Kwenda na mambu ke na kati

Kwenda na tansi ya malongi

Nkenda ya 108: Na nzila ya Damas

Nkenda ya 108: Na nzila ya Damas

KETI beno kezaba muntu yai ya mebwa mpi metula diboko na yandi na meso? Zina na yandi Saul, yina langidilaka bilele ya bantu yina kufwaka Etienne. Inki mambu mebwila yandi?

Na nima ya lufwa ya Etienne, Saul yantikaka na kunyokula balongoki ya Yezu na Yerusaleme. Yandi vandaka kukota na banzo ya bantu mpi kukanga balongoki ye kutula bau na boloko. Balongoki mingi tinaka mpi kwendaka na bambanza yankaka mpi samunaka “nsangu ya mbote” kuna. Kansi Saul kwendaka na bambanza yankaka sambu na kunyokula balongoki ya Yezu. Awa yandi kele na nzila ya kukwenda na Damas. Na ntangu yandi vandaka kukwenda, kima ya ngituka kusalamaka.

Na mbala mosi, nsemo mosi ya nene yina katukaka na zulu kumwanganaka na lweka ya Saul mpi yandi bwaka na ntoto. Mpi ndinga mosi tubaka nde: ‘Saul! Saul! Sambu na nki nge kenyokula mono?’ Banduku na yandi monaka nsemo mpi waka ndinga yina, kansi bau zabaka ve mambu yina tubaka ndinga yina.

Nsemo mefwa meso ya Saul

Saul bokaka nde: ‘Nge kele nani?’

‘Mono kele Yezu, yina nge kenyokula.’ Na kusalaka mutindu yina, Yezu vandaka kusonga yandi nde na kunyokulaka balongoki na yandi, yau vandaka bonso nde Saul vandaka kunyokula yandi mosi Yezu.

Saul yufulaka nde: ‘Mono sala inki, Mfumu?’

Yezu tubilaka yandi nde: ‘Telama, kwenda na Damas mpi kuna bau tazabisa nge mambu yonso yina nge fwete sala.’ Ntangu Saul telamaka mpi kangulaka meso na yandi, yandi lungaka ve kumona ata kima mosi. Yandi kumaka meso ya kufwa! Banduku na yandi simbaka yandi na maboko mpi nataka yandi na Damas.

Na Damas, longoki ya Yezu, Ananias vandaka kuna. Yezu tubilaka yandi na ndosi nde: ‘Kwenda na balabala Kusungama mpi kuna, na nzo ya Judas, yula muntu mosi na zina ya Saul. Mono mesola yandi bonso nsadi na mono ya ngolo.’

Ntangu Ananias monaka Saul, yandi tulaka maboko na yandi na Saul, mpi tubaka nde: ‘Yezu metinda mono sambu nde nge kumona dyaka mpi nge fuluka na mpeve santu.’ Mpi na mbala mosi, kima mosi bonso mpusu ya ngolo katukaka na meso mpi bwaka, mpi yandi monaka dyaka mbote.

Yezu pesaka yandi ngolo na kusamuna na kikesa “nsangu ya mbote” na bantu ya makanda mingi. Saul kumaka ntumwa Paul. Beto tatubila yau dyaka na balutiti yina kelanda. Kansi beto tala ntete Nzambi tindaka Pierre na kusala inki.

Bisalu 8:1-4; 9:1-20; 22:6-16; 26:8-20.



Bangyufula

  • Inki Saule kusalaka na nima ya lufwa ya Etiene?
  • Ntangu Saule vandaka kukwenda na nzila ya Damasi, inki kima ya kuyituka kusalamaka?
  • Yezu kusongaka Saule na kusala inki?
  • Inki bantuma Yezu kupesaka Ananiasi, mpi nki mutindu Saule kumaka kumona dyaka mbote?
  • Saule kuzabanaka na nima na nki zina, mpi nki mutindu Yezu kusadilaka yandi?

Bangyufula ya ngika

  • Tanga Bisalu 8:1-4.

    Inki mutindu minyoku ya ngolo yina kubwilaka dibundu ya Bukristu yina kusalamaka ntama mingi ve kusadisaka na kumwanga lukwikilu ya Bukristu, mpi nki dyambu ya mutindu mosi kusalamaka na ntangu na beto? (Bis. 8:4; Yez. 54:17)

  • Tanga Bisalu 9:1-20.

    Tubila mikumba tatu yina Yezu kumonisaka nde yandi tapesa na Saule. (Bis. 9:15; 13:5; 26:1; 27:24; Roma 11:13)

  • Tanga Bisalu 22:6-16.

    Inki mutindu beto lenda vanda bonso Ananiasi, mpi sambu na nki yo kele mfunu? (Bis. 22:12; 1 Tim. 3:7; 1 Pie. 1:14-16; 2:12)

  • Tanga Bisalu 26:8-20.

    Inki mutindu kubalula ntima ya Saule sambu na kukuma Mukristu kepesa kikesa na bantu yina kele ti bankwelani yina kele ve Bakristu? (Bis. 26:11; 1 Tim. 1:14-16; 2 Tim. 4:2; 1 Pie. 3:1-3)