Kwenda na mambu ke na kati

Kwenda na tansi ya malongi

Nkenda ya 58: David na Goliat

Nkenda ya 58: David na Goliat

BANTU ya Filisti kwisaka kunwanisa dyaka bana ya Israele mpi bambuta yonso tatu ya David kotaka na basoda ya Saül. Kilumbu mosi, Jesse tubaka na David nde: ‘Natila bampangi na nge madya mpi mampa, mpi tala nki mutindu bau mekuma.’

Goliat

Kaka ntangu yandi kumaka na camp, David kwendaka ntinu kisika bau vandaka kunwana sambu na kutala bampangi na yandi. Tala Mufilisti ya nda na zina ya Goliat kwisaka na bana ya Israele sambu na kufinga bau. Yandi vandaka kukwisa mutindu yina mpimpa mwini bilumbu 40. Yandi tubilaka bau nde: ‘Beno sola muntu mosi sambu yandi kwisa kunwana na mono. Kana yandi kuluta mono ngolo, beto takuma bampika na beno. Kansi kana mono kuluta ngolo, beno takuma bampika na beto. Bubu yai mono ketula ntembe na basoda ya Israele.’

David yulaka basoda yankaka nde: ‘Inki bau tasala sambu na muntu yina tafwa Mufilisti yai mpi takatula bana ya Israele na nsoni yai?’

Soda vutudilaka yandi nde: ‘Saül tapesa yandi kimvwama mpi takwedisa yandi mwana na yandi ya nkento.’

Kansi, bantu ya Israele yonso vandaka kuwa boma sambu na Goliat, sambu yandi vandaka muntu ya nda. Yandi vandaka na nda kiteso ya metre tatu. Na ntwala na yandi soda mosi vandaka kutambula sambu na kutanina yandi ti kitaninu ya nene.

Bau zabisaka Ntotila Saül nde David kezola kunwana na Goliat. Kansi Saül tubaka na David nde: ‘Nge lunga kunwana ve na Mufilisti yina. Nge kele mwana ya fyoti mpi yandi kele soda yantika kileke na yandi.’ David vutulaka nde: ‘Mono fwaka ours mpi nkosi yina vandaka kutinisa mameme ya tata na mono. Mpi Mufilisti yai tafwa mutindu mosi. Jéhovah tagulusa mono.’ Ebuna Saül tubaka nde: ‘Kwenda, mpi Jéhovah vanda na nge.’

David kwendaka na masa mpi lokutaka matadi tanu ya butesi. Yandi tulaka yau na saki na yandi. Na nima, yandi tulaka kinwaninu na maboko mpi kwendaka na muntu yina ya nda. Mutindu Goliat monaka yandi, yandi yantikaka na kuyituka. Yandi yindulaka nde yau kele mpasi ve na kufwa David.

David kelosa ditadi

Goliat tubaka nde: ‘Kwisa na mono, sambu mono pesa musuni na nge na bandeke mpi na bambisi ya nseke.’ David vutulaka nde: ‘Nge kekwisa na mono ti mbele, ti dyonga, ti tolotolo ya nda; mono kekwisa na nge na zina ya Jéhovah. Bubu yai, Jéhovah tapesa nge na maboko na mono.’

Ebuna David kwendaka ntinu na Goliat. Yandi basisaka ditadi na saki, yandi tulaka yau na kinwaninu mpi losaka yau ti ngolo yonso. Ditadi simbaka Goliat na mbunzu mpi kotaka na kati. Yandi bwaka mpi fwaka! Bafilisti tinaka sambu bau monaka nde muntu na bau ya kuluta ngolo mefwa. Basoda ya Israele kulandaka bau mpi kufwaka bau. Bau nungaka mvita yina.

1 Samuele 17:1-54.



Bangyufula

  • Inki ntembe Goliati kutulaka ti basoda ya Izraele?
  • Goliati kuvandaka nda nki kiteso, mpi nki lufutu Ntotila Saule kusilaka na muntu yina tafwa Goliati?
  • Inki Davidi kutubaka ntangu Saule kusongaka yandi nde yandi takuka ve kunwana ti Goliati sambu yandi kuvandaka mwana ya fyoti?
  • Na mvutu ya yandi pesaka Goliati, inki mutindu Davidi kumonisaka nde yandi vandaka kutula ntima na Yehowa?
  • Mutindu nge kemona yo na kifwanisu, inki Davidi kusadilaka sambu na kufwa Goliati, mpi nki kubwilaka bantu ya Filistia na nima?

Bangyufula ya ngika

  • Tanga 1 Samuele 17:1-54.

    Inki kusalaka nde Davidi kukonda boma, mpi nki mutindu beto lenda landa mbandu ya kikesa na yandi? (1 Sam. 17:37, 45; Ef. 6:10, 11)

    Sambu na nki Bakristu fwete buya mpeve ya kutesana bonso yina Goliati kuvandaka na yo ntangu bo kesala bansaka ya kulutisila ntangu? (1 Sam. 17:8; Gal. 5:26; 1 Tim. 4:8)

    Inki mutindu bangogo ya Davidi kemonisa nde yandi vandaka kukwikila na lusadisu ya Nzambi? (1 Sam. 17:45-47; 2 Bans. 20:15)

    Na kisika ya kutubila kaka bitumba na kati ya bimvuka zole ya basoda, inki mutindu disolo yai kemonisa nde yo vandaka mpenza bitumba na kati ya banzambi ya luvunu mpi Nzambi ya kyeleka, Yehowa? (1 Sam. 17:43, 46, 47)

    Inki mutindu bapakulami yina mebikalaka kelandaka mbandu ya Davidi ya kutula ntima na Yehowa? (1 Sam. 17:37; Yer. 1:17-19; Kus. 12:17)