Kwenda na mambu ke na kati

Kwenda na tansi ya malongi

Nkenda ya 80: Kikanda ya Nzambi me katuka Babilone

Nkenda ya 80: Kikanda ya Nzambi me katuka Babilone

KITESO ya bamvula zole kulutaka yantika Babilone kubwaka na maboko ya Bamedes na Baperese. Mpi tala mambu keluta ntangu yai! Bana ya Israele kebasika na Babilone. Inki mutindu bau mebasika? Nani mepesa bau nswa ya kukwenda?

Yau kele Sirus ntotila ya Perse. Ntama na ntwala ya lubutuku ya Sirus, Jéhovah sonikaka mambu yai sambu na yandi na kusadilaka mbikudi Esaïe: ‘Byelo tabikala ya kukangula sambu nge kukota mpi kubaka mbanza.’ Sirus nwanisaka Babilone mpi bakaka yau. Bamedes na Baperse kotaka na mpimpa na mbanza na kulutaka na byelo ya kukangula.

Kansi mbikudi Esaïe tubaka mpi nde Sirus tapesa nswa ya kutungisa dyaka Yerusaleme mpi tempelo na yau. Keti nsiku yina pesamaka? Inga. Tala mambu ya Sirus tubaka na bana ya Israele: ‘Beno kwenda mpi beno tunga tempelo ya Jéhovah, Nzambi na beno.’ Bantu yonso yai ya beno kemona na kifwanisu kele na ngindu yina.

Bana ya Israele kebasika na Babilone

Bana ya Israele yonso lungaka ve kusala nzyetelo yantika Babilone tii Yerusaleme. Yau vandaka nzyetolo ya nda ya kiteso ya bakilometre 800. Mingi kumaka minunu to vandaka na maladi. Kansi bantu yankaka bikalaka sambu na mambu yankaka. Na bantu yina bikalaka, Sirus tubaka nde: ‘Beno pesa mbongo, wolo mpi makabu yankaka na bayina kekwenda kutunga dyaka Yerusaleme na tempelo na yau.’

Na yau, bau pesaka makabu na bana ya Israele yina vandaka kukwenda na Yerusaleme. Sirus vutudilaka bau malonga na makopa yina Ntotila Nebukadenezar bakaka na tempelo ya Jéhovah, na ntangu yandi fwaka Yerusaleme. Na yau, bantu kuvutukaka maboko mpamba ve.

Na nima ya kutambula kiteso ya bangonda iya, bana ya Israele kumaka na Yerusaleme na ntangu yina silamaka. Ya kyeleka, mvula 70 lungaka banda mbanza fwaka mpi insi bikalaka mpamba. Kansi bantu ya Israele yina vutukaka vandaka na bampasi mingi na ntwala na bau.

Yezaya 44:28; 45:1-4; Esdrasi 1:1-11.



Bangyufula

  • Mutindu kifwanisu kemonisa yo, bantu ya Izraele kele na kusala inki?
  • Inki mutindu Sirusi kulungisaka mbikudulu yina Yehowa kutubaka na nzila ya Yezaya?
  • Inki mambu Sirusi kutubaka na bantu ya Izraele yina kukukaka ve kuvutuka na Yeruzalemi?
  • Inki bima Sirusi kupesaka bantu sambu bo vutula na Yeruzalemi?
  • Bantu ya Izraele kusalaka bilumbu ikwa sambu na kuvutuka na Yeruzalemi?
  • Bamvula ikwa kulutaka banda insi kubikalaka ya mpamba?

Bangyufula ya ngika

  • Tanga Yezaya 44:28 mpi 45:1-4.

    Inki mutindu Yehowa kumonisaka nde mbikudulu yina kutadilaka Sirusi talungana mpenza? (Yez. 55:10, 11; Roma 4:17)

    Mbikudulu ya Yezaya yina ketadila Sirusi kemonisa nki na yina metala mayele ya Yehowa Nzambi ya kutuba na ntwala mambu yina yandi tasala na bilumbu kekwisa? (Yez. 42:9; 45:21; 46:10, 11; 2 Pie. 1:20)

  • Tanga Esdrasi 1:1-11.

    Na kulanda mbandu ya bantu yina kukukaka ve kuvutuka na Yeruzalemi, bubu yai nki mutindu beto lenda ‘sadisa’ bantu yina kezola kusala kisalu ya ntangu yonso? (Esd. 1:4, 6; Roma 12:13; Kol. 4:12)