Kwenda na mambu ke na kati

Kwenda na tansi ya malongi

Nkenda ya 77: Bau buyaka na kufukimina kiteki

Nkenda ya 77: Bau buyaka na kufukimina kiteki

BENO kezaba dyaka banduku tatu ya Daniel bayina buyaka na kudya madya ya mesa na ntotila? Bantu ya Babilone bingaka bau Sadrak, Mesak, na Abednego. Sambu na nki bau kefukama ve bonso bantu yonso na ntwala ya kiteki yina ya wolo ya Nebukadenezar kutungisaka? Tala kifwanisu.

Beno kezaba dyaka bansiku yina Jéhovah yandi mosi kusonikaka mpi ya bantu kebingaka Bansiku Kumi? Nsiku ya ntete ketuba mutindu yai: ‘Nge lenda sosa banzambi yankaka ve na meso na mono.’ Batoko yai buyaka na kukulula nsiku yai, ata yo vandaka ve mpasi na kusala yau.

Nebukadenezar, ntotila ya Babilone, kubingaka bantu mingi ya mfunu sambu na kukembila kiteki yina yandi sadisaka. Ntangu bantu yonso kutanaka, yandi tindaka muntu kutuba mutindu yai: ‘Ntangu beno tawa miziki, beno tafukama na ntwala ya kifwanisu. Konso muntu yina tafukama ve, talosama na fulu ya tiya mingi.’

Na kuwaka nde Sadrak, Mesak na Abednego kufukamaka ve, Nebukadenezar kuwaka makasi mingi. Yandi bingisaka batoko yonso tatu na ntwala na yandi mpi yandi tubilaka bau na kufukama ntangu miziki tabula dyaka. Kansi, batoko yina kutulaka ntima na Jéhovah. Bau tubilaka yandi nde: ‘Nzambi na beto lenda kugulusa beto. Ata yandi kugulusaka beto ve, beto tafukama ve na ntwala ya kifwanisu na nge ya wolo.’

Sadrak, Mesak, mpi Abednego

Na ndinga yina, Nebukadenezar kuwaka makasi mingi. Penepene na kisika yina, fulu mosi ya tiya vandaka mpi ntotila tubaka na kukumisa yau tiya kuluta mbala nsambwadi! Na nima, yandi tindaka bantu na yandi ya kikesa na kukanga batoko yina bansinga mpi na kulosa bau na fulu ya tiya. Fulu vandaka ya kuluta tiya mpi bantu yina ya kikesa fwaka. Kansi nki bwilaka batoko na beto tatu?

Ntotila talaka na fulu mpi kuwaka mpenza boma. Yandi yulaka nde: ‘Keti beto losaka ve bantu tatu ya kukangisa bansinga?’

Bansadi ndimaka nde: ‘Inga.’

Ntotila tubaka nde: ‘Mono kemona bantu iya ketambula-tambula na kati ya tiya; ata bampasi mebwila bau ve. Mpi muntu ya iya kemonana bonso nzambi.’ Ebuna, ntotila pusanaka na kyelo ya fulu mpi bokaka nde: ‘Sadrak! Mesak! Abednego! Bansadi ya Nzambi ya Kuluta Kuzanguka, beno basika mpi beno kwisa!’

Ntangu bau basikaka, bantu monaka nde bau vandaka ata na mputa ve. Ebuna ntotila tubaka nde: ‘Bika luzitu kuvanda na Nzambi ya Sadrak, ya Mesak mpi ya Abednego! Yandi metinda wanzyo na yandi mpi megulusa bau sambu bau mezola ve kusambila banzambi yankaka, kaka Nzambi na bau kibeni.’

Keti yai kele ve mbandu ya mbote ya kwikama na Jéhovah yina beto fwete landa?

Kubasika 20:3; Daniele 3:1-30.



Bangyufula

  • Nabukodonozore, ntotila ya Babilone, kulombaka bantu na kusala inki?
  • Sambu na nki banduku tatu ya Daniele kufukiminaka ve kiteki ya wolo?
  • Ntangu Nabukodonozore kupesaka Baebreo yina tatu dibaku yankaka sambu na kufukama, inki mutindu bo monisaka nde bo vandaka kutula ntima na Yehowa?
  • Nabukodonozore kusongaka bantu na yandi na kusala Shadraki, Meshaki ti Abedinego inki?
  • Inki Nabukodonozore kumonaka ntangu yandi talaka na fulu?
  • Sambu na nki ntotila kukumisaka Nzambi ya Shadraki, Meshaki ti Abedinego, mpi nki mbandu bo kepesa beto?

Bangyufula ya ngika

  • Tanga Daniele 3:1-30.

    Inki nkadilu yina baleke tatu ya Baebreo kumonisaka bansadi ya Nzambi yonso fwete landa ntangu bo kekutana ti mambu yina ketulaka lukwikilu na kumekama? (Dan. 3:17, 18; Mat. 10:28; Roma 14:7, 8)

    Inki dilongi ya mfunu Yehowa Nzambi kulongaka Nabukodonozore? (Dan. 3:28, 29; 4:34-4:1)