Kwenda na mambu ke na kati

Kwenda na tansi ya malongi

Nkenda ya 94: Yandi ke zolaka bana ya fyoti

Nkenda ya 94: Yandi ke zolaka bana ya fyoti

AWA beno kemona Yezu mesimba mwana ya bakala na maboko na yandi. Yezu kezolaka bana ya fyoti. Bantu yai ketala yandi kele bantumwa na yandi. Inki yandi ketubila bau? Beto tala ntete mambu yina kulutaka.

Yezu na bantumwa na yandi katukaka na bwala mosi. Na nzila, bantumwa yantikaka na kutubana. Yau yina, na nima ya nzyetelo Yezu yufulaka bau nde: ‘Sambu na nki beno vandaka kutubana na nzila?’ Yandi zabaka mbote mambu yina bau vandaka kutubana na nzila kansi yandi sosaka na kuzaba kana bau tatubila yandi yau.

Yezu ti mwana mosi

Bantumwa vandaka pima, sambu na nzila bau tubanaka sambu na kuzaba nani na kati na bau vandaka ya kuluta mfunu. Kuvandaka na bantumwa yankaka yina zolaka kuvanda ya kuluta mfunu na kati na bau. Kansi, yau kele mbi na kuvanda na bangindu ya mutindu yina. Inki Yezu salaka?

Yandi bingaka mwana ya bakala ya fyoti mpi tulaka yandi na ntwala na bau. Na nima, yandi tubaka na balongoki na yandi nde: ‘Beno zaba mbote nde: kana beno kituka ve bonso bana ya fyoti, beno lenda ve kukota na Kimfumu ya Nzambi. Yina takudikumisa bonso mwana yai ya fyoti, yandi yina tavanda ya kuluta nene na Kimfumu.’ Sambu na nki Yezu tubaka mutindu yina?

Yau kele sambu bana ya fyoti kekudiyangisaka ve na kuzaba kana bau luta bankaka. Na yau, bantumwa fwete baka mbandu na bau na kisika ya kutubana sambu na kuzaba nani vandaka ya kuluta mfunu.

Mbala mingi, Yezu monisaka mutindu yandi vandaka kuzola bana ya fyoti. Na nima ya mwa bangonda, bantu natilaka yandi bana ya fyoti. Bantumwa zolaka kukula bau, kansi Yezu tubilaka bau nde: ‘Beno bika bana ya fyoti kukwisa na mono, sambu Kimfumu ya Nzambi kele na bantu yina kefwanana na bau.’ Na yau, Yezu bakaka bana ya fyoti na maboko na yandi mpi sambulaka bau. Keti yau kepesa kikesa ve na kuzaba nde Yezu kezolaka bana ya fyoti?

Matayo 18:1-4; 19:13-15; Marko 9:33-37; 10:13-16.



Bangyufula

  • Sambu na nki bantumwa vandaka kutubana na nzila ntangu bo katukaka na nzyetelo na bo ya nda?
  • Sambu na nki Yezu kubingaka mwana-bakala ya fyoti mpi yandi tulaka yandi na katikati ya bantumwa?
  • Na nki mutindu yo lombaka nde bantumwa kulonguka na kuvanda bonso bana ya fyoti?
  • Mwa bangonda na nima, inki mutindu Yezu kumonisaka nde yandi kezolaka bana ya fyoti?

Bangyufula ya ngika

  • Tanga Matayo 18:1-4.

    Sambu na nki Yezu vandaka kusadila bingana na kulonga na yandi? (Mat. 13:34, 36; Mar. 4:33, 34)

  • Tanga Matayo 19:13-15.

    Inki bikalulu ya bana ya fyoti beto fwete landa kana beto kezola kubaka balusakumunu ya Kimfumu? (Nk. 25:9; 138:6; 1 Kor. 14:20)

  • Tanga Marko 9:33-37.

    Yezu kulongaka balongoki na yandi nki na yina metala kusosa kubaka bisika ya lukumu? (Mar. 9:35; Mat. 20:25, 26; Gal. 6:3; Filp. 2:5-8)

  • Tanga Marko 10:13-16.

    Na nki mutindu bantu vandaka kumona ve mpasi na kusolula ti Yezu, mpi nki dilongi Bakristu yina kele bankuluntu lenda baka na mbandu na yandi? (Mar. 6:30-34; Filp. 2:1-4; 1 Tim. 4:12)