Kwenda na mambu ke na kati

Kwenda na tansi ya malongi

Nkenda ya 89: Yezu ke sukula tempelo

Nkenda ya 89: Yezu ke sukula tempelo

BENO tala Yezu. Yandi kele na makasi. Beno zaba sambu na inki? Yau kele sambu bantu yankaka ya mekwisa na tempelo ya Nzambi kele na nzala ya mbongo, mpi kesosa na kuvwama na mbongo ya bantu yina kekwisa kusambila Nzambi na Nzo na yandi.

Yezu kebalula bamesa yina kele na mbongo

Keti beno kemona na kifwanisu bana bangombe yina yonso, mameme mpi mayembe? Bantu vandaka kuteka bitwisi yai na tempelo. Sambu na inki? Sambu bana ya Israele vandaka na mfunu na yau sambu na bimenga yina bau vandaka kutambika na Nzambi.

Na kulandaka nsiku ya Nzambi, konso muntu ya Israele yina vandaka kusala masumu, fwete tambika kimenga. Yau vandaka mpi ti bantangu yankaka yina yau lombaka nde bana ya Israele kupesa makabu. Kansi, wapi bana ya Israele lungaka kusumba bitwisi yina bau fwete tambika na Nzambi?

Bana ya Israele yankaka kuvandaka na bitwisi mpi lendaka kutambika yau na bimenga, kansi bamingi na kati na bau kuvandaka na yau ve mpi bankaka vandaka kuzinga ntama ti Yerusaleme, mpi yau vandilaka bau mpasi na kunata kitwisi mosi tii na tempelo. Sambu na yau, bau vandaka kusumba kaka kisika yina. Kansi bateki ya tempelo vandaka mbi: bau vandaka kuteka bitwisi na bau na ntalu mingi. Mpi sambu na kinkita na bau, bau lungaka ve kusadila yau na tempelo ya Nzambi.

Na yau beto kezaba sambu na nki Yezu kuwaka makasi mingi. Na makasi na yandi yina, yandi nangulaka bamesa ya bantu yina vandaka kusoba mbongo mpi mwangaka mbongo na bau. Yandi bakaka nsinga, mpi salaka fimbu. Yandi kulaka bambisi yonso na tempelo. Na nima, yandi tubaka na bateki mayembe nde: ‘Beno katula bima yai awa! Yau kele nzo ya Tata na mono. Beno kumisa yau ve nzo ya kinkita.’

Balongoki yankaka fidisaka Yezu na tempelo na Yerusaleme. Bau yitukaka mingi na kumona mambu yina Yezu kusalaka. Na nima, bau yibukaka nde na kati ya Bible, bau tubilaka sambu na yandi nde: ‘Zola na mono sambu na nzo na nge, kepela na ntima na mono bonso tiya.

Ntangu Yezu vandaka na Yerusaleme sambu na nkinsi ya Pake, yandi salaka bidimbu ya nkumbwa mingi. Na nima, Yezu katukaka na Judée sambu na kuvutuka na Galilée. Sambu na yau, yandi sabukaka Samaria. Beto tala nki mambu bwaka na Samaria.

Yoane 2:13-25; 4:3, 4.



Bangyufula

  • Sambu na nki bantu vandaka kuteka bambisi na tempelo?
  • Inki kupesaka Yezu makasi?
  • Mutindu nge lenda mona yo na kifwanisu, Yezu kesala inki, mpi yandi tubilaka bantu yina vandaka kuteka mayembe inki?
  • Ntangu balongoki ya Yezu monaka mambu yina yandi vandaka kusala, inki mambu bo yibukaka?
  • Inki distrike Yezu kusabukaka ntangu yandi vandaka kuvutuka na Galilea?

Ngyufula ya ngika

  • Tanga Yoane 2:13-25.

    Na kutadila mutindu Yezu kuwilaka bantu yina vandaka kushanze mbongo na tempelo makasi, inki kele mutindu ya mbote ya kutadila bisalu ya metala mumbongo na kati ya Nzo ya Kimfumu? (Yoa. 2:15, 16; 1 Kor. 10:24, 31-33)