Kwenda na mambu ke na kati

Kwenda na tansi ya malongi

Nkenda ya 95: Mutindu ya Yezu vandaka longa

Nkenda ya 95: Mutindu ya Yezu vandaka longa

KILUMBU mosi, Yezu tubaka na muntu mosi nde: ‘Nge fwete zola mfinangani na nge.’ Ebuna muntu yina kuyulaka yandi nde: ‘Nani kele mfinangani na mono?’ Yezu zabaka mambu ya muntu yina vandaka kuyindula. Yandi vandaka yindula nde kaka bantu ya kikanda na yandi to ya dibundu na yandi vandaka bamfinangani na yandi. Yezu tubilaka yandi inki?

Mbala mingi, Yezu vandaka kulonga na kusadilaka bingana. Awa mpi yandi salaka mutindu mosi. Yandi tubaka kingana mosi ya muntu ya Samaria yina sadisaka Muyuda. Beno zaba mbote nde Bayuda vandaka kuzola ve bantu ya Samaria. Tala kingana ya Yezu:

Muyuda mosi kwendaka na Yeriko na nzila ya ngumba. Bimpumbulu kangaka yandi, katulaka yandi bilele, botulaka yandi mbongo, bulaka yandi, mpi bau kwendaka, na kubikaka yandi penepene na kufwa.

Nganga-Nzambi ya Muyuda kwisaka kuluta na nzila yina. Na kumonaka yandi ya kulwala, yandi lutilaka na ndambu yankaka ya nzila mpi kwendaka ka yandi. Na nima muntu yankaka yina vandaka mpi kusambila mingi kwisaka kuluta. Yandi vandaka Levite. Keti yandi telamaka? Ikele ve. Yandi landaka nzila na yandi ata kuwila ve mawa muntu yina lwalaka. Beno kemona kuna nganga-Nzambi mpi Levite kefula kaka nzila na bau?

Kansi, nani yai kele na lweka ya muntu yina melwala? Yandi kele muntu ya Samaria, kesadisa Muyuda yina. Yandi kekangisa bamputa na yandi. Na nima yandi tanata nsukami yina na kisika yina yandi fwana kupema mpi kubeluka.

Muntu ya Samaria ya ntima-mbote

Na nima ya kutuba kingana na yandi, Yezu kuyulaka muntu yina dyaka nde: ‘Na mabanza na nge, na kati ya bantu yai tatu, nani mekudisonga mfinangani ya nsukami yina melwala? Keti nganga-Nzambi, Levite to muntu ya Samaria?’

Muntu yina vutulaka nde: ‘Muntu ya Samaria. Yandi kudisongaka muntu ya mbote sambu na muntu yina kulwalaka.’

Yezu tubilaka yandi nde: ‘Ya kyeleka. Nge mpi kwenda, sala mpi mutindu mosi.’

Mutindu ya Yezu ya kulonga kele mbote kibeni! Beno talonguka mambu mingi kana beno landa mbote mambu Yezu ketuba na kati ya Bible.

Luka 10:25-37.



Bangyufula

  • Inki ngyufula muntu mosi kuyulaka Yezu, mpi sambu na inki?
  • Bantangu yankaka, Yezu vandaka kusadila nki sambu na kulonga, mpi nki mambu beto melonguka dezia na yina metala Bayuda mpi bantu ya Samaria?
  • Na disolo yina Yezu kutaka, inki mambu kukuminaka Muyuda mosi yina vandaka kukwenda na nzila ya Yeriko?
  • Inki kusalamaka ntangu nganga-Nzambi mosi ya Muyuda mpi Levi mosi kulutaka na nzila yango?
  • Na kifwanisu, nani ke na kusadisa Muyuda yina bo lwadisaka?
  • Ntangu Yezu kumanisaka disolo yango, inki ngyufula yandi yuluka, mpi nki mvutu muntu yango kupesaka?

Bangyufula ya ngika

  • Tanga Luka 10:25-37.

    Na kisika ya kupesa mvutu mbala mosi, inki mutindu Yezu kusadisaka longi mosi ya Bansiku na kuyindula na dyambu yango? (Luka 10:26; Mat. 16:13-16)

    Inki mutindu Yezu kusadilaka bingana sambu na kukatula bangindu ya mbi yina bawi na yandi kuvandaka ti yo? (Luka 10:36, 37; 18:9-14; Tito 1:9)