai kele diambu ya mfunu mingi. Satana ke tuba nde nge ta bikala ve ya kwikama na Nzambi kana nge kutana ti bampasi. Yandi ke sosa kukusa beto sambu beto vanda ve ya kwikama na Nzambi. Inki mutindu?

16. (a) Inki bametode Satana ke sadilaka sambu na kukanga bantu nzila sambu bo sadila diaka ve Yehowa? (b) Inki mutindu Diabulu lenda kanga nge nzila sambu nge sadila diaka ve Yehowa?

16 Satana ke sadilaka bametode mingi sambu na kusosa kukanga beto nzila sambu beto vanda diaka ve banduku ya Nzambi. Yandi ke nwanisaka “bonso ntambu ya ke ngana, [mpi ya] ke sosa kudia muntu.” (1 Piere 5:8) Kuyituka ve kana banduku, bantu ya dibuta, to bantu ya nkaka ke sosa kukanga nge nzila sambu na kulonguka diaka ve Biblia mpi kusala mambu ya mbote. Nge lenda wa bonso nde bo ke nwanisa nge. * (Yoane 15:19, 20) Satana ke kudimonisaka mpi “bonso wanzio ya nsemo.” Yo yina, yandi ke sosaka kukusa beto sambu beto lemfukila ve Yehowa. (2 Bakorinto 11:14) Metode ya nkaka yina Satana ke sadilaka sambu na kusosa kukanga beto nzila sambu beto sadila diaka ve Yehowa kele nde, yandi ke pusaka beto na kuyindula nde beto me fwana ve kibeni sambu na kusadila Nzambi.—Bingana 24:10.

LEMFUKA NA BANSIKU YA YEHOWA

17. Sambu na nki beto ke lemfukilaka Yehowa?

17 Ntangu beto ke lemfukilaka Yehowa, beto ke monisaka  nde Satana kele muntu ya luvunu. Inki ta sadisa beto na kuvanda bantu ya bulemfu? Biblia ke tuba nde: “Nge fwete zola Yehowa Nzambi na nge na ntima na nge ya mvimba, na moyo na nge ya mvimba, mpi na ngolo na nge yonso.” (Kulonga 6:5) Beto ke lemfukilaka Yehowa sambu beto ke zolaka yandi. Kana zola na beto sambu na Yehowa kuyela, beto ta vanda ti luzolo ya kusala mambu yonso yina yandi ke lomba beto. Ntumwa Yoane sonikaka nde: “Zola ya Nzambi ke tendula nde beto zitisa bansiku na yandi; nkutu bansiku na yandi kele kilo ve.”—1 Yoane 5:3.

18, 19. (a) Inki mambu Yehowa ke tubaka nde yo kele mbi? (b) Inki mutindu beto me zaba nde Yehowa ke lombaka beto ve na kusala mambu yina beto ta kuka ve?

18 Inki mambu Yehowa ke zabisaka beto nde yo kele mbi? Mambu ya nkaka kele na lupangu “ Buya Mambu Yina Yehowa Ke Buyaka.” Kana nge tadila mambu yango na zulu-zulu, nge lenda yindula nde yo kele kibeni mbi ve. Kansi kana nge tanga baverse ya Biblia mpi nge yindula yo mbote-mbote, nge ta bakisa nde yo kele mayele na kulemfuka na  bansiku ya Yehowa. Nge lenda mona mpi nde nge fwete soba mambu ya nkaka na luzingu na nge. Ata bantangu ya nkaka yo lenda vanda mpasi, kana nge soba mambu yina, nge ta vanda na ngemba mpi na kiese yina banduku ya kwikama ya Nzambi ke vandaka na yo. (Yezaya 48:17, 18) Inki mutindu beto me zaba nde beto lenda soba mambu yina?

