Kwenda na mambu ke na kati

Kwenda na tansi ya malongi

Nkenda ya 104: Yezu me vutuka na zulu

Nkenda ya 104: Yezu me vutuka na zulu

YEZU kudimonisaka mbala mingi na balongoki na yandi. Kilumbu mosi, yandi monikaka na bantu 500. Ntangu Yezu vandaka kumonana na bau, inki mambu yandi vandaka kutubila bau? Kimfumu ya Nzambi. Jéhovah kutindaka Yezu na ntoto sambu na kulonga mambu ya metala Kimfumu. Mpi yandi landaka na kulonga mambu yango ata na nima ya lufutumuku na yandi.

Yezu kevutuka na zulu

Kimfumu ya Nzambi kele inki? Yau kele luyalu ya Nzambi yina kele na zulu mpi Yezu kele ntotila na yau yina Nzambi mesola. Yezu tavanda ntotila ya mbote. Yandi monisaka yau na mutindu yandi disaka bantu yina vandaka na nzala, na kubelulaka bambefo mpi na kufutumunaka bafwa!

Ntoto takuma nki mutindu ntangu Yezu tayala na zulu bamvula funda? Ya kyeleka, ntoto ya mvimba takituka paladisu ya kitoko. Mvita tavanda dyaka ve, bimbefo mpi ve, ata lufwa tavanda dyaka ve. Ya kyeleka, kilumbu yina takwisa sambu Nzambi gangaka ntoto sambu yau vanda paladisu. Yau yina, yandi salaka masamba ya Eden na luyantiku. Mpi Yezu tasala yonso sambu luzolo ya Nzambi ya metadila ntoto kulungana.

Ntangu ya Yezu ya kuvutuka na zulu kulungaka. Bilumbu 40, yandi kumonanaka na balongoki na yandi, bayina vandaka dyaka na ntembe ve nde yandi kezinga. Na ntwala ya kubika bau, yandi tubilaka bau na kubikala na Yerusaleme mpi na kukinga mpeve santu. Mpeve santu kele ngolo ya Nzambi kesadilaka mpi yau kefwanana na mwela (mupepe). Mpeve yina tasadisa balongoki na kulungisa luzolo ya Nzambi. Na nsuka, Yezu songaka bau nde: ‘Beno tasamuna nsangu ya metala mono tii na nsuka ya ntoto.’

Na nima ya kutuba mambu yina, dyambu mosi ya kuyituka kusalamaka. Yezu tombukaka na zulu (tala kifwanisu). Na nima, dituti mosi fikaka yandi mpi bumbaka yandi. Bau fwanaka dyaka ve kumona yandi. Yezu tombukaka na zulu mpi yantika kuna na zulu, yandi yantikaka na kuyala na balongoki na yandi awa na ntoto.

Balongoki ketala na zulu

1 Korinto 15:3-8; Kusonga 21:3, 4; Bisalu 1:1-11.



Bangyufula

  • Balongoki ikwa kumonaka Yezu na kilumbu mosi, mpi yandi vandaka kutubila bo mambu ya metala inki?
  • Kimfumu ya Nzambi kele inki, mpi luzingu na ntoto tavanda nki mutindu ntangu Yezu tayala bonso Ntotila na bamvula funda?
  • Na nsungi ya bilumbu ikwa Yezu vandaka kudisonga na balongoki na yandi, kansi ntangu kulungaka sambu yandi kusala inki?
  • Na ntwala ya kubikisa balongoki na yandi, inki Yezu kusongaka bo na kusala?
  • Mutindu kifwanisu kemonisa yo, inki dyambu ke na kusalama, mpi nki mutindu Yezu ke na kuvila na meso na bo?

Bangyufula ya ngika

  • Tanga 1 Korinto 15:3-8.

    Sambu na nki ntumwa Polo lendaka kutuba ti kivuvu yonso sambu na yina metala lufutumuku ya Yezu, mpi Bakristu bubu yai lenda tuba ti kuvuvu yonso na yina metala nki bima? (1 Kor. 15:4, 7, 8; Yez. 2:2, 3; Mat. 24:14; 2 Tim. 3:1-5)

  • Tanga Bisalu 1:1-11.

    Mutindu Biblia kutubaka na Bisalu 1:8, kisalu ya kusamuna kumwanganaka na nki kiteso? (Bis. 6:7; 9:31; 11:19-21; Kol. 1:23)