Kwenda na mambu ke na kati

Kwenda na tansi ya malongi

Nkenda ya 48: Mayele ya bantu ya Ngiboni

Nkenda ya 48: Mayele ya bantu ya Ngiboni

BAMBANZA mingi ya Kana kuyilamaka sambu na kunwanisa Israele. Bau vandaka na kivuvu nde bau tanunga, kansi bantu ya mbanza mosi ya nzyunga na zina ya Ngiboni vandaka na kivuvu yina ve. Bau kwikilaka nde Nzambi vandaka na ndambu ya bantu ya Israele mpi bau zolaka ve ata fyoti kunwana na Nzambi. Inki bau salaka?

Bau bakaka lukanu ya kudikumisa bonso nde bau kezingaka ntama kibeni. Bantu yankaka na kati na bau lwataka bilele ya nkulu mpi basapatu ya kutunga-tunga. Bau tulaka basaki na bau ya kununa na bampunda mpi bau nataka madya ya kuyuma. Na nima bau kwendaka na Josué mpi bau tubilaka yandi nde: ‘Beto mekatuka na ntoto ya ntama, sambu beto mewa nsangu ya Nzambi na beno ya nene Jéhovah mpi mambu yonso ya yandi mesala na Egypte. Sambu na yau bamfumu na beto mepesa beto nswa ya kubaka madya ya nzila mpi na kukwisa kutubila beno nde: “Beto kele bansadi na beno. Beno laka beto nde beno tanwanisa beto ve.” Mpila beno kemona yau, bilele na beto mekuma ya nkulu sambu na nzila ya nda mpi mampa yonso mekauka.’

Josué na bamfumu yina yankaka kukwikilaka bantu ya Ngiboni. Bau lakaka bau na kunwanisa bau ve. Kansi, na nima ya bilumbu tatu, bau waka nde bantu ya Ngiboni vandaka kuzinga penepene na bau.

Josué kuyufulaka bau nde: ‘Sambu na nki beno tubilaka beto nde beno katukaka na ntoto ya ntama?’

Bau vutulaka nde: ‘Sambu beto waka nsangu nde Jéhovah Nzambi na nge silaka na kupesa beno insi yai ya Kana. Sambu na yau, beto waka boma mingi na kufwa na maboko na beno.’ Na kuzitisaka ndinga na bau, bau fwaka ve bantu ya Ngiboni, kansi bau kumisaka bau bansadi na bau.

Ntangu ntotila ya Yerusaleme kuwaka nde bantu ya Ngiboni mewakana na Israele, yandi waka makasi mingi. Yandi tindaka bantu na kutubila bantotila yina yankaka iya nde: ‘Beno kwisa kusadisa mono na kunwanisa bantu ya Ngiboni.’ Bantotila yonso tanu kunwanisaka bwala Ngiboni. Keti bantu ya Ngiboni vandaka na mayele ya kuwakana na bantu ya Israele? Nkenda yina kelanda tatubila beno yau.

Yozue 9:1-27; 10:1-5.

Josué ti bantu ya ngiboni


Bangyufula

  • Inki mutindu bantu ya Gabaoni kuswaswanaka ti bantu ya Kanana yina vandaka kuzinga na bambanza ya penepene?
  • Mutindu kifwanisu kemonisa yo, bantu ya Gabaoni ke na kusala inki, mpi sambu na inki?
  • Inki lusilu Yozue ti bamfumu ya Izraele kupesaka bantu ya Gabaoni, kansi nki bo zabaka na nima ya bilumbu tatu?
  • Inki kusalamaka ntangu bantotila ya bambanza yankaka kuwaka nde bantu ya Gabaoni mesala kuwaka ti bantu ya Izraele?

Bangyufula ya ngika

  • Tanga Yozue 9:1-27.

    Sambu Yehowa kusongaka dikanda ya Izraele na “kufwa-fwa bantu yonso na nzila,” inki bikalulu yandi monisaka na mutindu yandi kufwaka ve bantu ya Gabaoni? (Yoz. 9:22, 24; Mat. 9:13; Bis. 10:34, 35; 2 Pie. 3:9)

    Inki mbandu ya mbote Yozue kubikilaka Bakristu bubu yai na mutindu yandi kangamaka na kuwakana yina yandi salaka ti bantu ya Gabaoni? (Yoz. 9:18, 19; Mat. 5:37; Ef. 4:25)

  • Tanga Yozue 10:1-5.

    Bubu yai nki mutindu kibuka ya nene kelandaka mbandu ya bantu ya Gabaoni, mpi sambu na inki bo kenwanisaka bo? (Yoz. 10:4; Zak. 8:23; Mat. 25:35-40; Kus. 12:17)