Kwenda na mambu ke na kati

Kwenda na tansi ya malongi

Nkenda ya 44: Bantu zole zikisaka Yeriko

Nkenda ya 44: Bantu zole zikisaka Yeriko

BANTU ya beno kemona awa kele na kigonsa ya lufwa. Bau kesosa kutina sambu na kuguluka. Bau kele bantu ya Israele. Nkento yina kesadisa bau zina na yandi Rahab. Nzo na yandi kele na zulu ya kibaka ya mbanza Yeriko. Beto tala sambu na nki bantu yai kele na kigonsa.

Bana ya Israele kumaka penepene ya kusabuka Nzadi Yurdani sambu na kukuma na insi ya Kana. Kansi na ntwala ya kilumbu yina ya nene, Josué tindaka bantu zole na kutubilaka bau nde: ‘Beno kwenda kuzikisa insi mpi mbanza Yeriko.’

Rahab ti mineki zole ya Israele

Ntangu bau kumaka na Yeriko, bantu yina kwendaka na nzo ya Rahab. Kansi muntu mosi kuzabisaka ntotila ya Yeriko nde: ‘Tala bantu ya Israele zole mekwisa na mpimpa yai sambu na kuzikisa insi na beto.’ Ebuna ntotila tindaka bansadi na kuzabisa Rahab nde: ‘Basisa bantu yina mekwisa na nge!’ Kansi Rahab kubumbaka bau na ludi ya nzo na yandi. Yandi vutulaka na bansadi ya ntotila nde: ‘Luvunu ve, bau kwisaka na nzo na mono, kansi mono zabaka ve wapi bau katukilaka. Na luyantiku ya mpimpa, ntangu basintri vandaka kukanga kyelo ya mbanza, bau basikaka, mpi mono kezaba ve kana wapi bau mekwenda. Beno sasuka na kulanda bau, mbala yankaka beto tasimba bau!’ Bansadi ya ntotila kulandaka bau.

Na nima ya bansadi ya ntotila kwendaka, Rahab kwendaka kukutana na bantu ya Israele na ludi mpi yandi songaka bau nde: ‘Mono zaba nde Jéhovah mepesa beno insi yai. Beto waka mutindu yandi kausaka Nzadi Mbwaki ntangu beno basikaka na Egypte, mpi mutindu yandi fwaka bantotila Sihon na Ogi. Mono mesala beno mbote; beno dya ndefi nde beno mpi tasala mono mbote. Beno bikisa mono na luzingu, mono na kikanda na mono.’

Bantu yina silaka nde bau tabikisa yandi na luzingu kansi Rahab fwete lungisa malombo. Bau songaka yandi nde: ‘Kangisa kitende ya mbwaki na nela na nge mpi vanda kisika mosi na kikanda na nge yonso. Ntangu beto tavutuka sambu na kubaka Yeriko, beto tamona nsinga mpi beto tagulusa bantu yina tavanda na nzo na nge.’ Ntangu bau kumaka na Josué, bantu yina tubilaka yandi mambu yonso yina kusalamaka.

Yozue 2:1-24; Baebreo 11:31.



Bangyufula

  • Rahabi vandaka kuzinga na wapi?
  • Babakala zole yina kele na kifwanisu kele banani, mpi sambu na nki bo kwendaka na Yeriko?
  • Ntotila ya Yeriko kusongaka Rahabi na kusala inki, mpi nki mvutu yandi pesaka?
  • Inki mutindu Rahabi kusadisaka babakala yina zole, mpi nki lusadisu yandi lombaka?
  • Inki lusilu bantu yina zole kupesaka Rahabi?

Bangyufula ya ngika

  • Tanga Yozue 2:1-24.

    Inki mutindu lusilu ya Yehowa yina kele na Kubasika 23:28 kulunganaka ntangu bantu ya Izraele kunwanisaka Yeriko? (Yoz. 2:9-11)

  • Tanga Baebreo 11:31.

    Inki mutindu mbandu ya Rahabi kemonisa mfunu ya lukwikilu? (Roma 1:17; Baeb. 10:39; Yak. 2:25)