19 Yehowa ke lombaka beto ve na kusala mambu yina beto ta kuka ve. (Kulonga 30:11-14) Sambu yandi kele nduku na beto ya ngolo, yandi me zaba beto mbote-mbote kuluta beto mosi. Yandi me zaba bifu na beto mpi mambu yina beto ke salaka mbote. (Nkunga 103:14) Ntumwa Polo ke siamisa beto nde: “Nzambi kele ya kwikama, mpi yandi ta pesa ve nzila nde beno kutana ti mpukumuna kuluta yina beno lenda kangila ntima, kansi ntangu mpukumuna ke kwisa yandi ta yidika mpi nzila sambu beno kuka kukangila yo ntima.” (1 Bakorinto 10:13) Beto lenda tula ntima nde Yehowa ta pesaka beto ntangu yonso ngolo ya kusala mambu ya mbote. Yandi ta pesa nge “ngolo yina me luta ngolo ya bantu” sambu yo sadisa nge na kukanga ntima na mambu  ya mpasi. (2 Bakorinto 4:7) Na nima ya kubaka lusadisu ya Yehowa na bantangu yina ya mpasi, Polo tubaka nde: “Sambu na mambu yonso, mono kele ti ngolo na nzila ya muntu yina ke pesaka mono ngolo.”—Bafilipi 4:13.

LONGUKA NA KUZOLA MAMBU YINA NZAMBI KE ZOLAKA

20. Inki bikalulu beto fwete monisa, mpi sambu na nki?

20 Kana beto ke zola kuvanda banduku ya Yehowa, beto fwete yambula kaka ve mambu yina yandi ke tuba nde yo kele mbi, kansi beto fwete sala mpi mambu ya nkaka. (Baroma 12:9) Banduku ya Nzambi ke zolaka mambu yina yandi ke zolaka. Biblia ke tubila mambu yango na Nkunga 15:1-5. (Tanga.) Banduku ya Yehowa ke vandaka ti bikalulu bonso ya yandi mpi ke monisaka “zola, kiese, ngemba, ntima ya nda, ntima ya mbote, bumbote, lukwikilu, mawete, kudiyala.”—Bagalatia 5:22, 23.

21. Inki mutindu nge lenda longuka kumonisa bikalulu yina Nzambi ke zolaka?

21 Inki mutindu nge lenda longuka kumonisa bikalulu yai ya mbote? Nge ta longuka mambu yina Yehowa ke zolaka kana nge ke tanga mpi ke longuka Biblia mbala na mbala. (Yezaya 30:20, 21) Kana nge ke sala yo nge ta kuma kuzola Yehowa mingi, mpi ntangu zola na nge sambu na yandi ta kuma ngolo nge ta vanda ti luzolo ya kulemfukila yandi.

22. Inki Yehowa ta pesa nge kana nge lemfukila yandi?

22 Mambu yina nge lenda soba na luzingu na nge kele bonso kukatula bilele ya ntama mpi kulwata bilele ya mpa. Biblia ke tuba nde nge fwete “katula kimuntu ya ntama” mpi kulwata “kimuntu ya mpa.” (Bakolosai 3:9, 10) Ata yo lenda vanda mpasi, kana beto sala bansoba yai mpi beto lemfukila Yehowa, yandi ta pesa beto “matabisi mingi.” (Nkunga 19:11) Ee, pona na kulemfukila Yehowa mpi monisa nde Satana kele muntu ya luvunu. Sadila Yehowa sambu na zola ya kukonda bwimi, kansi ve sambu na matabisi yonso yina yandi ta pesa nge na bilumbu ke kwisa. Mpidina nge ta kuma nduku ya ngolo ya Nzambi!

^ par. 16 Yo ke tendula ve nde Satana ke twadisaka bantu yina ke sosaka kukanga nge nzila sambu nge longuka ve Biblia. Kansi Satana kele “nzambi ya ngidika yai ya bima” mpi “nsi-ntoto ya mvimba kele na nsi ya kiyeka [na yandi].” Yo yina, beto ke yitukaka ve kana bantu ya nkaka ke sosa kukanga beto nzila sambu beto sadila diaka ve Yehowa.—2 Bakorinto 4:4; 1 Yoane 5:19.