Kwenda na mambu ke na kati

Kwenda na tansi ya malongi

Keti Yai Kele Mambu Yina Nzambi Kukanaka?

Keti Yai Kele Mambu Yina Nzambi Kukanaka?

TANGA konso zulunalu yina. Tala televizio, to landa radio. Bansangu kele mingi ya ketubila mubulu, bitumba, mpi kiterorizme! Yindula bampasi ya nge kekutana ti yo. Ziku maladi to lufwa ya muntu mosi ya nge vandaka kuzola kepesaka nge mpasi mingi. Nge lenda kudiwa bonso muntu ya mbote Yobi, yina kutubaka nde yandi “vandaka ya kufuluka ti bampasi.”—Yobi 10:15, The Holy Bible in the Language of Today.

Kudiyula nde:

  • Keti yai kele mambu ya Nzambi kukanaka sambu na mono mpi sambu na bantu yonso yankaka?

  • Na wapi mono lenda zwa lusadisu ya kunwana ti bampasi na mono?

  • Keti kivuvu kele nde kilumbu yankaka beto tazinga na ngemba na ntoto?

Biblia kepesa bamvutu ya mbote na bangyufula yai.

 BIBLIA KELONGAKA NDE NZAMBI TASOBA MAMBU YAI NA NTOTO.

“Yandi ta kusula mansanga yonso na meso na bo. Lufwa ta vandaka diaka ve, bantu ta lwataka mpidi diaka ve, bo ta dilaka diaka ve, bo mpi ta waka diaka mpasi ve.”​Kusonga 21:4

“Bantu ya makulu-kifu ta pumbuka bonso mbambi.”​—Yezaya 35:6

“Meso ya bantu ya kufwa-meso ta mona.”​—Yezaya 35:5

 “Bantu yonso yina kele na mazyamu ya mbambukilu . . . tabasika.”​—Yoane 5:28, 29

“Ata muntu mosi ve ta tuba diaka nde: “Mono ke bela.”’​—Yezaya 33:24

“Ntoto [ta]fuluka na ble mingi.”​—Nkunga 72:16

 BAKA MAMBOTE YA MAMBU YINA BIBLIA KELONGAKA

Kubuya ve mbala mosi mambu ya bo ketubila na balutiti yina meluta sambu nge kemona nde yo lenda lungana ve. Nzambi mesilaka nde yandi talungisa mambu yai, mpi Biblia ketendula mutindu yandi tasala yo.

Kansi Biblia kesuka ve kaka pana. Yo kepesa nsapi yina tasadisa nge na kuvanda na luzingu ya kyese kibeni ata na ntangu yai. Yindula fyoti basusi mpi bampasi na nge mosi. Yo lenda tadila kukonda mbongo, mambu ya dibuta, kubeba ya mavimpi, to lufwa ya muntu mosi ya nge vandaka kuzola mingi. Biblia lenda sadisa nge na kunwana ti mambu ya mpasi bubu yai, mpi yo lenda lembika bampasi na kupesaka bamvutu na bangyufula bonso yai:

  • Sambu na nki beto kemonaka mpasi?

  • Inki mutindu beto lenda nwana ti bampasi ya luzingu?

  • Inki beto lenda sala sambu na kuvanda ti luzingu ya dibuta ya kyese?

  • Inki kekuminaka beto kana beto mefwa?

  • Keti beto tamona dyaka bantu ya beto vandaka kuzola yina mefwaka?

  • Inki mutindu beto lenda ndima nde Nzambi talungisa balusilu na yandi sambu na bilumbu kekwisa?

 Mutindu nge ketanga mukanda yai kemonisa nde nge kezola kuzaba mambu yina Biblia kelongaka. Mukanda yai tasadisa nge. Konso paragrafe kele ti ngyufula na yo na nsi ya lutiti. Bantu mingi kesepelaka na metode ya bangyufula mpi bamvutu ntangu bo kelongukaka Biblia ti Bambangi ya Yehowa. Beto ketula ntima nde nge mpi tasepela na yo. Bika Nzambi kusakumuna nge sambu ntangu yai nge ke na kusala eksperiansi ya kyese mpi ya mbote ya kulonguka mambu yina Biblia kelongaka mpenza!