Kwenda na mambu ke na kati

Kwenda na tansi ya malongi

Nkenda ya 112: Kitembo dindisaka maswa

Nkenda ya 112: Kitembo dindisaka maswa

MASWA yai ya beno kemona awa metutana na zelo mpi mepanzaka sambu na kitembo! Bantu yina vandaka na kati mebwa na masa. Bantu yankaka mekuma na nseke, na kati na bau ntumwa Paul. Beno kemona yandi? Bika beto tadila mambu yina kukuminaka yandi.

Bantu yina gulukaka na nima ya kudinda ya maswa

Paul bikalaka na boloko na Césarée bamvula zole. Na nima bo tindaka ntumwa Paul na bantu yankaka ya boloko na Rome. Ntangu maswa na bau vandaka kulanda ndambu ya kisanga ya Crète, kitembo ya ngolo kwisaka. Mupepe bulaka ngolo mpi bantu ya kesalaka na maswa vandaka na ntangu ve ya kukangisa maswa. Bau vandaka kumona dyaka ve ntangu na mwini to bambwetete na mpimpa. Nsukansuka, na nima ya bilumbu mingi, bantu yonso kuvandaka dyaka ve na kivuvu ya kuguluka.

Ebuna Paul tubaka nde: ‘Beno tasala kima ve, beno tabasika mbote. Kaka maswa yau mosi tavila. Kyeleka, na mpimpa yai wanzyo mebasikila mono mpi metuba nde: “Paul kumona boma ve; nge fwete monana na ntwala ya ntotila ya Rome. Mpi Nzambi tagulusa banduku na nge ya nzila.”’

Bau kumaka na kilumbu ya 14 ya nzyetolo ntangu matelo kumonaka nde mudindu vandaka dyaka ve! Na kubangaka nde maswa kufwa na zelo, bau losaka bandobo ya maswa na masa. Na suka-suka, bau monaka dibungu mosi. Bau bakaka lukanu ya kukwenda kuna.

Kansi ntangu bau kumaka penepene ya dibungu, maswa tutanaka na zelo mpi yau kangamaka. Na nima yau yantikaka na kupanzana sambu na kitembo. Ebuna komanda tubaka na bantu yonso yina vandaka kuzaba kuzenga masa na kubwa na masa bantu ya ntete mpi na kukwenda na nseke. Bankaka zolaka kulanda na kusimbaka mabaya to bitini yankaka ya maswa. Bo salaka mutindu yina. Yau yina bantu 276 yonso yina vandaka na maswa kumaka na nseke kukonda kigonsa, kaka mutindu wanzyo kutubaka yau.

Bantu yina kugulukaka vandaka na kisanga ya Malte. Bantu ya kisanga yina kumonisaka luzolo na bau ya mbote. Na nima ya bangonda tatu, Paul kotaka na maswa yankaka mpi bau tindaka yandi na Rome.

Bisalu 27:1-44; 28:1-14.



Bangyufula

  • Inki kukuminaka maswa yina Polo kuvandaka na kati ntangu yo kumaka penepene na kisanga ya Kreta?
  • Inki mambu Polo kutubilaka bantu yina kuvandaka na kati ya maswa?
  • Inki mutindu maswa kupanzanaka bitini-bitini?
  • Inki bantuma komanda yina vandaka kutala bo kupesaka, mpi bantu ikwa kukumaka na zelo kukonda kigonsa?
  • Tanga zina ya kisanga yina bo kumaka, mpi nki kuminaka Polo ntangu nsungi kubongaka?

Bangyufula ya ngika

  • Tanga Bisalu 27:1-44.

    Inki mutindu ntima ya beto ketulaka na busikisiki ya masolo ya Biblia kekumaka ngolo ntangu beto ketanga disolo ya nzyetelo ya Polo na Rome? (Bis. 27:16-19, 27-32; Luka 1:3; 2 Tim. 3:16, 17)

  • Tanga Bisalu 28:1-14.

    Kana bapakanu ya kisanga ya Malta ‘kusadisaka mbote mpenza’ ntumwa Polo ti bantu yina kuvandaka ti yandi ntangu maswa kupanzanaka, yo kepusa Bakristu na kumonisa inki, mpi mingimingi na nki mutindu? (Bis. 28:1, 2; Baeb. 13:1, 2; 1 Pie. 4:9)