Kwenda na mambu ke na kati

Kwenda na tansi ya malongi

Nkenda ya 59: David kutinaka

Nkenda ya 59: David kutinaka

NTANGU David kunungaka Goliat, Abner, mfumu ya basoda ya Israele songaka yandi na Saül. Saül yangalalaka mingi sambu na David, mpi pesaka yandi kimfumu na kati ya basoda mpi tulaka yandi penepene na yandi.

Kilumbu mosi, basoda vutukaka na nima ya kununga Bafilisti, bankento yimbaka na kyese nde: ‘Saül mefwa bambeni mafunda mpi David mafunda na mafunda na mafunda.’ Kukumisa yina ya bau kumisaka David kumisaka Saül kimpala. Kansi mwana ya Saül, Jonathan vandaka na kimpala ve. Yandi zolaka David mpi David zolaka yandi. Bau zole kumaka banduku ya ngolo kibeni.

Ntotila Saül kelosa tolo-tolo

David vandaka kubula miziki mingi mpi Saül zolaka yau ngolo. Kansi kilumbu mosi, kimpala ya Saül kunataka yandi na kusala mbi. Ntangu David vandaka kubula miziki yandi bakaka dyonga mpi tubaka nde: ‘Mono kukangisa yandi na kibaka!’ Kansi David tinaka na lweka. Bilumbu yankaka na nima, Saül kuyunsaka dyaka kansi yandi kukaka ve. Yo yina, David zabaka nde yandi fwete kudikeba ngolo.

Beno kezaba dyaka kilaka ya Saül? Yandi lakaka na kukwedisa mwana na yandi ya nkento na muntu yina tafwa Goliat. Na nima, Saül tubilaka David nde yandi takwedisa yandi mwana na yandi ya nkento Mikal, kaka kana yandi kufwa Bafilisti 100. Yau kele mutambu! Saül vandaka kuyindula nde David tafwa na maboko ya Bafilisti, kansi David gulukaka na kigonsa yina mpi ntotila pesaka yandi mwana ya nkento.

Kilumbu mosi, Saül zabisaka na Jonathan mpi na bansadi na yandi luzolo na yandi ya kufwa David. Kansi Jonathan zolaka ve. Yandi tubilaka tata na yandi nde: ‘Kusala David mambi ve. Yandi mesala nge ntete mambi ve. Mambu yonso yandi mesala sambu na nge mesadisa nge. Yandi zolaka kufwa kilumbu yandi fwaka Goliat. Nge monaka yandi mpi nge waka kyese.’

David ketina tolo-tolo

Saül wilaka mwana na yandi mpi lakaka yandi nde yandi tafwa ve David. David vutukaka mpi yantikaka dyaka kisalu na yandi. Kansi, kilumbu mosi, David vandaka kubula miziki, mpi Saül losaka David dyaka dyonga na yandi. Yau vandaka sambu na mbala ya tatu! Ebuna, David monaka nde, yo lombaka kaka nde yandi tina!

Na mpimpa yina, David tinaka na nzo na yandi. Kansi Saül tindaka bantu sambu na kufwa yandi. Mikal, yina vandaka kuzaba ngindu ya tata na yandi, tubaka na David nde: ‘Kana nge tina ve, mbasi nge tavanda mvumbi.’ Kaka na mpimpa yina, Mikal tinisaka yandi na kubasisaka yandi na nela. Bamvula nsambwadi, David vandaka kuyungana sambu Saül vandaka kusosa kaka na kufwa yandi na kimpala na yandi.

1 Samuele 18:1-30; 19:1-18.



Bangyufula

  • Sambu na nki Saule kuwilaka Davidi kimpala, kansi nki mutindu mwana ya Saule, Yonatani, kuswaswanaka?
  • Inki kusalamaka kilumbu mosi ntangu Davidi vandaka kubudila Saule miziki?
  • Saule kutubaka nde Davidi fwete sala nki na ntwala ya kukwela mwana na yandi ya nkento Mikale, mpi sambu na nki Saule kutubaka mutindu yina?
  • Mutindu kifwanisu kemonisa yo, ntangu Davidi vandaka kubudila Saule miziki, inki kusalamaka sambu na mbala ya tatu?
  • Inki mutindu Mikale kusadisaka Davidi sambu na kugulusa yandi, mpi banda ntangu yina Davidi vandaka kusala nki na nsungi ya bamvula nsambwadi?

Bangyufula ya ngika

  • Tanga 1 Samuele 18:1-30.

    Inki mutindu zola ya ngolo yina Yonatani kuvandaka na yo sambu na Davidi kuvandaka kifwani ya zola yina kele na kati ya “mameme ya nkaka” ti “kibuka ya fyoti”? (1 Sam. 18:1; Yoa. 10:16; Luka 12:32, NW; Zak. 8:23)

    Sambu Yonatani muntu zolaka kuyinga na kisika ya Saule, inki mutindu 1 Samuele 18:4 kemonisa bulemfu ya kuluta mingi yina Yonatani kuvandaka na yo na muntu yina Nzambi kuponaka sambu na kuvanda ntotila?

    Inki mutindu mbandu ya Saule kemonisa nde kimpala lenda nata na disumu ya nene, mpi nki lukebisu mbandu yai kepesa beto? (1 Sam. 18:7-9, 25; Yak. 3:14-16)

  • Tanga 1 Samuele 19:1-17.

    Inki mutindu Yonatani kutulaka luzingu na yandi na kigonsa ntangu yandi tubaka bangogo yina kele na 1 Samuele 19:4, 5? (1 Sam. 19:1, 6)