Kwenda na mambu ke na kati

Kwenda na tansi ya malongi

Nkenda ya 53: Lusilu ya Jefté

Nkenda ya 53: Lusilu ya Jefté
Mwana-nkento ya Jefté

KETI yau mekuminaka beno ntete ve na kusila mpi na nima kumona nde yau kele mpasi na kulungisa yau? Bakala ya kele na kifwanisu yai kusala yau, yau yina yandi kele na ntantu. Yau vandaka mutindu mosi sambu na zuzi ya kikesa ya Israele Jefté.

Jefté kuzingaka na nsungi yina bana ya Israele yambulaka kusambila Jéhovah mpi yantikaka dyaka na kusala mambi. Ebuna Jéhovah bwisaka bau na maboko ya bantu ya Amoni. Na bampasi na bau, bantu ya Israele sambaka Jéhovah nde: ‘Beto mesumuka. Gulusa beto!’

Jefté ti bantu na yandi

Bau vandaka kumona ntantu sambu na mambu ya mbi ya bau salaka mpi bau kumonisaka luzolo ya kubalula ntima na kuvutukaka na lusambu ya Jéhovah. Ebuna, Jéhovah kusadisaka bau dyaka.

Bantu solaka Jefté sambu na kunwanisa bantu ya Amoni. Jefté silaka mutindu yai sambu nde Jéhovah kutanina yandi na mvita yina: ‘Kana nge bwisa bantu ya Amoni, mono tatambika na nge muntu ya ntete yina tabasika na nzo na mono sambu na kuyamba mono ntangu mono tavutuka.’

Jéhovah ndimaka ndinga ya Jefté mpi yandi sadisaka yandi sambu na kununga. Beno zaba nani kwisaka na ntwala ya Jefté ntangu yandi vutukaka? Muntu ya ntete ya basikaka na kuyamba yandi vandaka mwana na yandi ya ntete mpi mosi kaka ya nkento. Jefté bokaka nde: ‘Ah! Mwana na mono, nge metula mono na mpasi ya kuluta. Mono mesila lusilu na Jéhovah mpi mpila ya kukatula yau kele ve.’

Ntangu yandi zabaka lusilu ya tata na yandi, mwana ya Jefté vandaka ntete na mawa. Sambu yandi fwete bika tata na yandi mpi banduku na yandi sambu na kusadila Jéhovah na Siloh, na nzo-tenta na bilumbu na yandi yina bikalaka. Kansi yandi tubaka na tata na yandi nde: ‘Kana nge silaka Jéhovah, nge fwete sala mutindu nge tubaka.’

Na yau, mwana ya Jefté kwendaka na Siloh mpi yandi sadilaka Jéhovah kuna na luzingu na yandi yonso yina bikalaka. Bamvula yonso, bankento ya Israele vandaka kukwenda kutala yandi mpi bilumbu iya, bau vandaka kulutisa ntangu ya mbote kumosi na yandi. Bantu ya Israele zolaka mwana ya Jefté, sambu yandi vandaka nsadi ya mbote ya Jéhovah.

Bazuzi 10:6-18; 11:1-40.



Bangyufula

  • Yefte kuvandaka nani, mpi yandi zingaka na nki nsungi?
  • Inki lusilu Yefte kupesaka Yehowa?
  • Sambu na nki Yefte kukumaka mawa ntangu yandi vutukaka na nzo na yandi na nima ya kununga bantu ya Amoni na bitumba?
  • Mwana ya Yefte ya nkento kutubaka nki ntangu yandi zabaka lusilu ya tata na yandi?
  • Sambu na nki bantu vandaka kuzola mwana ya Yefte ya nkento?

Bangyufula ya ngika

  • Tanga Bazuzi 10:6-18.

    Inki lukebisu yina metala disolo ya kukonda kwikama ya bantu ya Izraele na Yehowa beto fwete landa? (Baz. 10:6, 15, 16; Roma 15:4; Kus. 2:10)

  • Tanga Bazuzi 11:1-11, 29-40.

    Inki mutindu beto mezaba nde kupesa ya Yefte kupesaka mwana na yandi ya nkento bonso “makabu ya kuyoka” kutendulaka ve kuyoka yandi na tiya bonso kimenga ya muntu? (Baz. 11:31; Levi 16:24; Kul. 18:10, 12)

    Na nki mutindu Yefte kupesaka mwana na yandi ya nkento bonso kimenga?

    Inki dilongi beto lenda baka na nkadilu ya Yefte sambu na lusilu yina yandi salaka na Yehowa? (Baz. 11:35, 39; Lo. 5:4, 5; Mat. 16:24)

    Inki mutindu mwana ya Yefte ya nkento kele mbandu ya mbote sambu na baleke yina kele Bakristu na yina metala kubaka lukanu ya kusala kisalu ya kimupasudi-nzila ya ntangu yonso luzingu ya mvimba? (Baz. 11:36; Mat. 6:33; Filp. 3:8)