Kwenda na mambu ke na kati

Kwenda na tansi ya malongi

 APPENDICE

Sheole ti Hadesi Kele Inki?

Sheole ti Hadesi Kele Inki?

NA BANDINGA na yo ya kisina, Biblia kesadilaka ngogo ya Kiebreo sheʼohlʹ mpi ngogo ya Kigreki haiʹdes bambala kuluta 70. Bangogo yai yonso zole kele ti kuwakana ti lufwa. Bambalula yankaka ya Biblia kebalulaka yo bonso “mazyamu,” “bilungi,” to “dibulu.” Kansi, bandinga mingi kele ve ti bangogo yina kele ti ntendula ya sikisiki ya bangogo yai ya Kiebreo mpi ya Kigreki. Traduction du monde nouveau kesadilaka bangogo “Sheole” mpi “Hadesi.” Bangogo yai ketendulaka mpenza inki? Bika beto tadila mutindu bo kesadilaka yo na baverse ya kuswaswana ya Biblia.

Longi 9:10 ketuba nde: “Na nsi ya bafwa [“Sheole,” NW] kisika ya nge ke kwenda, kisalu kele ve, ngindu kele ve, mayele mpi kele ve.” Keti yo ketendula nde Sheole kele mazyamu mosi ya sikisiki kisika beto zikaka muntu ya beto vandaka kuzola yina mefwa? Ve. Ntangu Biblia ketubila kisika ya sikisiki ya kuzika muntu, to mazyamu, yo kesadilaka bangogo yankaka ya Kiebreo mpi ya Kigreki, kansi sheʼohlʹ ti haiʹdes ve. (Kuyantika 23:7-9; Matayo 28:1) Dyaka, Biblia kesadilaka ve ngogo “Sheole” sambu na kutubila mazyamu mosi kisika bo zikaka bantu mingi na kimvuka, bonso mazyamu ya dibuta to mazyamu sambu na bantu mingi.—Kuyantika 49:30, 31.

Ebuna “Sheole” kele kisika ya nki mutindu? Ndinga ya Nzambi kemonisa nde “Sheole,” to “Hadesi,” ketendula kima mosi ya meluta nkutu mazyamu ya nene ya bantu mingi. Mu mbandu, Yezaya 5:14 ketuba nde Sheole kele ‘nene-nene mpi yo mekangula munoko na yo mingi kibeni.’ Na kikongo yankaka, ata Sheole meminaka dezia bafwa mingi kibeni, yo kemonana nde yo kele kaka ti nzala ya bantu mingi yankaka. Na kuswaswana ti konso kisika ya bo kezikaka bantu, yina bo lenda zika kaka ntalu fyoti mpamba ya bafwa, ‘Sheole kefulukaka ve.’ (Bingana 27:20NW) Disongidila, yo kele ve ti ndilu. Yo yina, Sheole, to Hadesi kele ve kisika mosi buna ya sikisiki. Kansi, yo kele mazyamu ya bantu yonso, kisika ya kifwani yina bantu mingi melalaka na lufwa.

Dilongi ya Biblia ya lufutumuku kesadisa beto na kuzaba dyaka mbote ntendula ya “Sheole” ti “Hadesi.” Ndinga ya Nzambi kewakanisa Sheole ti Hadesi na mutindu ya lufwa yina muntu  lenda futumuka dyaka. * (Yobi 14:13NW; Bisalu 2:31NW; Kusonga 20:13NW) Ndinga ya Nzambi kemonisa dyaka nde bantu yina kele na Sheole, to na Hadesi, kele ve kaka bantu yina kusadilaka Yehowa kansi mpi bantu mingi yina kusadilaka yandi ve. (Kuyantika 37:35NW; Nkunga 55:15NW) Yo yina, Biblia kelongaka nde “bantu ya mbote ti bantu ya mbi ta telama na lufwa.”—Bisalu 24:15.

^ par. 4 Na kuswaswana, Biblia ketendulaka nde bafwa yina tafutumuka ve kele na “Gehenna,” kansi na Sheole, to na Hadesi ve. (Matayo 5:30; 10:28; 23:33) Bonso Sheole ti Hadesi, Gehenna kele ve kisika ya kyeleka.