Kwenda na mambu ke na kati

Kwenda na tansi ya malongi

Nkenda ya 64: Salomon tungaka tempelo

Nkenda ya 64: Salomon tungaka tempelo

NA NTWALA ya kufwa, ntotila David pesaka na Salomon plan ya tempelo ya Jéhovah. Yau kele na nima ya bamvula iya ya luyalu na yandi Salomon yantikaka na kutunga tempelo. Yau manaka na kutunga bamvula nsambwadi na ndambu na nima. Mafunda na mafunda ya bansadi salaka bisalu yina, mpi yau bakaka mbongo mingi. Yau kele sambu bau sadilaka wolo ti bibende mingi.

Tempelo vandaka na basuku zole ya mfunu kibeni, bonso nzo-tenta, kansi biteso na yau lutaka mbala zole yina ya ntete. Salomon kotisaka sanduku na suku mosi yina ya nima; kansi na suku yina yankaka, bima yankaka mutindu yau vandaka na nzo-tenta.

Ntangu bau manisaka na kutunga tempelo, nkinsi ya ngolo salamaka. Salomon fukamaka na ntwala ya bantu yonso mpi sambaka (tala kifwanisu). Yandi tubaka na Jéhovah nde: ‘Zulu mpi zulu ya bazulu kulunga ve na nge. Inki mpila nge lunga kukota na nzo yai ya mono metunga. Kansi, Nzambi na mono, wila bisambu ya kikanda na nge ntangu bau tasambila na kisika yai.’

Ntotila Salomon kesamba

Ntangu Salomon manisaka kisambu na yandi, tiya katukaka na zulu, yau bwaka mpi yau yokaka bambisi yina bau tambikaka na kimenga. Mpi tempelo fulukaka na nsemo ya ngolo. Yau vandaka kidimbu nde Jéhovah waka kisambu mpi ndimaka nzo ya basantu ya Salomon. Yantika ntangu yina, tempelo kumaka kisika ya lusambu ya bantu yonso kansi nzo-tenta dyaka ve.

Bamvula mingi, Salomon yalaka bantu ti ngangu yonso. Kansi ntotila kwelaka bankento mingi ya nzenza yina vandaka kusambila Jéhovah ve. Keti beno kemona nkento mosi na ntwala ya kiteki na yandi? Bankento na yandi bendaka yandi na lusambu ya banzambi ya luvunu. Keti beno kezaba mambu yina kubwaka ntangu Salomon kusalaka mutindu yina? Yandi talaka dyaka ve kikanda ya Nzambi na mawete. Yandi kumaka mbi mpi bantu vandaka na mawa.

Ntotila Salomo kesambila kiteki

Jéhovah waka makasi mingi mpi tubaka na Salomon nde: ‘Mono kekatula nge kimfumu mpi mono tapesa yau na muntu yankaka. Mono tasala yau ve na luzingu na nge kansi na luyalu ya mwana na nge. Kansi, mono tabotula yandi ve bantu yonso ya kimfumu.’ Beto tala nki mpila ndinga yina lunganaka.

1 Bansangu 28:9-21; 29:1-9; 1 Bantotila 5:1-18; 2 Bansangu 6:12-42; 7:1-5; 1 Bantotila 11:9-13.



Bangyufula

  • Salomo manisaka kutunga tempelo ya Yehowa na nima ya bamvula ikwa, mpi sambu na nki yo lombaka mbongo mingi?
  • Tempelo kuvandaka ti basuku ikwa, mpi nki bo tulaka na suku yina ya nima?
  • Inki mambu Salomo kutubaka na kisambu na yandi ntangu bo manisaka kutunga tempelo?
  • Inki mutindu Yehowa kumonisaka nde yandi sepelaka ti kisambu ya Salomo?
  • Bankento ya Salomo kubendaka yandi na kusala inki, mpi nki kubwilaka yandi?
  • Sambu na nki Yehowa kuwilaka Salomo makasi, mpi Yehowa kuzabisaka yandi inki?

Bangyufula ya ngika

  • Tanga 1 Bansangu 28:9, 10.

    Na kutadila bangogo ya Davidi yina kele na 1 Bansangu 28:9, 10, beto fwete sala kikesa na kusala nki na luzingu na beto ya konso kilumbu? (Nk. 19:15; Filp. 4:8, 9)

  • Tanga 2 Bansangu 6:12-21, 32-42.

    Inki mutindu Salomo kumonisaka nde Nzambi ya Kuluta Kuzanguka kevandaka ve na banzo yina bantu ketungaka? (2 Bans. 6:18; Bis. 17:24, 25)

    Bangogo ya Salomo yina kele na 2 Bansangu 6:32, 33 kemonisa nki na yina metala Yehowa? (Bis. 10:34, 35; Gal. 2:6)

  • Tanga 2 Bansangu 7:1-5.

    Kaka mutindu kumona lukumu ya Yehowa vandaka kupusa bana ya Izraele na kukumisa yandi, bubu yai nki beto fwete sala ntangu beto kemona mutindu Yehowa kesakumuna bantu na yandi? (2 Bans. 7:3; Nk. 22:22; 34:2; 96:2)

  • Tanga 1 Bantotila 11:9-13.

    Inki mutindu luzingu ya Salomo kemonisa mfunu ya kubikala ya kwikama tii na nsuka? (1 Bant. 11:4, 9; Mat. 10:22; Kus. 2:10)