Kwenda na mambu ke na kati

Kwenda na tansi ya malongi

Nkenda ya 61: David me kuma ntotila

Nkenda ya 61: David me kuma ntotila

SAÜL sosaka dyaka na kufwa David. Yandi bakaka basoda 3 000 mpi landaka yandi. David kuwaka mambu yai. David tindaka bantu sambu na kuzikisa wapi Saül ti basoda na yandi kubumbanaka mpi yandi zabaka yau. Ebuna, yandi tubaka na bantu na yandi zole nde: ‘Nani kezola kufidisa mono na camp ya Saül?’

Davidi kebinga Ntotila Saül

Abisayi mwana ya Zeruiah mpi mpangi ya David ndimaka. Ntangu bau kumaka na kisika yina, David na Abisayi kutaka bantu yonso melala. Bau kotaka malembe tii penepene ya Saül. Bau bakaka dyonga mpi dibungu ya ntotila mpi bau vutukaka; ata muntu mosi monaka bau ve.

Tala ntangu yai David na Abisayi. Bau mebasika na camp ata kigonsa ve mpi mekwenda kubumbana na nsongi ya ngumba mosi. Ebuna, David bokaka na Abner, mfumu ya basoda ya Israele nde: ‘Abner, sambu na nki nge ketanina ve mfumu na nge, ntotila? Wapi dyonga mpi dibungu ya mfumu na nge?’

Saül telamaka, mpi waka nde yau vandaka ndinga ya David. Yandi yulaka nde: ‘Keti yau kele nge, David?’ Keti beno kemona Abner na Saül kuna na insi?

David vutulaka nde: ‘Inga, mfumu na mono ntotila. Sambu na nki ntotila kesosa na kufwa mono? Inki mambu ya mbi ya mono mesala? Tala dyonga na nge, yau yai ntotila. Mosi na bantu na nge kwisa kubaka yau.’

Ntotila Saül ti Abner

Saül kundimaka nde: ‘Mono mesala mbi. Mono mesala mambu ya buzoba.’ Ebuna, David fulaka nzila na yandi mpi Saül vutukaka na nzo na yandi. Kansi David kuditubilaka nde: ‘Kilumbu kele Saül tafwa mono. Mono ketina na nsi ya Bafilisti.’ Mpi yandi tinaka. David nungaka na kukusa Bafilisti nde banda ntangu yina yandi kumaka na ndonga na bau.

Kilumbu mosi, Bafilisti nwanisaka bana ya Israele. Saül na Jonathan fwaka na mvita yina. Nsangu ya lufwa na bau monisaka David ntantu, mpi yandi yimbaka nkunga ya kitoko sambu na bau. Na kati na yau, bangogo yai kele: ‘Mono mewa ntantu mingi sambu na nge Jonathan, mpangi na mono. Mono vandaka kutonda nge ngolo kibeni.’

Na nima ya mambu yina, David vutukaka na Israele mpi tungaka na Hebron. Mvita kubwaka na kati ya bantu yina vandaka kuzola nde Isch-Boschet, mwana ya Saül kukuma ntotila na bantu yina vandaka kuzola David na kuvanda ntotila. Bantu ya David nungaka. David vandaka na mvula 30 ntangu yandi kumaka ntotila. Yandi yalaka na Hebron bamvula nsambwadi na ndambu. Na kati ya bana yina yandi butaka, beto tanga Ammon, Absalom, mpi Adonija.

Kilumbu kumaka ya David na bantu na yandi tambulaka na Yerusaleme sambu na kubotula mbanza yai ya kitoko. Yau kele Joab, mwana yankaka ya Zeruiah, mpangi ya David ya nkento muntu kuyantikaka mvita yina. David kupesaka yandi lufutu na kutulaka yandi mfumu na basoda na yandi. Ebuna David yantikaka na kuyala na Yerusaleme.

1 Samuele 26:1-25; 27:1-7; 31:1-6; 2 Samuele 1:26; 3:1-21; 5:1-10; 1 Bansangu 11:1-9.



Bangyufula

  • Inki mambu Davidi ti Abishai kusalaka ntangu Saule vandaka kulala na camp na yandi?
  • Inki bangyufula Davidi kuyulaka Saule?
  • Na nima ya kubika Saule, Davidi kukwendaka na wapi?
  • Inki kupesaka Davidi ntantu mingi na mpila nde yandi sonika nkunga mosi ya kitoko?
  • Davidi kuvandaka ti bamvula ikwa ntangu bo tulaka yandi ntotila na Ebroni, mpi tanga mwa bazina ya bana na yandi ya babakala.
  • Na nima, na wapi Davidi kuyalaka bonso ntotila?

Bangyufula ya ngika

  • Tanga 1 Samuele 26:1-25.

    Bangogo ya Davidi yina kele na 1 Samuele 26:11 kemonisa nki nkadilu sambu na ndonga ya teokrasi? (Nk. 37:7; Roma 13:2)

    Kana beto kesala mpenza kikesa sambu na kumonisa zola ya ntima kansi bantu kemonisa ve ntonda sambu na yo, inki mutindu bangogo ya Davidi yina kele na 1 Samuele 26:23 lenda sadisa beto na kuvanda kaka na ngindu ya mbote? (1 Bant. 8:32; Nk. 18:21)

  • Tanga 2 Samuele 1:26.

    Bubu yai, inki mutindu Bakristu lenda yedisa ‘zola ya ngolo mpenza na kati na bo’ bonso zola yina Davidi mpi Yonatani kuvandaka na yo? (1 Pie. 4:8; Kol. 3:14; 1 Yoa. 4:12)

  • Tanga 2 Samuele 5:1-10.

    Davidi kuyalaka bonso ntotila na nsungi ya bamvula ikwa, mpi nki mutindu bo kabisaka nsungi yango? (2 Sam. 5:4, 5)

    Bunene ya Davidi kukatukaka na wapi, mpi nki mutindu yo kele ngibusa sambu na beto bubu yai? (2 Sam. 5:10; 1 Sam. 16:13; 1 Kor. 1:31; Filp. 4:13)