Kwenda na mambu ke na kati

Kwenda na tansi ya malongi

Nkenda ya 86: Bantu kulandaka mbwetete

Nkenda ya 86: Bantu kulandaka mbwetete
Bandwenga

BENO kemona mbwetete yai kengenga mpi ya muntu kesonga na musapi? Yau basikaka ntangu bau katukaka Yerusaleme. Bantu yai kele bandwenga ya katukaka na Esti mpi bau keyindula nde mbwetete yai ya mpa kenata bau na muntu mosi ya nene.

Ntangu bau kumaka na Yerusaleme, bau yufulaka nde: ‘Wapi mwana yina fwete kuma ntotila ya Bayuda?’ “Bayuda” kele mutindu yankaka ya beto kebingilaka bana ya Israele. ‘Sambu beto memona mbwetete na yandi na Esti mpi beto mekwisa sambu na kusambila yandi.’

Ntangu ntotila Hérode waka nsangu yina, bangindu na yandi kumaka kisakasaka. Yandi vandaka kuzola ve nde ntotila mosi kuyinga yandi. Na yau yandi bingaka bamfumu ya banganga mpi yufulaka bau wapi fwete butuka ntotila ya mpa. Bau vutulaka nde: ‘Bible ketuba nde na Betleheme.’

Na kuwaka yau, Hérode bingaka bandwenga yina mpi tubilaka bau nde: ‘Beno kwenda kuna mpi ntangu beno tamona mwana, beno kwisa kuzabisa mono. Mono mpi takwenda kusambila yandi.’ Na kutuba kyeleka, yandi vandaka kusosa na kufwa yandi!

Bandwenga yina yantikaka na kukwenda. Mbwetete vandaka kusonga bau nzila tii na Betleheme. Yau telamaka na zulu ya nzo yina Yezu vandaka. Bau kotaka na nzo mpi monaka Maria ti Yezu. Bau basisaka makabu mpi bau pesaka yau na Yezu. Na nima, Jéhovah zabisaka bau na ndosi nde bau vutukila ve na nzila ya Hérode. Bau vutukaka na nsi na bau na kulandaka nzila yankaka.

Ntangu Hérode waka nde bandwenga mevutuka na nzila yankaka, yandi waka makasi. Yandi tindaka bantu na Betleheme sambu na kufwa bana yonso ya babakala bayina vandaka na bamvula zole tii na nsi. Kansi Joseph yina kuzabaka yau na ndosi, tinaka na mwana ye mama na Egypte. Na nima, Hérode fwaka, mpi Joseph vutukaka na nsi ya Israele mpi kwisaka kutunga na Nazareti ti Maria mpi Yezu. Yezu yelaka kisika yina.

Nani ngengisaka mbwetete yina ya mpa? Beto vila ve nde bandwenga kwendaka ntete na Yerusaleme na nima ya kumona mbwetete. Satana Dyabulu, yina vandaka kuzola kufwa Mwana ya Nzambi, zabaka nde Hérode tasosa na kufwa yandi. Yau kele yandi muntu kungengisaka mbwetete yina.

Matayo 2:1-23; Mishe 5:2.



Bangyufula

  • Babakala yina kele na kifwanisu kele banani, mpi sambu na nki mosi na kati na bo kesonga musapi na mbwetete yina kengenga?
  • Sambu na nki Ntotila Erode kuwaka makasi, mpi yandi salaka inki?
  • Mbwetete yina vandaka kungenga kutwadisaka babakala yina na wapi, kansi sambu na nki bo vutukaka na insi na bo na nzila yankaka?
  • Inki nsiku Erode kupesaka, mpi sambu na inki?
  • Inki Yehowa kusongaka Yozefi na kusala?
  • Nani kungengisaka mbwetete yina ya mpa, mpi sambu na inki?

Ngyufula ya ngika

  • Tanga Matayo 2:1-23.

    Yezu kuvandaka ti bamvula ikwa mpi yandi vandaka kuzinga na wapi ntangu bandwenga kwendaka kutala yandi? (Mat. 2:1, 11, 16)