Kwenda na mambu ke na kati

Kwenda na tansi ya malongi

Nkenda ya 50: Bankento zole ya kikesa

Nkenda ya 50: Bankento zole ya kikesa

NTANGU mambu vandaka kubaluka na mpila ya mbi sambu na Israele, bau vandaka kuboka na Jéhovah yina vandaka kubasisa bamfumu ya kikesa sambu na kusadisa bau. Bible kebinga bamfumu yai bazuzi. Josué vandaka zuzi ya ntete. Na nima na yandi, bazuzi yankaka kubasikaka bonso Oteniel, Ehud, mpi Shamgar. Kansi zole na kati na bau yina kusadisaka Israele kuvandaka bankento: Debora na Jahel.

Debora kesolula ti Barak

Debora vandaka mbikudi ya nkento. Jéhovah vandaka kumonisa yandi mambu yina tasalama na bilumbu kekwisa mpi yandi vandaka kusonga bantu yau. Debora vandaka mpi zuzi. Yandi vandaka kusadila na nsi ya diba mpi bantu vandaka kukwisa kuzabisa yandi mambu na bau.

Na ntangu yina, Jabin vandaka ntotila ya Kana. Yandi vandaka na bapusupusu ya bitumba 900. Makesa na yandi vandaka ngolo mingi yau yina bana ya Israele mingi kumaka bansadi ya Jabin. Mfumu yina vandaka kutwadisa makesa ya Ntotila Jabin vandaka Sizera.

Kilumbu mosi, Debora bingaka zuzi Barak mpi tubilaka yandi nde: ‘Jéhovah metuba mutindu yai: “Baka bantu 10 000 mpi nata bau na Ngumba Tabor. Kele kisika yina mono tanata Sizera na basoda na yandi. Mpi nge tanunga bau.”’

Barak vutudilaka Debora nde: ‘Kana nge kwisa na mono, mono takwenda.’ Debora fidisaka yandi kansi yandi songaka Barak nde: ‘Lukumu ya kununga tavanda ya nge ve, sambu Jéhovah tabwisa Sizera na maboko ya nkento mosi.’ Yau yina mpi kubwaka.

Barak kukulumukaka Ngumba Tabor sambu na kukutana na basoda ya Sizera. Na kintulumukina, Jéhovah fulusaka masa na nzila mpi basoda mingi ya bambeni kufwaka. Kansi Sizera katukaka na pusupusu na yandi, yandi bwaka na ntoto, mpi yandi tinaka.

Barak, Jahel, mpi Sizera

Sizera kumaka tii na nzo ya Jahel. Nkento yina kukotisaka yandi mpi pesaka yandi midiki ya kunwa. Yau pesaka yandi mpongi mpi ntama ve yandi lalaka. Ebuna Jahel bakaka pike ya nzo-tenta mpi yandi tumikaka yandi yau na ntu na marto. Ntangu Barak kumaka, nkento yina kusongaka yandi mvumbi ya Sizera! Ndinga ya Debora kulunganaka.

Nsukansuka bau fwaka Ntotila Jabin mpi bana ya Israele vandaka na ngemba ntangu mingi.

Bazuzi 2:14-22; 4:1-24; 5:1-31.



Bangyufula

  • Bazuzi kuvandaka banani? Tanga mwa bazina na bo.
  • Inki dibaku ya nene Debora kuvandaka na yo, mpi yo vandaka kulomba inki?
  • Ntangu Ntotila Yabini ti mfumu ya basoda na yandi, Sisera, vandaka kumonisa bantu ya Izraele mpasi, inki nsangu ya kukatukaka na Yehowa Debora kupesaka Zuzi Baraka, mpi yandi tubaka nde nani tabaka lukumu?
  • Inki mutindu Yaele kumonisaka nde yandi vandaka nkento ya kikesa?
  • Inki kusalamaka na nima ya lufwa ya Ntotila Yabini?

Bangyufula ya ngika

  • Tanga Bazuzi 2:14-22.

    Inki mutindu bantu ya Izraele kupusaka Yehowa na kuwila bo makasi, mpi nki dilongi beto lenda baka na dyambu yai? (Baz. 2:20; Bing. 3:1, 2; Ezek. 18:21-23)

  • Tanga Bazuzi 4:1-24.

    Na yina metala lukwikilu ti kikesa, inki malongi Bakristu yina kele bankento bubu yai lenda baka na mbandu ya Debora ti Yaele? (Baz. 4:4, 8, 9, 14, 21, 22; Bing. 31:30; 1 Kor. 16:13)

  • Tanga Bazuzi 5:1-31.

    Inki mutindu beto lenda sadila nkunga ya kununga ya Baraka ti Debora bonso kisambu na yina metala bitumba ya Armagedoni yina kekwisa? (Baz. 5:3, 31; 1 Bans. 16:8-10; Kus. 7:9, 10; 16:16; 19:19-21)