Kwenda na mambu ke na kati

Kwenda na tansi ya malongi

Nkenda ya 93: Yezu me disa bantu mingi

Nkenda ya 93: Yezu me disa bantu mingi

KIMA ya ngolo mesalama: bau mefwa Yoani Mbotiki. Hérodiade, yina vandaka kuzola Yoani ve, pusaka bakala na yandi yina vandaka ntotila na kutinda bantu mpi bau zengaka ntu ya Yoani.

Ntangu Yezu waka nsangu yina, yandi vandaka na kyadi mingi. Yandi kwendaka kudivandila na kingenga, na nseke. Kansi bantu vandaka kaka kulanda yandi. Ntangu yandi monaka bantu yina mingi, Yezu wilaka bau mawa mingi, yandi tubilaka bantu mambu ya metala kimfumu ya Nzambi mpi yandi yantikaka na kubelula bambefo.

Na ntangu ya nkokila, balongoki na yandi kwisaka kutubila yandi nde: ‘Ntangu meluta. Bika bantu yai yonso kukwenda na babwala ya mfinama mpi kudisumbila madya.’

Yezu kedisa kibuka ya bantu

Yezu tubilaka bau nde: ‘Yau kele mfunu ve nde bau kwenda. Beno pesa bau madya.’ Na nima yandi yufulaka Filipe nde: ‘Wapi beto lenda sumba madya sambu na kupesa bantu yai yonso?’

Filipe vutudilaka yandi nde: ‘Kaka sambu na kupesa madya na konso muntu, yau kelomba mbongo mingi.’ Ebuna andré tubilaka yandi nde: ‘Awa kele na mwana mosi ya bakala kele na mampa tanu na bambisi ya masa zole. Kansi, keti yau talunga na bantu yai mingi?’

Yezu tubaka nde: ‘Beno songa bantu yonso na kuvanda na zulu ya matiti.’ Yandi pesaka matondo na Nzambi sambu na madya mpi yantikaka na kuzenga yau. Na nima, balongoki yantikaka na kukabisa yau na kibuka ya bantu yina vandaka pana. Babakala vandaka 5 000, mafunda ya bankento ti ya bana na kingenga. Konso muntu dyaka mpi fulukaka. Ntangu balongoki lokutaka madya yina bikalaka, bau fulusaka bitunga 12!

Na nima ya kubwa ya ntangu, Yezu songaka balongoki na yandi na kukota na bwatu sambu na kusabuka Masa ya Galilée. Kansi, na mpimpa yina, kitembo ya ngolo kwisaka mpi bwatu vandaka kunikana ngolo. Balongoki waka boma. Na mbala mosi, na kati ya mpimpa, bau monaka muntu kuvandaka kwisa na ndambu na bau na kutambulaka na zulu ya masa. Bau bokaka ngolo sambu na boma.

Yezu tubilaka bau nde: ‘Beno wa boma ve. Yai mono!’ Ebuna Pierre tubilaka yandi nde: ‘Kana yau kele nge, pesa mono nswa ya kwisa kukuta nge na zulu ya masa.’ Yezu tubaka: ‘Kwisa!’ Pierre basikaka na bwatu mpi yantikaka na kutambula na zulu ya masa! Kansi yandi titaka mpi yantikaka na kudinda. Nswalu, Yezu simbaka yandi.

Na nima, Yezu disaka dyaka bantu mingi, mbala yai na mampa nsambwadi mpi bambisi ya masa. Mpi, bantu yonso dyaka mpi fulukaka. Keti beto kele na kyese ve na kumona mutindu Yezu kesadisa bantu? Na luyalu na yandi, beto takonda ata kima mosi ve!

Matayo 14:1-32; 15:29-38; Yoane 6:1-21.



Bangyufula

  • Inki dyambu ya mpasi mpenza kukuminaka Yoane-Mbotiki, mpi nki mutindu Yezu kudiwaka sambu na dyambu yango?
  • Inki mutindu Yezu kudisaka kimvuka ya bantu yina kulandaka yandi, mpi nki kiteso ya madya kubikalaka?
  • Sambu na nki balongoki vandaka kuwa boma na mpimpa, mpi nki kukuminaka Piere?
  • Inki mutindu Yezu kudisaka mafunda ya bantu na mbala ya zole?
  • Sambu na nki luzingu tavanda mbote mpenza ntangu Yezu tayala ntoto bonso Ntotila ya Nzambi?

Bangyufula ya ngika

  • Tanga Matayo 14:1-32.

    Disolo yina kele na Matayo14:23-32 kesadisa beto na kubakisa nki dyambu ya metala kimuntu ya Piere?

    Inki mutindu masolo ya Masonuku kemonisa nde Piere kuyelaka mpi yandi bikaka kikalulu na yandi ya ntima zulu-zulu? (Mat. 14:27-30; Yoa. 18:10; 21:7; Bis. 2:14, 37-40; 1 Pie. 5:6, 10)

  • Tanga Matayo 15:29-38.

    Inki mutindu Yezu kumonisaka luzitu sambu na bima ya kinsuni yina kekatukaka na Tata na yandi? (Mat. 15:37; Yoa. 6:12; Kol. 3:15)

  • Tanga Yoane 6:1-21.

    Bubu yai, inki mutindu Bakristu lenda landa mbandu ya Yezu na yina metala kuzitisa bamfumu ya luyalu? (Yoa. 6:15; Mat. 22:21; Roma 12:2; 13:1-4)