Kwenda na mambu ke na kati

Kwenda na tansi ya malongi

Nkenda ya 63: Salomon ntotila ya mayele

Nkenda ya 63: Salomon ntotila ya mayele

SALOMON vandaka leke ntangu yandi kumaka ntotila. Yandi kangamaka na Jéhovah mpi landaka ndongisila yina tata na yandi David pesaka yandi. Jéhovah vandaka kuyangalala mingi sambu na Salomon, mpi mpimpa mosi yandi kwisilaka yandi na ndosi mpi tubilaka yandi nde: ‘Inki nge kezola mono kupesa nge?’

Salomon vutulaka nde: ‘Jéhovah, mono kele leke mpi mono kezaba ve nki mpila kuyala bantu. Pesa mono ngangu ya kufwana sambu na kuyala mbote kikanda na nge.’

Jéhovah monaka kyese na kisambu yina mpi tubaka nde: ‘Sambu nge melomba ngangu, kansi nge melomba ve luzingu ya nda to kimvwama, mono tapesa nge mayele ti ngangu, na kiteso ya bau mezwa yau ntete ve na ntwala na nge. Ebuna mono kepesa nge mpi ata bima yina ya nge melomba ve: na kimvwama na nkembo.’

Na nima ya mwa bilumbu, bankento zole kwisaka na Salomon. Nkento mosi tubaka nde: ‘Beto kezinga nzo mosi na nkento yai. Ebuna mono butaka mwana. Na nima ya bilumbu zole, nkento yai butaka mpi. Na mpimpa mosi, mwana na yandi fwaka. Yandi bakaka mwana na mono yina vandaka na lweka na mono mpi yandi yingisaka mwana na yandi ya kufwa na kisika yina. Ntangu mono telamaka, na suka, mono talaka mwana yina ya kufwa, yandi vandaka ya mono ve.’

Kansi nkento yankaka tubaka nde: ‘Luvunu! Mwana yai ya moyo kele ya mono!’ Kansi nkento ya ntete vutulaka nde: ‘Ikele ve! Mwana na nge yandi yai ya kufwa!’ Bau vandaka kuswana mutindu yina na ntwala ya ntotila. Salomon salaka inki?

Ntotila lombaka mbele mpi tubaka nde: ‘Beno zenga na kati-kati mwana yai kele na moyo. Beno pesa ndambu yankaka na nkento yai mpi ndambu yankaka na nkento yina.’

Nkento nkwa mwana ya moyo bokaka nde: ‘Ve, beno fwa mwana ve! Beno pesa yandi mwana.’ Kansi nkento yankaka tubaka nde: Ikele ve! Beno pasula yandi. Yandi tavanda ya mono ve, ya yandi mpi ve.’

Ntotila Salomon keyidika dikambu mosi ya mpasi

Pana ntotila tubaka nde: ‘Beno pesa mwana ya moyo na nkento ya ntete! Mama na yandi ya kyeleka, yandi yina kibeni.’ Salomon kudikusaka ve: mama ya kyeleka zolaka ngolo mwana na yandi yau yina yandi ndimaka na kupesa yandi na nkento yina yankaka na kisika ya kumona yandi kufwa. Ntangu bantu ya Israele kuwaka nkanu ya Salomon zengaka, bau waka kyese na kuvanda na ntotila ya mutindu yina.

Na luyalu ya Salomon, Nzambi sambulaka kikanda na kupesaka yau madya mingi. Nsi butaka bankeni mingi na bambuma. Bantu vandaka kulwata bilele ya kitoko mpi vandaka kuzinga na banzo ya kitoko. Bantu yonso vandaka na kyese.

1 Bantotila 3:3-28; 4:29-34



Bangyufula

  • Inki ngyufula Yehowa kuyulaka Salomo, mpi nki mvutu yandi pesaka?
  • Sambu Yehowa kusepelaka ti bima yina Salomo kulombaka, inki yandi silaka na kupesa yandi?
  • Inki dikambu ya mpasi bankento zole kunataka na Salomo?
  • Mutindu nge kemona yo na kifwanisu, inki mutindu Salomo kuzengaka dikambu yango?
  • Luyalu ya Salomo kuvandaka bonso inki, mpi sambu na inki?

Bangyufula ya ngika

  • Tanga 1 Bantotila 3:3-28.

    Inki dilongi babakala yina bo mepesaka mikumba na organizasio ya Nzambi bubu yai lenda baka na kisambu ya masonga ya kele na 1 Bantotila 3:7 yina Salomo kusalaka? (Nk. 119:105; Bing. 3:5, 6)

    Inki mutindu kisambu ya Salomo kele mbandu ya mbote ya kemonisa bima yina beto fwete lomba na bisambu na beto? (1 Bant. 3:9, 11; Bing. 30:8, 9; 1 Yoa. 5:14)

    Mutindu Salomo kuzengaka dikambu yina kubwaka na kati ya bankento zole kepesa beto nki kivuvu na yina metala luyalu ya bilumbu kekwisa ya Salomo ya Nene, Yezu Kristu? (1 Bant. 3:28; Yez. 9:5, 6; 11:2-4)

  • Tanga 1 Bantotila 5:9-14.

    Inki mvutu Yehowa kupesaka na kisambu yina Salomo kusalaka sambu na kulomba ntima ya bulemfu? (1 Bant. 5:9)

    Na kutadila bikesa yina bantu vandaka kusala sambu na kuwa mayele ya Salomo, inki mutindu beto fwete tadila kulonguka ya Ndinga ya Nzambi? (1 Bant. 5:9, 14; Yoa. 17:3; 2 Tim. 3:16)